ନୂଆଦିଲ୍ଲୀ: ସରକାର ଗ୍ରହଣ କରିଥିବା ଡିଜିଟାଲ ଇଣ୍ଡିଆ କାର୍ଯ୍ୟକ୍ରମ ଦେଶରେ ଅନେକ ପରିବର୍ତ୍ତନ ଆଣିବାରେ ସହାୟକ ହୋଇଛି। ବାଙ୍ଗାଲୋର ଟେକ୍ ସମିଟ-୨୦୨୦କୁ ଭର୍ଚୁଆଲ ଯୋଗେ ଉଦ୍ଘାଟନକରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହା କହିଛନ୍ତି। ସେ ଦେଶର ଟେକ୍ନୋଲୋଜି ଭିତ୍ତିଭୂମି ଉପରେ ମତ ରଖି କହିଛନ୍ତି, ଭାରତ ନିକଟରେ ଟେକ୍ନୋଲୋଜିକୁ ନେଇ ଜ୍ଞାନ ଭରି ରହିଛି। ଭାରତରେ ଏହାର ଏକ ବଡ ବଜାର ମଧ୍ୟ ରହିଛି। ଏହାକୁ ବ୍ୟବହାର କରି ଭାରତ ବିଶ୍ୱର ପ୍ରମୁଖ ନିବେଶ ସ୍ଥଳ ହେବାକୁ ସକ୍ଷମ ହେବ। ସେ ପୁଣି କହିଛନ୍ତି, ସରକାର ୫ ବର୍ଷ ତଳେ ଡିଜିଟାଲ ଇଣ୍ଡିଆ କାର୍ଯ୍ୟକ୍ରମ ଶୁଭାରମ୍ଭ କରିଥିଲେ। ବର୍ତ୍ତମାନ ଡିଜିଟାଲ ଇଣ୍ଡିଆ ଜୀବନର ଏକ ତରିକା ବନିଯାଇଛି। ଟେକ୍ନୋଲୋଜି ଏବଂ ଉଦ୍ଭାବନ ଦିଗରେ ସରକାର ନିରନ୍ତର ଭିତ୍ତିରେ ବିଭିନ୍ନ ପଦକ୍ଷେପ ହାତକୁ ନିଆଯାଉଛି। ଭାରତୀୟ ଟେକ୍ ସଲ୍ୟୁଶନ ବିଶ୍ୱକୁ ଅନେକ କିଛି ଦେବାକୁ କ୍ଷମତା ରଖିଛି। ଭାରତୀୟ ଯୁବବର୍ଗ ଏବଂ ଟେକ୍ନୋଲୋଜି ନିକଟରେ ସମ୍ଭାବନା ନେଇ ସେ ବେଶ୍ ଆଶାବାଦୀ ଥିବା କହିଛନ୍ତି। ସୂଚନାଯୋଗ୍ୟ, ବାଙ୍ଗାଲୋର ଟେକ୍ ସମିଟ କର୍ନାଟକ ସରକାର, ବାୟୋଟେକ୍ନୋଲୋଜି ଆଣ୍ଡ ଷ୍ଟାର୍ଟଅପ୍, ସଫ୍ଟଓ୍ବେର ଟେକ୍ନୋଲୋଜି ପାର୍କସ ଅଫ ଇଣ୍ଡିଆ ଏବଂ ଏମ୍ଏସ୍ ଆକ୍ଟିଭିଟି ଟେକ୍ କମ୍ୟୁନିକେଶନ ମିଳିତ ଭାବେ ଆୟୋଜନ କରିଛନ୍ତି।
