ଢାକା,୨୮।୧୦: ମହମ୍ମଦ ୟୁନୁସଙ୍କ ନେତୃତ୍ୱରେ ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାର ସୋମବାର ୟୁନୁସଙ୍କ ଦ୍ୱାରା ଭାରତର ଉତ୍ତର-ପୂର୍ବ ଅଞ୍ଚଳଗୁଡ଼ିକୁ ବାଂଲାଦେଶର ଅଂଶ ଭାବରେ ଦର୍ଶାଯାଇଥିବା ଏକ ମାନଚିତ୍ର ଜଣେ ପାକିସ୍ତାନୀ ସାମରିକ ଅଧିକାରୀଙ୍କୁ ପ୍ରଦାନ କରାଯାଇଥିବା ରିପୋର୍ଟ ସମ୍ପର୍କରେ ଏକ ସ୍ପଷ୍ଟୀକରଣ ଜାରି କରିଛନ୍ତି। ସରକାର ଏହି ରିପୋର୍ଟଗୁଡ଼ିକୁ ସମ୍ପୂର୍ଣ୍ଣ ମିଥ୍ୟା, ଭ୍ରାମକ ଏବଂ କପୋଳକଳ୍ପିତ ବୋଲି ବର୍ଣ୍ଣନା କରିଛନ୍ତି।
ସରକାରୀ ବିବୃତ୍ତି ଅନୁଯାୟୀ, ୟୁନୁସ ପାକିସ୍ତାନର ଜଏଣ୍ଟ ଚିଫ୍ସ ଅଫ ଷ୍ଟାଫ କମିଟିର ଅଧ୍ୟକ୍ଷ ଜେନେରାଲ ସାହିର ଶମଶାଦ ମିର୍ଜାଙ୍କୁ ‘ଦି ଆର୍ଟ ଅଫ ଟ୍ରାୟମ୍ଫ’ ଶୀର୍ଷକ ଏକ ପୁସ୍ତକ ପ୍ରଦାନ କରିଛନ୍ତି। ଏହି ପୁସ୍ତକ କୌଣସି ରାଜନୈତିକ କିମ୍ବା ଭୌଗୋଳିକ ଦଲିଲ ନୁହେଁ, ବରଂ ଜୁଲାଇ ବିପ୍ଳବ ସମୟରେ ଢାକା ଏବଂ ଅନ୍ୟାନ୍ୟ ସହରଗୁଡ଼ିକରେ ଛାତ୍ରମାନଙ୍କ ଦ୍ୱାରା ସୃଷ୍ଟି ହୋଇଥିବା ଗ୍ରାଫିଟି କଳାର ଏକ ସଂକଳନ। ପୁସ୍ତକଟି ରଙ୍ଗୀନ କଳାକୃତି ମାଧ୍ୟମରେ ବାଂଲାଦେଶର ଗୃହଯୁଦ୍ଧ, ସଂଘର୍ଷ ଏବଂ ସହିଦ ଛାତ୍ରମାନଙ୍କ ବଳିଦାନର ଏକ ଝଲକ ଉପସ୍ଥାପନ କରିଛି।
ବିବୃତ୍ତିରେ ସ୍ପଷ୍ଟ କରାଯାଇଛି ଯେ ପୁସ୍ତକର ପ୍ରଚ୍ଛଦପଟରେ ସହିଦ ଆବୁ ସୟିଦଙ୍କ ଫଟୋଗ୍ରାଫି ପଛରେ ଲାଲ ରଙ୍ଗରେ ବାଂଲାଦେଶର ଏକ କଳାତ୍ମକ ମାନଚିତ୍ର ଦର୍ଶାଯାଇଛି। ସରକାର କହିଛନ୍ତି ଯେ ଏହା କଳାତ୍ମକ ଗ୍ରାଫିଟି ଉପରେ ଆଧାରିତ ଏକ ମାନଚିତ୍ର ହୋଇଥିବାରୁ ଏହାର ସୀମାର ରୂପରେଖାରେ ସାମାନ୍ୟ ପରିବର୍ତ୍ତନ ସ୍ବାଭାବିକ। କିନ୍ତୁ ଏହି ମାନଚିତ୍ର ଭାରତର ଉତ୍ତର-ପୂର୍ବ ଅଞ୍ଚଳକୁ ବାଂଲାଦେଶର ଅଂଶ ଭାବରେ ଦର୍ଶାଉଛି ବୋଲି ଦାବି ସମ୍ପୂର୍ଣ୍ଣ ଭିତ୍ତିହୀନ ଏବଂ କାଳ୍ପନିକ।
ସରକାରୀ ବିବୃତ୍ତିରେ ଆହୁରି କୁହାଯାଇଛି ଯେ ଯେତେବେଳେ ପୁସ୍ତକରେ ଥିବା ମାନଚିତ୍ରକୁ ବାଂଲାଦେଶର ସରକାରୀ ଭୂମି ମାନଚିତ୍ର ସହିତ ତୁଳନା କରାଯାଇଥିଲା, ସେତେବେଳେ ଜଣାପଡିଥିଲା ଯେ ଦୁଇଟି ମଧ୍ୟରେ କୌଣସି ବଡ଼ ପାର୍ଥକ୍ୟ ନାହିଁ। ସରକାର ଜନସାଧାରଣଙ୍କୁ ମିଥ୍ୟା ଏବଂ ଭ୍ରାମକ ଖବରକୁ ବିଶ୍ୱାସ ନ କରିବାକୁ ନିବେଦନ କରିଛନ୍ତି, କାରଣ ଦେଶର ପ୍ରତିଛବିକୁ କ୍ଷତି ପହଞ୍ଚାଇବା ପାଇଁ ଏପରି ଗୁଜବ ପ୍ରସାର କରାଯାଉଛି।
ଏହି ବିବୃତ୍ତି ସହିତ, ସରକାର ଏହା ମଧ୍ୟ ସୂଚିତ କରିଛନ୍ତି ଯେ ଦେଶରେ ଶାନ୍ତି ଏବଂ ସୌହାର୍ଦ୍ଦ୍ୟର ବାତାବରଣ ବଜାୟ ରଖିବା ପାଇଁ ଏପରି ଭୁଲ ସୂଚନା ପ୍ରସାରଣକାରୀଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ।
Dharitri – The Largest & Most Trusted Odia Daily
