ଉତ୍ତରପ୍ରଦେଶ ଲକ୍ଷ୍ନୌର ଚାରୁ ଖାରେ ନାମକ ଜଣେ ବ୍ୟକ୍ତି ପ୍ରାଣୀଙ୍କ ସେବାରେ ନିଜକୁ ଉତ୍ସର୍ଗ କରିଦେଇଛନ୍ତି। ଚାକିରିରୁ ସମୟ ବାହାର କରି ଅସହାୟ ପ୍ରାଣୀଙ୍କ ସୁରକ୍ଷାରେ ସେ ଲାଗିଛନ୍ତି। ମୁଖ୍ୟତଃ ମା’ଠାରୁ ଅଲଗା ହୋଇଯାଇଥିବା ମାଙ୍କଡ଼ ଛୁଆଙ୍କ ଯତ୍ନ ନେଉଛନ୍ତି। ସେ ମଧ୍ୟ ଅନ୍ୟ ପ୍ରାଣୀଙ୍କୁ ଉଦ୍ଧାର କରୁଛନ୍ତି। ଏହି କାର୍ଯ୍ୟ କରିବା ଲାଗି ତାଙ୍କ ନେତୃତ୍ୱରେ ସେ ଏକ ଏନ୍ଜିଓ ଗଠନ କରିଛନ୍ତି । ସେ ମଧ୍ୟ ଏକ ଟିମ୍ ଗଠନ କରିଛନ୍ତି ।
ଏହି ଟିମ୍ ପ୍ରାଣୀ ଉଦ୍ଧାର କାର୍ଯ୍ୟ ପରିଚାଳନା କରୁଛି। ମୋଟରେ ଏଯାବତ ଚାରୁ ଓ ତାଙ୍କ ଟିମ୍ ୫,୦୦୦ ପ୍ରାଣୀଙ୍କୁ ଉଦ୍ଧାର କରିସାରିଲେଣି। ସେମାନେ ପ୍ରାଣୀଙ୍କୁ ଉଦ୍ଧାର କରିବା ପରେ ସେମାନଙ୍କ ଚିକିତ୍ସା କରୁଛନ୍ତି, ଖାଇବାକୁ ଦେଉଛନ୍ତି ଓ ସୁସ୍ଥ ହେଲା ପରେ ଜଙ୍ଗଲରେ ଛାଡ଼ି ଦେଉଛନ୍ତି। ତେବେ ସେ ଉଦ୍ଧାର କରୁଥିବା ଅନେକ ପ୍ରାଣୀ ଚିକିତ୍ସା ପରେ ମଧ୍ୟ ପଙ୍ଗୁ ହୋଇଯାଉଛନ୍ତି । ତେଣୁ ଏମାନଙ୍କ ରହିବା ଲାଗି ଚାରୁ ଏକ ଆଶ୍ରୟସ୍ଥଳୀ ନିର୍ମାଣ କରିଛନ୍ତି। ଏବେ ସୁଦ୍ଧା ୭୦ କୁକୁର, ୨୫ ବିଲେଇ ଓ ୫ଟି ପକ୍ଷୀ ଆଶ୍ରୟସ୍ଥଳୀରେ ଅଛନ୍ତି। ଏହାବ୍ୟତୀତ ପକ୍ଷାଘାତରେ ପୀଡ଼ିତ ପ୍ରାଣୀଙ୍କ ପାଇଁ ଥେରାପି ବ୍ୟବସ୍ଥା ରହିଛି। ଏତେଗୁଡ଼ିକ କାର୍ଯ୍ୟ ପାଇଁ ଆବଶ୍ୟକ ହେଉଥିବା ଅର୍ଥ ବିଭିନ୍ନ ସଂସ୍ଥା ଓ ବ୍ୟକ୍ତିଙ୍କଠାରୁ ସେ ଦାନ ଆକାରରେ ଗ୍ରହଣ କରୁଛନ୍ତି। ସେହି ଅର୍ଥରେ ଚାରୁ ତାଙ୍କ ଉଦ୍ଧାର କାର୍ଯ୍ୟ ଆଗକୁ ବଢାଇପାରିଛନ୍ତି।
