ଢେଙ୍କାନାଳ ଅଫିସ, ୨୨ା୯: ବାଇକ୍ରେ ଢେଙ୍କାନାଳରୁ ଲେହ, ଲଦାଖ। ୧୮ ଦିନରେ ୬ ହଜାର ୩୩୩ କିଲୋମିଟର ଦୀର୍ଘପଥ। ଏଭଳି ଦୁଃସାହସିକ ଯାତ୍ରା କରି ଚର୍ଚ୍ଚାକୁ ଆସିଛନ୍ତି ଢେଙ୍କାନାଳ ବାଇକର୍ସ କ୍ଲବର ସଂଯୋଜକ ମଳୟ ପଟ୍ଟନାୟକ। ଏହି କଷ୍ଟକର ଯାତ୍ରାରୁ ମଳୟ ସାଉଁଟିଛନ୍ତି ଅନନ୍ୟ ଅଭିଜ୍ଞତା। ଯାତ୍ରା ସାରି ସୁରକ୍ଷିତ ଭାବେ ଢେଙ୍କାନାଳରେ ପହଞ୍ଚତ୍ବା ପରେ ତାଙ୍କୁ ବିଭିନ୍ନ ମହଲରୁ ଛୁଟିଛି ଶୁଭେଚ୍ଛାର ସୁଅ।
ମଳୟଙ୍କ ଉଦ୍ୟମରେ ଗଠିତ ହୋଇଛି ଢେଙ୍କାନାଳ ବାଇକର୍ସ କ୍ଲବ। ଏଥିରେ ଯୋଡ଼ି ହୋଇଛନ୍ତି ବହୁ ଉତ୍ସାହୀ ଯୁବକ। ସଡ଼କ ସୁରକ୍ଷା, ସ୍ବଚ୍ଛ ଭାରତ ସମେତ ଅନ୍ୟ ସଚେତନଧର୍ମୀ ବାର୍ତ୍ତା ନେଇ ସେମାନେ ବାଇକ୍ରେ ଦେଶର ବିଭିନ୍ନ ସ୍ଥାନ ପରିକ୍ରମା କରୁଛନ୍ତି। ପର୍ଯ୍ୟଟନସ୍ଥଳୀ, ଭୌଗୋଳିକ ସ୍ଥିତି ବିଷୟରେ ଜ୍ଞାନ ଆହରଣ କରିବା ସହ ଅନ୍ୟକୁ ସଚେତନ କରାଉଛନ୍ତି। ଏହି କ୍ରମରେ ମଳୟଙ୍କ ଯାତ୍ରା ଆରମ୍ଭ ହୋଇଥିଲା ସେପ୍ଟେମ୍ବର ୨ରୁ। ସେ ଏକାକୀ ନିଜର ରୟାଲ ଏନ୍ଫିଲ୍ଡ ବାଇକ୍ରେ ଢେଙ୍କାନାଳରୁ ବାହାରିଥିଲେ। ବିହାରର ଔରଙ୍ଗାବାଦ, ଉତ୍ତରପ୍ରଦେଶର କରାବ, ପଞ୍ଜାବର ଚଣ୍ଡିଗଡ, ହିମାଞ୍ଚଳପ୍ରଦେଶର ମନାଲି, ଗନ୍ବୋରଞ୍ଜନ, ପୁରନେ, ଖାଲସି, ଲେହ, ନୁବରା, ପାନଗଙ୍ଗ୍, ଇଟାୱା, ଗାଜିପୁର, ଛତିଶଗଡ଼ର କାନ୍ସବେହଲ ଦେଇ ୧୯ ତାରିଖରେ ଯାତ୍ରା ଶେଷ କରିଛନ୍ତି। ଏଥିରେ କେବଳ ୨୧୧ ଲିଟର ପେଟ୍ରୋଲ ବାବଦକୁ ୨୧,୭୪୩ ଟଙ୍କା ଖର୍ଚ୍ଚ ହୋଇଛି। ଅଭିଜ୍ଞତା ସମ୍ପର୍କରେ ମଳୟ କୁହନ୍ତି, ଏହି ଦୁଃସାହସିକ ଯାତ୍ରା ସମୟରେ କଟକ ଅଞ୍ଚଳର ୨ଜଣ ଯୁବକ ଜିପ୍ରେ ଲଦାଖ ଅଞ୍ଚଳକୁ ଯାଇଥିଲେ। ଅପେକ୍ଷାକୃତ ଉଚ୍ଚ ସ୍ଥାନରେ ଅମ୍ଳଜାନସ୍ତର କମ୍ ଥିବାରୁ ଅସ୍ବାଭାବିକ ଲାଗିଥିଲା। ଲେହ, ଲଦାଖର ଜଳବାୟୁ ସହିତ ଖାପ ଖୁଆଇବା କଷ୍ଟକର ବ୍ୟାପାର। ମନରେ ଅଦମ୍ୟ ସାହସ ନେଇ ଏହି ଯାତ୍ରା କରିଥିଲେ, ଯାହା ସଫଳ ହୋଇଛି। ବିଭିନ୍ନ ସ୍ଥାନର ସଂସ୍କୃତି, ପରମ୍ପରା ସମ୍ପର୍କରେ ବହୁ ନୂଆ କଥା ଜାଣିବାକୁ ମିଳିଲା। ଉକ୍ତ ଅଞ୍ଚଳକୁ ପୁନର୍ବାର ବାଇକ୍ରେ ଯିବା ପାଇଁ ବାଇକର୍ସ କ୍ଲବର ସଦସ୍ୟଙ୍କୁ ଉତ୍ସାହିତ କରିବେ ବୋଲି ମଳୟ କହିଛନ୍ତି।
ସୂଚନାଯୋଗ୍ୟ, ମଳୟ ଜଣେ ସଫଳ ବ୍ୟାଡ୍ମିଣ୍ଟନ ଓ କ୍ରିକେଟ ଖେଳାଳି। ସେ ଜିଲା ବ୍ୟାଡ୍ମିଣ୍ଟନ ସଂଘର ସଭାପତି, କସ୍ମସ୍ କ୍ରିକେଟ କ୍ଲବର ବରିଷ୍ଠ ସଦସ୍ୟ ଏବଂ ଢେଙ୍କାନାଳ ବାଇକର୍ସ କ୍ଲବର ସଂଯୋଜକ ଅଛନ୍ତି।
