ନୂଆଦିଲ୍ଲୀ,୩୧।୧୨: ଭାରତୀୟ କିମ୍ବଦନ୍ତୀ ଅଫ୍ ସ୍ପିନର ହରଭଜନ ସିଂଙ୍କୁ ଜାତୀୟ ଦଳରୁ ବାଦ୍ ଦିଆଯିବା ନେଇ ଟିମ୍ ମ୍ୟାନେଜମେଣ୍ଟ କୌଣସି ଉତ୍ତର ଦେଇ ନ ଥିଲା। ଏକ ସାକ୍ଷାତକାର ବେଳେ ଭଜିଙ୍କୁ ସେହି ପରିସ୍ଥିତି ସମ୍ପର୍କରେ ସେତେବେଳର ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ସହ କୌଣସି ପ୍ରକାର ଯୋଗାଯୋଗ କରିଥିଲେ କି ବୋଲି ପ୍ରଶ୍ନ କରାଯାଇଥିଲା।
ଉତ୍ତରରେ “ମୁଁ ପ୍ରଶ୍ନ ପଚାରିବାକୁ ଉଦ୍ୟମ କରିଥିଲି, କିନ୍ତୁ ଉତ୍ତର ମିଳି ନ ଥିଲା। ମୋତେ ଦଳରୁ ବାଦ୍ ଦିଆଯିବା ପଛରେ କେଉଁମାନେ ଅଛନ୍ତି? ମୋତେ ଯେଉଁ ଭଳି ଦଳରୁ ବିଦା କରାଗଲା ତା’ ପରେ ସେହି ପ୍ରଶ୍ନ ପଚାରିବାର କିଛି ଅର୍ଥ ନ ଥିଲା। ଜଣେ କହିବାକୁ ଚାହୁଁ ନ ଥିଲେ, ତୁମେ ଯେତେ ପ୍ରଶ୍ନ କଲେ ମଧ୍ୟ କିଛି ଲାଭ ମିଳିବ ନାହିଁ। ସେହି ବିଷୟକୁ ପଛରେ ଛାଡ଼ି ଦେବା ଭଲ ହେବ। ମୋ ଦ୍ୱାରା ଯାହା ହୋଇପାରିବ, ମୁଁ ତାକୁ ନିୟନ୍ତ୍ରଣ କରିବାକୁ ଉଦ୍ୟମ କରିବି। ଯେଉଁ ବିଷୟକୁ ମୁଁ ନିୟନ୍ତ୍ରଣ କରିପାରିବି ନାହିଁ, ମୁଁ ତାକୁ ଦେଖେ ନାହିଁ। ପ୍ରକୃତରେ ଏହା ହିଁ ଘଟିଥିଲା” ବୋଲି ଭଜି କହିଛନ୍ତି।
କ୍ୟାରିୟରର ପରବର୍ତ୍ତୀ ଭାଗରେ ତାଙ୍କୁ ସୁଯୋଗ ନ ମିଳିବା ଉପରେ ସେ କହିଛନ୍ତି, ବିଶ୍ୱକପ୍ ଜିତିବା ପରେ ଚାମ୍ପିୟନ ଦଳ କଦାପି ଏକତ୍ରିତ ହୋଇ ଖେଳି ନ ଥିଲା। ଯେଉଁ ଦଳ ବିଶ୍ୱକପ୍ ଜିତିଛି, ସେହି ଦଳ ପରବର୍ତ୍ତୀ ସମୟରେ ନ ଖେଳିବା ଆଶ୍ଚର୍ଯ୍ୟଜନକ କଥା। ମୋତେ ୩୧ ହେଲା ବେଳକୁ ୪୦୦ ଟେଷ୍ଟ ଉଇକେଟ ନେଇ ସାରିଥିଲି। ମୋତେ ଲାଗୁଛି ପରବର୍ତ୍ତୀ ୮ରୁ ୯ ବର୍ଷ ଖେଳିଥିଲେ ମୁଁ ଅତିକମ୍ରେ ୧୦୦ ଉଇକେଟ ନେଇପାରିଥାନ୍ତି। କିନ୍ତୁ ତା’ ପରେ ମୋତେ କଦାପି ଖେଳିବାକୁ ସୁଯୋଗ ମିଳିଲା ନାହିଁ।
