ଢେଙ୍କାନାଳ ଅଫିସ, ୧୨।୨ ଢେଙ୍କାନାଳ ଜିଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଲଢୁଥିବା ପ୍ରାର୍ଥୀମାନେ ଠିକ୍ ଭାବେ ଖର୍ଚ୍ଚ ବିବରଣୀ ରଖୁନାହାନ୍ତି। ସମୀକ୍ଷା ବୈଠକରେ ମଧ୍ୟ ଉପସ୍ଥିତ ରହୁନାହାନ୍ତି, ଯାହାକୁ ନେଇ କ୍ଷୋଭବ୍ୟକ୍ତ କରିଛନ୍ତି ଜିଲା ପାଇଁ ନିୟୋଜିତ ଖର୍ଚ୍ଚ ପର୍ଯ୍ୟବେକ୍ଷକ ଦୟାନିଧି ନାୟକ। ନିର୍ବାଚନ ପରିଚାଳନାରେ ଖର୍ଚ୍ଚ ହିସାବ ଏକ ଗୁରୁତ୍ୱପୂର୍ଣ୍ଣ ବିଷୟ ହୋଇଥିବାରୁ ସମସ୍ତ ବିବରଣୀକୁ ତ୍ରୁଟିମୁକ୍ତ କରି ଉପସ୍ଥାପନ କରିବାକୁ ସେ ନିର୍ଦ୍ଦେଶ ଦେଇଛନ୍ତି।
ଉପଜିଲାପାଳଙ୍କ କାର୍ଯ୍ୟାଳୟରେ ଶୁକ୍ରବାର ଅପରାହ୍ନରେ ଜିଲା ପରିଷଦ ପ୍ରାର୍ଥୀ ଏବଂ ସେମାନଙ୍କ ଏଜେଣ୍ଟଙ୍କ ଉପସ୍ଥିତିରେ ଖର୍ଚ୍ଚ ସମୀକ୍ଷା କରାଯାଇଥିଲା। ତେବେ ଅଧିକାଂଶ ପ୍ରାର୍ଥୀ କିମ୍ବା ଏଜେଣ୍ଟ ଆସି ନ ଥିଲେ। ଯେଉଁମାନେ ଆସିଥିଲେ ସେମାନଙ୍କ ମଧ୍ୟରୁ ୯୦% ପ୍ରାର୍ଥୀ ଖର୍ଚ୍ଚର ହିସାବ ଖାତା ଆଣି ନ ଥିଲେ। କେହି ଜଣେ ବି ପ୍ରାର୍ଥୀ ନିର୍ବାଚନ କମିଶନଙ୍କ ନିୟମ ଅନୁଯାୟୀ ଖର୍ଚ୍ଚର ପୂର୍ଣ୍ଣାଙ୍ଗ ବିବରଣୀ ରଖୁ ନ ଥିବା ସମୀକ୍ଷା ବେଳେ ଜଣାପଡ଼ିଛି। ତେଣୁ ପରବର୍ତ୍ତୀ ବୈଠକରେ ତ୍ରୁଟିଶୂନ୍ୟ ଏବଂ ପୂର୍ଣ୍ଣାଙ୍ଗ ଖର୍ଚ୍ଚ ବିବରଣୀ ଉପସ୍ଥାପନ କରିବାକୁ ସମସ୍ତଙ୍କୁ ପରାମର୍ଶ ଦିଆଯାଇଛି। ଖର୍ଚ୍ଚ ପର୍ଯ୍ୟବେକ୍ଷକଙ୍କ ସହିତ ଏସ୍କର୍ଟ ଅଫିସର ପ୍ରକାଶ ମୁର୍ମୁ, ଉପଜିଲାପାଳ ସ୍ନିଗ୍ଧାରାଣୀ ଧଳ, ସହକାରୀ ଜିଲାପାଳ ହରିହର ପଞ୍ଚୁଆତି ପ୍ରମୁଖ ଉପସ୍ଥିତ ଥିଲେ।
ସେହିପରି ପୂର୍ବାହ୍ନରେ ସଦର ବ୍ଲକରେ ଏବିଡିଓ ଝାଡେଶ୍ୱର ଦାସ, ଜିପିଇଓ ଅନିତା ଦାସ, ବିତ୍ତ ଅଧିକାରୀ ସଞ୍ଜୟ କୁମାର ରାଉଳଙ୍କ ଉପସ୍ଥିତିରେ ପ୍ରାର୍ଥୀଙ୍କ ଖର୍ଚ୍ଚ ବିବରଣୀର ସମୀକ୍ଷା କରାଯାଇଥିଲା। ନିର୍ବାଚନ କମିଶନଙ୍କ ନିର୍ଦ୍ଧାରିତ ଫର୍ମ ୧ ଓ ୨ ଆଧାରରେ ପ୍ରାର୍ଥୀମାନେ ବିବରଣୀ ପ୍ରଦାନ କରି ନ ଥିଲେ। ତୁରନ୍ତ ଏହାକୁ ଠିକ୍ ଭାବେ ଉପସ୍ଥାପନ କରିବାକୁ ପର୍ଯ୍ୟବେକ୍ଷକ ପରାମର୍ଶ ଦେଇଛନ୍ତି।
