ଦିଗପହଣ୍ଡି,୧୭।୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଏନଏସି ପ୍ରଶାସନ ପକ୍ଷରୁ ବୁଧବାର ସହରରେ ଜନ ସମ୍ପର୍କ ଅଭିଯାନ କାର୍ଯ୍ୟକ୍ରମର ଶୁଭାରମ୍ଭ କରାଯାଇଛି। ଏନଏସି କାର୍ଯ୍ୟାଳୟ ସମ୍ମିଳନୀ କକ୍ଷରେ ଆୟୋଜିତ ଆଲୋଚନା ସଭାରେ ନଗରପାଳ ପ୍ରଫୁଲ ପଣ୍ଡା ଅଧ୍ୟକ୍ଷତା କରିଥିଲେ। ଏନଏସି କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମିଶ୍ରଙ୍କ ସଂଯୋଜନାରେ ଉପାଧ୍ୟକ୍ଷା କେ . ପୂଜା , କାଉନସିଲର ଦୀପକ ମିଶ୍ର,ନୀଳମାଧବ ଗୌଡ଼ ,ସୁଶାନ୍ତ ପାତ୍ର,ସୁନୀଲ ପଣ୍ଡା, ସନ୍ତୋଷିନୀ ବେହେରା , ଇ . ଗାୟତ୍ରୀ , କାଉନସିଲର ପ୍ରତିନିଧି ରମେଶ ଜେନାଙ୍କ ସମେତ ୧୧ଟି ୱାର୍ଡ ଅଧୀନ ବିଭିନ୍ନ ସାହି,ବସ୍ତିର ବହୁ ସଂଖ୍ୟକ ବୁଦ୍ଧିଜୀବୀ ଏବଂ ବରିଷ୍ଠ ନାଗରିକ ସଭାରେ ଉପସ୍ଥିତ ଥିଲେ। ସହରାଞ୍ଚଳ ବିକାଶ ପ୍ରକ୍ରିୟାରେ ନାଗରିକଙ୍କ ସକ୍ରିୟ ଅଂଶଗ୍ରହଣକୁ ସୁନିଶ୍ଚିତ କରିବା, ବିଭିନ୍ନ ସରକାରୀ ଯୋଜନାରେ ସଚେତନତା ବୃଦ୍ଧି କରିବା ଏହି କାର୍ଯ୍ୟକ୍ରମର ଉଦ୍ଦେଶ୍ୟ ଓ ଆଭିମୁଖ୍ୟ ବୋଲି କାର୍ଯ୍ୟନିର୍ବାହୀ ଅଧିକାରୀ ତାଙ୍କ ଉଦ୍ବୋଧନରେ ପ୍ରକାଶ କରିଥିଲେ। ଜନସାଧାରଣଙ୍କ ସହ ସିଧା ସଳଖ ଆଲୋଚନା କରାଯାଇ ସେମାନଙ୍କ ସମସ୍ୟା,ଅଭିଯୋଗ,ମତାମତ ଓ ବିକାଶ ସମ୍ପର୍କିତ ପ୍ରସ୍ତାବ ଗୁଡ଼ିକ ଲିପିବଦ୍ଧ କରାଯାଇଥିଲା। କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ଜନ କଲ୍ୟାଣକାରୀ ଯୋଜନା, ସହରାଞ୍ଚଳ ବିକାଶ କାର୍ଯ୍ୟକ୍ରମ, ସ୍ବଚ୍ଛତା ଓ ପରିମଳ ବ୍ୟବସ୍ଥା, ପରିବେଶ ସୁରକ୍ଷା, ନାଗରିକ ସୁରକ୍ଷା ଓ ସରକାରଙ୍କ ଫ୍ଲାଗସିପ ଯୋଜନା ସମ୍ପର୍କରେ ଲୋକଙ୍କୁ ସଚେତନ କରାଯାଇଥିଲା।