ଦିଗପହଣ୍ଡି,୨୯।୩(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସ୍ଥିତ ଶ୍ରୀଗୁପ୍ତେଶ୍ୱର ଶୈବପୀଠ ପରିସରରେ ବନ୍ଧୁମିଳନ । ରବିବାର ଦିଗପହଣ୍ଡି ବ୍ଲକ ଅଞ୍ଚଳର ବିଭିନ୍ନ ଗାଁ ହାଇସ୍କୁଲରେ ପଢ଼ିଥିବା ୧୯୮୨ ମସିହା ମାଟ୍ରିକ ବ୍ୟାଚର ବହୁସଂଖ୍ୟକ ପୁରାତନ ଛାତ୍ର ଏକାଠି ହୋଇ ଦିଗପହଣ୍ଡି ବ୍ଲକ ପୁରାତନ ଛାତ୍ର ସଂଘ ଗଠନ କରିଛନ୍ତି । ପ୍ରଥମ ପର୍ଯ୍ୟାୟରେ ଦିଗପହଣ୍ଡି ସ୍ଥିତ ବଡ଼ଖେମୁଣ୍ଡିି ହାଇସ୍କୁଲ, ପଦ୍ମନାଭପୁର ରାଧାଶ୍ୟାମ ହାଇସ୍କୁଲ, ବମୋକେଇ ଗ୍ରାମ ସ୍ଥିତ ଶିବାନନ୍ଦ ହାଇସ୍କୁଲ ଏବଂ ଭୀଷ୍ମଗିରି ଗ୍ରାମ ସ୍ଥିତ ସରକାରୀ ହାଇସ୍କୁଲ ଛାତ୍ରମାନଙ୍କୁ ନେଇ ଏକ କମିଟି ଗଠନ କରାଯାଇଥିଲା।
ଆଲୋଚନା ସଭାରେ ଉପସ୍ଥିତ କିଛି ଛାତ୍ର ପାଠ ପଢ଼ା ସମୟର ସ୍ମୃତିଚାରଣ କରିଥିଲେ । ଅନେକ ବର୍ଷ ପରେ ସାଙ୍ଗସାଥିମାନେ ଏକତ୍ରିତ ହୋଇଥିବାରୁ ପରସ୍ପର ମଧ୍ୟରେ ଭାବ ଆଦାନ ପ୍ରଦାନ କରିବା ସହ ଛାତ୍ର ଜୀବନ ସମୟରେ ଘଟିଯାଇଥିବା ଛୋଟ ବଡ଼ ଘଟଣାକୁ ମନେପକାଇ ଭାବ ବିହ୍ୱଳ ହୋଇପଡ଼ିଥିଲେ। ପରେ ପୁରାତନ ଛାତ୍ର ସଂଘର କର୍ମକର୍ତ୍ତା ଚୟନ କରାଯାଇଥିଲା। ସଂଘର ଉପଦେଷ୍ଟା ଭାବେ ଅଳକ ନାଥ ମିଶ୍ର, ସଭାପତି ଭାବେ ରାଜେନ୍ଦ୍ର ସାହୁ, ସମ୍ପାଦକ ଭାବେ କାଳୁ ଚରଣ ପାଣିଗ୍ରାହୀ, ସହ – ସମ୍ପାଦକ ଭାବେ ପ୍ରଭାକର ସେଠୀ ଏବଂ କୋଷାଧ୍ୟକ୍ଷ ରୂପେ ଆଦିତ୍ୟ ମହାରଣାଙ୍କୁ ସର୍ବସମ୍ମତି କ୍ରମେ ମନୋନୟନ କରାଯାଇଥିଲା। ସଂଘ ପକ୍ଷରୁ ବୃକ୍ଷ ଚାରା ରୋପଣ, ସ୍ଵେଚ୍ଛାକୃତ ରକ୍ତଦାନ ଶିବିର, ମଠ ମନ୍ଦିର ପୋଖରୀ ରାସ୍ତାଘାଟ ସଫେଇ ଭଳି ବିଭିନ୍ନ ସାମାଜିକ ସହଭାଗିତା କାର୍ଯ୍ୟକ୍ରମ ହାତକୁ ନିଆଯିବ ବୋଲି ସଭାରେ ବିଧିବଦ୍ଧ ନିଷ୍ପତ୍ତି ନିଆଯାଇଥିଲା।
ଆଗାମୀ ଦିନରେ ସଂଘକୁ ଅଧିକ କ୍ରିୟାଶୀଳ କରାଯିବା ସହ ପୁରାତନ ଛାତ୍ରୀଛାତ୍ରମାନଙ୍କୁ ଯୋଗାଯୋଗ କରାଯାଇ ପରବର୍ତ୍ତୀ ସଭାରେ ସେମାନଙ୍କୁ ସଂଘର ସଦସ୍ୟ ଭାବେ ଗ୍ରହଣ ପାଇଁ ଆଗତ ପ୍ରସ୍ତାବକୁ ଅନୁମୋଦନ କରାଯାଇଥିଲା। ପ୍ରାଧ୍ୟାପକ ଡ଼.କୃଷ୍ଣଚନ୍ଦ୍ର ପ୍ରଧାନ, ଅବସର ପ୍ରାପ୍ତ କ୍ରୀଡା ଶିକ୍ଷକ ଏମ.ଗୌରାଙ୍ଗ, ପୂର୍ବତନ କାଉନସିଲର ବିଚିତ୍ର ବେହେରା, ଭଗବାନ ମହାରଣା, ୟୁ.ଲିଙ୍ଗରାଜ, ସତ୍ୟନାରାୟଣ ଦାସ, ହରିଶ୍ଚନ୍ଦ୍ର ସାହୁ ପ୍ରମୁଖ ବହୁ ସଂଖ୍ୟକ ପୁରାତନ ଛାତ୍ର ବିଭିନ୍ନ ଆଲୋଚନାରେ ଅଂଶଗ୍ରହଣ କରିଥିଲେ ।
