ଥୁଆମୂଳ ରାମପୁର, ୧୦।୩ (ଦୁର୍ଗା କୀର୍ତ୍ତି): ଗଣମାଧ୍ୟମର ଶକ୍ତି ଏବଂ ସାମାଜିକ ଦାୟିତ୍ୱବୋଧର ଆଉ ଏକ ବଡ଼ ଉଦାହରଣ ଦେଖିବାକୁ ମିଳିଛି। ’ଧରିତ୍ରୀ’ ସମେତ ବିଭିନ୍ନ ଦୈନିକ ଖବରକାଗଜରେ ଖବର ପ୍ରକାଶ ପାଇବା ପରେ ଶୋଇଥିବା ପ୍ରଶାସନର ନିଦ ଭାଙ୍ଗିଛି। ଥୁଆମୂଳ ରାମପୁର ସଦର ମହକୁମାର ଓ୍ବାର୍ଡ ମେମ୍ବର ଉଆଁସୀ ମାଝୀଙ୍କ ଦୟନୀୟ ଅବସ୍ଥା ବିଷୟରେ ଜାଣିବା ପରେ ବ୍ଲକ ପ୍ରଶାସନ ତତ୍ପରତା ପ୍ରକାଶ କରିଛି।
ଓ୍ବାର୍ଡ ମେମ୍ବର ଉଆଁସୀ ମାଝୀ ନିଜେ ଜଣେ ଜନପ୍ରତିନିଧି ହୋଇ ମଧ୍ୟ ଦୀର୍ଘ ଦିନ ଧରି ଏକ ଭଙ୍ଗା ମାଟି କୁଡ଼ିଆରେ ୧୧ ପ୍ରାଣୀ କୁଟୁମ୍ବଙ୍କ ସହ ଅତି କଷ୍ଟରେ ରହୁଥିଲେ। ଘର ଖଣ୍ଡିଏ ପାଇଁ ସେ ବାରମ୍ବାର ପ୍ରଶାସନ ନିକଟରେ ଗୁହାରି କରିଥିଲେ ସୁଦ୍ଧା କେହି କର୍ଣ୍ଣପାତ କରୁ ନ ଥିଲେ। ଏନେଇ ଖବର ପ୍ରସାରିତ ହେବା ପରେ ବିଡିଓ ଧ୍ରୁବ ଚରଣ ମୁଦୁଲିଙ୍କ ନିର୍ଦ୍ଦେଶକ୍ରମେ ସୋମବାର ଏକ ପ୍ରତିନିଧି ଦଳ ଉଆଁସୀଙ୍କ ଘରେ ପହଞ୍ଚିଥିଲେ।
ଆରଏଚ (RH) ବିଭାଗ ଅଧିକାରୀ ରାଜେନ୍ଦ୍ର ନାରାୟଣ ସିଂ ଦେବ ଏବଂ ବ୍ଲକ ସାମାଜିକ ସୁରକ୍ଷା ଅଧିକାରୀ ସୁନାରାମ ସୱରେନ ସ୍ଥଳ ପରିଦର୍ଶନ କରି ହିତାଧିକାରୀ ଚୟନ କରିଛନ୍ତି। ଉଆଁସୀଙ୍କ ବୋହୂ ମଞ୍ଜୁରୀ ମାଝୀଙ୍କ ନାମରେ ’ଅନ୍ତୋଦୟ ଗୃହ ଯୋଜନା’ ମାଧ୍ୟମରେ ଗୃହ ମଞ୍ଜୁର ହେବ। ପରିବାରର ମଝିଆ ପୁଅ ବ୍ରଜ ମାଝୀ ଓ ବୋହୂ ମଞ୍ଜୁରୀଙ୍କ ସମସ୍ତ ଆବଶ୍ୟକୀୟ କାଗଜପତ୍ର ସଂଗ୍ରହ କରାଯାଇ ଅନଲାଇନ ରେଜିଷ୍ଟ୍ରେଶନ ଶେଷ ହୋଇଛି। ଖୁବଶୀଘ୍ର ଓଟିପି (OTP) ପ୍ରକ୍ରିୟା ପରେ ଡିବିଟି (DBT) ମାଧ୍ୟମରେ ସିଧାସଳଖ ହିତାଧିକାରୀଙ୍କ ବ୍ୟାଙ୍କ ଖାତାକୁ ପ୍ରଥମ କିସ୍ତି ଟଙ୍କା ପଠାଇ ଦିଆଯିବ।
ଆରଏଚ ବିଭାଗ ଅଧିକାରୀ ରାଜେନ୍ଦ୍ର ନାରାୟଣ ସିଂ ଦେବଙ୍କ ମତରେ, ବ୍ଲକ ପ୍ରଶାସନ ସବୁବେଳେ ଜନସାଧାରଣଙ୍କ ସେବା ପାଇଁ ପ୍ରସ୍ତୁତ। ଉଆଁସୀ ମାଝୀଙ୍କ ପରିବାର ଯୋଗ୍ୟ ହୋଇଥିବାରୁ ଆମେ ତୁରନ୍ତ ତଥ୍ୟ ସଂଗ୍ରହ କରିଛୁ ଏବଂ ଅତି ଶୀଘ୍ର ସେମାନଙ୍କୁ ସରକାରୀ ସହାୟତା ପ୍ରଦାନ କରାଯିବ।”
ପ୍ରଶାସନର ଏହି ତ୍ୱରିତ କାର୍ଯ୍ୟାନୁଷ୍ଠାନ ପରେ ଉଆଁସୀଙ୍କ ପରିବାର ମଧ୍ୟରେ ଖୁସିର ଲହରୀ ଖେଳିଯାଇଛି। ଗରିବ ଲୋକଙ୍କ ସମସ୍ୟାକୁ ଲୋକଲୋଚନକୁ ଆଣିବାରେ ଗଣମାଧ୍ୟମର ଗୁରୁତ୍ୱପୂର୍ଣ୍ଣ ଭୂମିକାକୁ ଅଞ୍ଚଳବାସୀ ଉଚ୍ଚ ପ୍ରଶଂସା କରିଛନ୍ତି।
