କଲମ୍ବୋ,୧୮।୭: ଶ୍ରୀଲଙ୍କା ବୋଲରଙ୍କ ଲାଇନ, ଲେନ୍ଥ ହଜାଇ ଦେଲା ପୃଥ୍ବ ଶ’ ଓ ଇଶାନ କିଷନଙ୍କ ବିସ୍ଫୋରକ ବ୍ୟାଟିଂ। ଘରୋଇ ଦଳ ପକ୍ଷରୁ ଧାର୍ଯ୍ୟ ୨୬୩ ରନ୍ର ବିଜୟ ଲକ୍ଷ୍ୟ ଟିମ୍ ଇଣ୍ଡିଆ ପାଇଁ କଦାପି ଚ୍ୟାଲେଞ୍ଜିଂ ସ୍କୋର ହୋଇପାରି ନ ଥିଲା। ମାତ୍ର ୩୬.୪ ଓଭରରେ ମ୍ୟାଚ୍ ଜିତିନେଇଛି ଭାରତ। ଏହି ବିଜୟ ସହ ଶିଖର ଧାଓ୍ବନଙ୍କ ନେତୃତ୍ୱଧୀନ ଭାରତ ୩ ମ୍ୟାଚ୍ ବିଶିଷ୍ଟ ସିରିଜ୍ରେ ୧-୦ର ଅଗ୍ରଣୀ ହାସଲ କରିଛି।
ଦୀର୍ଘ ଦିନ ପରେ ଏକାଠି ଖେଳୁଥିବା ୟୁଜବେନ୍ଦ୍ର ଚହଲ (୨) ଓ କୁଲଦୀପ ଯାଦବ (୨) ପୁଣି ଥରେ ପ୍ରତିପକ୍ଷ ଦଳ ପାଇଁ ମାରତ୍ମକ ସାବ୍ୟସ୍ତ ହୋଇଥିଲେ। ତାଙ୍କ ସହ ଦୀପକ ଚହର (୨) ଓ ପାଣ୍ଡ୍ୟା ବ୍ରଦର୍ସ (୧ ଲେଖାଏ)ଙ୍କ ଯୋଗୁ ୫୦ ଓଭରରେ ୯ ଉଇକେଟ ହରାଇ ୨୬୨ ରନ୍ କରିବାକୁ ସକ୍ଷମ ହୋଇଥିଲା ଶ୍ରୀଲଙ୍କା। ଚାମିକା କରୁଣାରତ୍ନେ (୪୩), ଅଧିନାୟକ ଦାସୁନ ଶାନାକା (୩୯), ଚରିଥ ଆସାଲାଙ୍କା (୩୮) ଓ ଅଭିଷ୍କା ଫର୍ନାଣ୍ଡୋ (୩୨) ଭଲ ଆରମ୍ଭ ପାଇଥିଲେ। କିନ୍ତୁ ବଡ଼ ସ୍କୋର କରିବାରେ ସଫଳ ହୋଇ ନ ଥିଲେ କେହି। ଜବାବରେ ଅଧିନାୟକ ଧାଓ୍ବନଙ୍କ ଅପରାଜିତ ୮୬ ରନ୍ ପାଳି ବଳରେ ଭାରତ ୧୨.୨ ଓଭର ପୂର୍ବରୁ ହାତରେ ୭ ଉଇକେଟ ରଖି ସହଜ ବିଜୟ ହାସଲ କରିଥିଲା। ପୃଥ୍ବୀ ଶ’ (୪୩ ରନ୍, ୯ ଚୌକା), ଇଶାନ କିଷନ (୫୯ ରନ୍, ୮ ଚୌକା ଓ ୨ ଛକା) ଓ ସୂର୍ଯ୍ୟକୁମାର ଯାଦବ (୩୧ ରନ୍, ୫ ଚୌକା) ଘରୋଇ ବୋଲରଙ୍କୁ ନାକେଦମ କରିଦେଇଥିଲେ।
