ଅମରପାଲି,୧୦।୧୧ (ପୀତାମ୍ବର ସାହୁ):ବୀରମହାରାଜପୁର ବ୍ଲକ ତେଲିପାଲି ୟୁପି ସ୍କୁଲ ୩ ଦିନ ଧରି ତାଲା ପଡ଼ିବା ପରେ ସୋମବାର ଖୋଲିଛି। ଜଣେ ନୂତନ ଶିକ୍ଷକ ନିଯୁକ୍ତି ସହ ଆସନ୍ତା ଏକ ମାସ ମଧ୍ୟରେ ଆଉ ଜଣେ ଶିକ୍ଷକଙ୍କୁ ନିଯୁକ୍ତି ଦେବାକୁ ଶିକ୍ଷା ବିଭାଗ ପ୍ରତିଶ୍ରୁତି ଦେବା ପରେ ଅଭିଭାବକ ଓ ଛାତ୍ରୀଛାତ୍ର ଧାରଣାରୁ ଓହରିଛନ୍ତି। ଫଳରେ ବିଦ୍ୟାଳୟରେ ପୁଣିଥରେ ପାଠପଢ଼ା ସ୍ବାଭାବିକ ହୋଇଛି। ଏ ସମ୍ପର୍କିତ ଖବର ଧରିତ୍ରୀରେ କ୍ରମାଗତ ଭାବେ ପ୍ରକାଶନ ଓ ଅଭିଭାବକଙ୍କ ଆନ୍ଦୋଳନ ପରେ ଶେଷରେ ଶିକ୍ଷା ବିଭାଗ ଚେତିଛି।
ସୂଚନା ଅନୁଯାୟୀ, ଏହି ବିଦ୍ୟାଳୟରେ ବାଲବାଟିକାଠାରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୯୪ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ମାତ୍ର ଶିକ୍ଷକ ଅଭାବ ଯୋଗୁ ଦୀର୍ଘଦିନ ଧରି ଶିକ୍ଷାଦାନ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଥିଲା। ବିଦ୍ୟାଳୟରେ ୨ ଶିକ୍ଷକ ଥିଲେ। ସେଥିମଧ୍ୟରୁ ପ୍ରଧାନଶିକ୍ଷକ ଦାୟିତ୍ୱରେ ରହିବାରୁ ଅନ୍ୟ ଜଣେ ଶିକ୍ଷକ ଦେଖାଦେଇଥିଲା। ଏ ନେଇ ସ୍କୁଲ ପରିଚାଳନା କମିଟି, ଅଭିଭାବକ ଓ ଗ୍ରାମବାସୀ ବାରମ୍ବାର ଶିକ୍ଷା ବିଭାଗ ନିକଟରେ ଦାବି ଜଣାଇଥିଲେ ମଧ୍ୟ କୌଣସି ସୁଫଳ ମିଳି ନ ଥିଲା। ଶେଷରେ ଗତ ଶୁକ୍ରବାର ଅଭିଭାବକ, ଛାତ୍ରୀଛାତ୍ର ବିଦ୍ୟାଳୟ ଫାଟକରେ ତାଲା ପକାଇ ଧାରଣାରେ ବସିଥିଲେ। ଶନିବାର ଦ୍ୱିତୀୟ ଦିନରେ ମଧ୍ୟ ଆନ୍ଦୋଳନ ଜାରି ରହିଥିଲା। ସୋମବାର ଏବିଇଓ ବାର୍ଣ୍ଣା ଡୁଙ୍ଗଡୁଙ୍ଗ ଓ କର୍ଡାପାଲ କ୍ଲଷ୍ଟର ସିଆର୍ସିସି ପ୍ରହଲ୍ଲାଦ ମୁଖୀ ବିଦ୍ୟାଳୟରେ ପହଞ୍ଚତ୍ ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲେ। ତୁରନ୍ତ ଜଣେ ଶିକ୍ଷକଙ୍କୁ ନିଯୁକ୍ତି ଦେବା ସହ ଆସନ୍ତା ଏକ ମାସ ମଧ୍ୟରେ ଆଉ ଜଣେ ଶିକ୍ଷକଙ୍କୁ ନିଯୁକ୍ତି ଦିଆଯିବ ବୋଲି ସେମାନେ ପ୍ରତିଶ୍ରୁତି ଦେଇଥିଲେ।