ଗୋପ,୧୫।୫(ଡି.ଏନ୍.ଏ.): ବେଆଇନ୍ ପୋଖରୀ ଖୋଳି କିଛି ଦିନ ଧରି ସରକାରୀ ଜମି ଜବରଦଖଲ କରିବା ସହ ଏହି ପଞ୍ଚାୟତ ନିକଟରେ ଥିବା କାଦୁଅ ନଦୀକୁ ପୋତି ଦେବା ଭଳି ଅଭିଯୋଗ ହୋଇଛି। ମହଲପଡ଼ା ସରପଞ୍ଚ ଶୀର୍ଷ ରଞ୍ଜନ ନାୟକ ମୁଖ୍ୟମନ୍ତ୍ରୀ ଓ ରାଜ୍ୟ ସରକାରଙ୍କ ରାଜସ୍ବ ବିଭାଗ ସହିତ ଜିଲା ପ୍ରଶାସନକୁ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳି ନାହିଁ। ଫଳରେ ବର୍ଷା ପାଣି ନିଷ୍କାସନ ସମସ୍ୟା ଦେଖା ଦେବା ସହ ବ୍ଲକର ୬ଗୋଟି ପଞ୍ଚାୟତର ବିଭିନ୍ନ ଗଁା ବୁଡିବ ବୋଲି ଜଣାପଡିଛି। ପ୍ରକାଶ ଯେ, ୨୦୧୨ରୁ ମହଲପଡ଼ାରେ ଭୁବନେଶ୍ୱରର ଏକ କମ୍ପାନୀ ଅଳ୍ପ କିଛି ଜମି କିଣି ପରେ ନିକଟ ସରକାରୀ ଜମିକୁ ବେଆଇନ୍ ଭାବେ ଜବରଦଖଲ କରି ପୋଖରୀ ଖୋଳି ମାଟି ବିକ୍ରି କରିଥିଲା। ଏପରି ଅଭିଯୋଗକୁ ନେଇ ଗୋପ ତହସିଲ ଅଫିସ ପକ୍ଷରୁ ମଧ୍ୟ ବେଆଇନ୍ ମାଟି ବିକ୍ରିକୁ ରାଜସ୍ବ ଆଦାୟ ହୋଇଥିଲା। କିନ୍ତୁ କିଛି ଦିନର ବ୍ୟବଧାନ ପରେ ଏବେ ଏହି କମ୍ପାନୀ ବେଆଇନ ଭାବେ ପୋଖରୀ ଖୋଳିବା ସହିତ କାଦୁଅ ନଦୀ ପୋତି ଦେବା ଅଭିଯୋଗ କରି ମହଲପଡ଼ାର ଚିତେରା ଗ୍ରାମବାସୀ ଘଟଣାସ୍ଥଳରେ ପହଞ୍ଚି ଆନ୍ଦୋଳନ କରିବା ସହିତ ଏହାକୁ ବିରୋଧ କରିଥିଲେ। ଏପରି ଅଭିଯୋଗକୁ ସରପଞ୍ଚ ନାୟକ ଗୋପ ତହସିଲ ଅଫିସରେ ଏପରି ସରକାରୀ ଜମି ଜବରଦଖଲ ସହିତ ଅନ୍ୟାନ୍ୟ ଅଭିଯୋଗକୁ ନେଇ ଅଭିଯୋଗ କରିବା ସହ ଟୁଇଟ୍ ଯୋଗେ ମୁଖ୍ୟମନ୍ତ୍ରୀ ଓ ସମସ୍ତ ବିଭାଗକୁ ଜଣାଇଥିଲେ। ହେଲେ ଏପରି ଅଭିଯୋଗ ପରେ ମଧ୍ୟ ଏହି କମ୍ପାନୀ ପକ୍ଷରୁ ଡ୍ରୋଜର ଲଗାଯାଇ ଏବେ ପୋଖରୀ ଖୋଳା ମାଟିକୁ ନିକଟସ୍ଥ କାଦୁଆ ନଦୀକୁ ପୋତି ଦିଆଯାଉଛି। ଫଳରେ ବର୍ଷା ଦିନରେ ଏହି ନଦୀରେ ବର୍ଷା ପାଣି ନିଷ୍କାସନ ହୋଇ ପାରିବ ନାହିଁ। ଏପରି ଅଭିଯୋଗ ସମ୍ପର୍କରେ ଗୋପ ତହସିଲଦାର ଏସ୍.କେ ସାର୍ଗିଙ୍କୁ ପଚାରିବାରେ ଅଭିଯୋଗ ଉପରେ ଗୁରୁତ୍ୱ ଦିଆଯାଇଛି ବୋଲି କହିଥିଲେ।