ସେହିପରି ନାଗରିକଙ୍କ ଅଭିଯୋଗ ଶୁଣାଣି, ଜନ ସଚେତନତା ଅଭିଯାନ, ସମୁଦାୟ ଭିତ୍ତିକ କାର୍ଯ୍ୟକଳାପ ଓ ନଗର ବିକାଶରେ ଜନ ଭାଗିଦାରୀ ବୃଦ୍ଧି ସମ୍ପର୍କରେ ସବିଶେଷ ଆଲୋଚନା କରାଯାଇଥିଲା। କାଉନସିଲ ନିର୍ବାଚନ ସରିବାର ୪ ବର୍ଷ ମଧ୍ୟରେ ଦିଗପହଣ୍ଡି ଅଞ୍ଚଳର ବହୁ ବିକାଶମୂଳକ କାର୍ଯ୍ୟ ହୋଇଥିଲେ ମଧ୍ୟ ୧ ନଂ ୱାର୍ଡରେ ଥିବା ସାହି ରାସ୍ତା ଗୁଡିକରୁ ଅଳିଆ ଆବର୍ଜନାକୁ ସଫେଇ ଉପରେ ଦୃଷ୍ଟି ଦେବା , ଅଞ୍ଚଳ କଲୋନୀରେ ରହିଥିବା ପୋଖରୀରେ ଦଶାହ କାର୍ଯ୍ୟ ପାଇଁ ଏକ ମଣ୍ଡପ ନିର୍ମାଣ , ରାଜପୁର ରୋଡ଼ ଓ ଶିଶିର ପଣ୍ଡାଙ୍କ ଦୋକାନ ଗଳିରେ ରହିଥିବା ମୁକୁଳା ଡ୍ରେନ ଉପରେ ଘୋଡଣି ପକାଇବା ସମ୍ପର୍କରେ ଉପସ୍ଥିତ ବାସିନ୍ଦାମାନେ ମତ ରଖିଥିଲେ । ସେହିପରି ୨ନଂ ୱାର୍ଡ କାଳିଆ ନଗରରେ ସାମାନ୍ୟ ବର୍ଷା କିମ୍ବା ଘୋଡାହାଡ ଡ୍ୟାମରୁ ଜଳସେଚନ ନିମନ୍ତେ କେନାଲ ଯୋଗେ ପାଣି ଛଡାଗଲେ ସେହି ପାଣି ସେଠାରେ ରହୁଥିବା ଲୋକଙ୍କ ଘରେ ପଶୁଛି। ତେଣୁ ଏଥିପ୍ରତି ଦୃଷ୍ଟି ଦେବାକୁ ଅନୁରୋଧ କରାଯାଇଥିଲା । ଏପରିକି ୩ ନଂ. ୱାର୍ଡ ବାଲାଜୀ ନଗରରେ ଡ୍ରେନେଜ ଏବଂ ରାସ୍ତା ସମସ୍ୟା ସମ୍ପର୍କରେ ଆଲୋଚନା ହୋଇଥିଲା । ଏଥିସହ ସହରର ନେଳିଆ ବନ୍ଧ ପୋଖରୀ ଏବଂ ଜାଗିଲି ବନ୍ଧ ପୋଖରୀ ଏବଂ ବଡବନ୍ଧ ପୋଖରୀ ସମେତ ସମସ୍ତ ୱାର୍ଡର ସମସ୍ୟାକୁ ନେଇ କାର୍ଯ୍ୟକ୍ରମରେ ସ୍ଥାନୀୟ ଜନସାଧାରଣ ଆଲୋଚନା କରିଥିଲେ । ଏନେଇ ଏନଏସି କାର୍ଯ୍ୟାଳୟ ପକ୍ଷରୁ ସମସ୍ତ ୱାର୍ଡର ବିବିଧ ସମାଧାନ ପାଇଁ ଦୃଷ୍ଟି ଦିଆଯିବ ବୋଲି ନଗରପାଳ ପ୍ରତିଶ୍ରୁତି ଦେଇଥିଲେ । ଆଗାମୀ ୨୧ ତାରିଖ ଯାଏ ସହରାଞ୍ଚଳ ଜନସମ୍ପର୍କ ଓ ନାଗରିକ ଭାଗିଦାରୀ କାର୍ଯ୍ୟକ୍ରମ ଚାଲୁ ରହିବ ବୋଲି କାର୍ଯ୍ୟନିର୍ବାହୀ ଅଧିକାରୀ କହିଥିଲେ।ଏହି ସଭାରେ ସହରର ଶତାଧିକ ନାଗରିକ ଉପସ୍ଥିତ ଥିବାବେଳେ ଏନଏସି କର୍ମଚାରୀ ବୃନ୍ଦ ସମସ୍ତ କାର୍ଯ୍ୟକ୍ରମ ପରିଚାଳନା ରେ ସହଯୋଗ କରିଥିଲେ ।