ସୋନପୁର,୧୯।୧୧(ନି.ପ୍ର.): କ୍ଷେତରୁ ଧାନ ଅମଳ ଆରମ୍ଭ ହୋଇଗଲାଣି । ନଭେମ୍ବର ୩୦ ତାରିଖରୁ ସୁବର୍ଣ୍ଣପୁର ଜିଲାରେ ଖରିଫ୍ ଧାନ କିଣା ଆରମ୍ଭ ହେବ। ୬୩ଟି ପ୍ୟାକ୍ସ ଓ ୩୮ଟି ଏସ୍ଏଚ୍ଜି ଜରିଆରେ ଓଡିଶା ରାଜ୍ୟ ଖାଦ୍ୟ ଯୋଗାଣ ନିଗମ ଚାଷୀଙ୍କ ନିକଟରୁ ଧାନ କିଣିବ। ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକରେ ଏ ସମ୍ପର୍କରେ ଆଲୋଚନା ହୋଇଛି। ଅଧିକ ୫ଟି ଏସ୍ଏଚ୍ଜିଙ୍କୁ ଚଳିତ ଧାନ ସଂଗ୍ରହ ପ୍ରକ୍ରିୟାରେ ସାମିଲ କରିବାକୁ ମଧ୍ୟ ଯୋଜନା ଚାଲିଛି। ତେବେ ବିନା ଭିତ୍ତିଭୂମିରେ ଜିଲାରେ ଧାନ କିଣା ଯାଉଥିବା ନେଇ ଅଭିଯୋଗ ହେଉଛି। ଗୋଦାମ ଘର ନ ଥିବାରୁ ଧାନ କିଣା ସମୟରେ ବର୍ଷା ହେଲେ ଚାଷୀଙ୍କ ଧାନ ଓଦା ହେଉଛି। ମାତ୍ର ପ୍ରଶାସନର ଏଥିପ୍ରତି ଦୃଷ୍ଟି ନାହିଁ। ଭିତ୍ତିଭୂମି ନ ଥାଇ ଏସ୍ଏଚ୍ଏଜିଙ୍କୁ ଧାନ କିଣା ପ୍ରକ୍ରିୟାରେ ସାମିଲ କରାଯାଉଛି। ଚାଷୀ ଓ ଚାଷୀ ସଙ୍ଗଠନଗୁଡିକ ଏହାକୁ ବିରୋଧ କରୁଛନ୍ତି।
ଜିଲାରୁ ଖରିଫରେ ପ୍ରାୟ ୩୪ ଲକ୍ଷ କୁଇଣ୍ଟାଲ ଓ ରବିରେ ୨୫ ଲକ୍ଷ କୁଇଣ୍ଟାଲ ଧାନ ସରକାର କିଣୁଛନ୍ତି । ୩୮ଟି ଏସ୍ଏଚ୍ଜି ଜରିଆରେ ବାର୍ଷିକ ପ୍ରାୟ ୧୨ ଲକ୍ଷ କୁଇଣ୍ଟାଲ ଧାନ କିଣାଯାଉଛି। ଉଲୁଣ୍ଡା ବ୍ଲକରେ ସର୍ବାଧିକ ୧୩ଟି ଏସ୍ଏଚ୍ଜିଙ୍କୁ ଧାନ କିଣା ପ୍ରକ୍ରିୟାରେ ସାମିଲ କରାଯାଇଥିବା ବେଳେ ଡୁଙ୍ଗୁରିପାଲିରେ ୯ଟି, ବିନିକାରେ ୬ଟି, ବୀରମହାରାଜପୁରରେ ୫ଟି, ତରଭାରେ ୩ଟି ଓ ସୋନପୁର ବ୍ଲକରେ ୨ଟି ଏସ୍ଏଚ୍ଜି ଧାନ କିଣୁଛନ୍ତି। ତେବେ ଏସ୍ଏଚ୍ଜି କିଣୁ ଥିବା ୩୮ରୁ ୩୨ଟି ମଣ୍ଡିରେ ଆବଶ୍ୟକ ଭିତ୍ତିଭୂମି ଓ ଗୋଦାମ ଘର ନାହିଁ । ଉଲୁଣ୍ଡାରେ ୧୩ଟି ଏସ୍ଏଚ୍ଜି ଧାନ କିଣୁଥିବା ବେଳେ ୧୧ଟି ମଣ୍ଡିରେ ଆଦୌ ଭିତ୍ତିଭୂମି ନାହିଁ । ଖୋଲା ଆକାଶ ତଳେ ଅବା ରାସ୍ତା ଉପରେ ଧାନ କିଣାଯାଉଛି। ଧାନ କିଣାରେ ଲକ୍ଷାଧିକ ଟଙ୍କା କମିଶନ ମିଳୁଥିବା ବେଳେ ମଣ୍ଡି ବ୍ୟବସ୍ଥାର ବିକଳ ଚିତ୍ର ପ୍ରତିବର୍ଷ ଦେଖିବାକୁ ମିଳୁଛି। ଉଲୁଣ୍ଡା ବ୍ଲକର କେବଳ ମୁଣ୍ଡୋଘାଟ ଜିପିଏଲଏଫ ଧର୍ମଶାଳା ସ୍ଥିତ ଆରଏମସି ମାର୍କେଟ୍ ୟାର୍ଡ ଓ ଡାଲଡବା ଓଁ ସାଇ ଏସ୍ଏଚଜି ପୋଢଟିକିରା ସ୍ଥିତ ଆରଏମ୍ସି ମାର୍କେଟ୍ ୟାର୍ଡରେ ଧାନ କିଣୁଛି। ଡୁଙ୍ଗୁରିପାଲି ବ୍ଲକର ୯ଟି ମଣ୍ଡିରେ ଏସ୍ଏଚ୍ଜି ଧାନ କିଣୁଥିବା ବେଳେ ଦିଗଶିରା, ସାରସମାଲ ଓ ପଣ୍ଡକିଟାଲରେ ଆର୍ଏମ୍ସି ମାର୍କେଟ୍ ୟାର୍ଡରେ ଧାନ କିଣାଯାଉଛି। କିନ୍ତୁ ଭୀମଟିକିରା, ସରଗୁଲ, ନଙ୍ଗଳକଟା, କର୍ଲାଜୁରି, ଲିଙ୍ଗମାର୍ଣ୍ଣି, ଟାଙ୍ଗରକର୍ଲେ ଭଳି ମଣ୍ଡିରେ ଚାଷୀଙ୍କ ପାଇଁ ସର୍ବନିମ୍ନ ସୁବିଧା ନାହିଁ। ବିନିକା ବ୍ଲକର ପଲସାପାଲି, ଅଇଁଳାମୁଣ୍ଡା ଓ ମେଘଲା ଭଳି ମଣ୍ଡିରେ ଅସ୍ଥାୟୀ ଭାବେ ପଲିଥିନ ଢାଙ୍କି ଧାନ କିଣାଯାଉଛି। ସୋନପୁର ବ୍ଲକର ବଲାଡି ଓ ବାଲପୁର ମଣ୍ଡିରେ ଗୋଦାମ ଘର ନାହିଁ। ଭିତ୍ତିଭୂମି ନ ଥିବା ବେଳେ କେବଳ ସରକାରୀ ନିର୍ଦ୍ଦେଶ ଓ ଲୋକ ପ୍ରତିନିଧିଙ୍କ ସୁପାରିଶ କ୍ରମେ ଅଧିକାଂଶ ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ଧାନ କିଣା ପ୍ରକ୍ରିୟାରେ ସାମିଲ କରାଯାଇଛି। ମହିଳା ଗୋଷ୍ଠୀ ନାଁରେ କିଛି ବ୍ୟବସାୟୀ ମଣ୍ଡିରେ ଧାନ କିଣା ପରିଚାଳନା କରୁଥିବା ଅଭିଯୋଗ ହେଉଛି। ଅନ୍ୟପକ୍ଷେ ଅଢେଇ ବର୍ଷ ହେଲା ମହିଳା ଗୋଷ୍ଠୀଙ୍କୁ ଧାନ କିଣାରେ ନିୟୋଜିତ କରା ଯାଇଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ଭିତ୍ତିଭୂମିର ବ୍ୟବସ୍ଥା କରା ଯାଇନାହିଁ । ନିୟମ ଅନୁଯାୟୀ ଧାନ ରଖିବା ପାଇଁ ଗୋଦାମ ଘର, ଧାନ କିଣିବା ପାଇଁ ପକ୍କା ପିଣ୍ଡି, ଧାନର ମାନ ନିର୍ଦ୍ଧାରଣ ପାଇଁ ୨ଟି ଲେଖାଏଁ ମେସିନ, ରିପୋର୍ଟ ପ୍ରସ୍ତୁତ କରିବାପାଇଁ କମ୍ପ୍ୟୁଟର, ପ୍ରିଣ୍ଟର, ବିଦ୍ୟୁତିକରଣ, ଚାଷୀଙ୍କ ପାଇଁ ବିଶ୍ରାମ ଗୃହ, ପାନୀୟ ଜଳ ଓ ପରିଶ୍ରାଗାର ରହିବା କଥା । ମାତ୍ର ଅଧିକାଂଶ ମଣ୍ଡିରେ ଏହି ସବୁ ସୁବିଧା ନାହିଁ । ଏଭଳି ସ୍ଥିତିରେ ଜିଲାରେ ଧାନ କିଣା କିପରି ହେଉଥିବା ତାହା ସହଜରେ ଅନୁମେୟ । ପୂର୍ବରୁ କେବଳ ପ୍ୟାକ୍ସ ଦ୍ୱାରା ଧାନ କିଣା ଯାଉଥିବା ବେଳେ ମହିଳାଙ୍କୁ ଆତ୍ମନିର୍ଭରଶୀଳ କରିବା ପାଇଁ ସରକାର ଏସ୍ଏଚ୍ଜି ମାନଙ୍କୁ ଏହି ପ୍ରକ୍ରିୟାରେ ସାମିଲ ପାଇଁ ପରାମର୍ଶ ଦେଇଥିଲେ। କିନ୍ତୁ ଜିଲା ପ୍ରଶାସନର ଖାମଖିଆଲ ମନୋଭାବ ଯୋଗୁ ମଣ୍ଡିର ସୁବ୍ୟବସ୍ଥା ହୋଇପାରିନି। ପରୋକ୍ଷରେ କିଛି ଧାନ ବେପାରି ମଣ୍ଡି ମାଲିକ ସାଜିଥିବା ବେଳେ ଚାଷୀ ଶୋଷଣର ଶିକାର ହେଉଛନ୍ତି । ଚଳିତ ଥର ଧାନ ବିକ୍ରି କରିବା ପାଇଁ ଜିଲାର ୬୫ ହଜାର ୫୨୩ ଜଣ ଚାଷୀ ପଞ୍ଜୀକୃତ ହୋଇଛନ୍ତି। ତେଣୁ ପ୍ରଶାସନ ମଣ୍ଡି ଖୋଲିବା ପୂର୍ବରୁ ଭିତ୍ତିଭୂମି ଓ ଚାଷୀଙ୍କ ପାଇଁ ସର୍ବନିମ୍ନ ସୁବିଧା କରିବାକୁ ଦାବି ହେଉଛି।
