ଭଦ୍ରକ ଅଫିସ, ୨୦ା୧୦: ଧାମନଗର ଉପନିର୍ବାଚନ ପାଇଁ ନଭେମ୍ବର ୩ରେ ଭୋଟ ଗ୍ରହଣ ଥିବା ବେଳେ ଭୋଟ ଦେବା ଲାଗି ବୁଥ୍କୁ ଆସିବାକୁ ଅସମର୍ଥ ଥିବା ଦିବ୍ୟାଙ୍ଗ ଭୋଟରମାନଙ୍କ ପାଇଁ ଭାରତର ନିର୍ବାଚନ ଆୟୋଗ ଏବଂ ଓଡ଼ିଶାର ମୁଖ୍ୟ ନିର୍ବାଚନ ଅଧିକାରୀଙ୍କ ନିର୍ଦ୍ଦେଶ କ୍ରମେ ବାହନ ପାସ୍ ବ୍ୟବସ୍ଥା କରାଯାଇଛି। ପ୍ରଥମ ଥର ପାଇଁ ପ୍ରଚଳିତ ଏହି ବ୍ୟବସ୍ଥାରେ ମତଦାନ କେନ୍ଦ୍ରକୁ ଯିବା ଓ ଆସିବା ପାଇଁ ଧାମନଗର ବ୍ଲକ ପାଇଁ ୭୨ଟି ଓ ତିହିଡ଼ି ବ୍ଲକ ପାଇଁ ୨୬ଟିକୁ ମିଶାଇ ସମୁଦାୟ ୯୮ଟି ଅଟୋରିକ୍ସା ବ୍ୟବସ୍ଥା କରାଯାଇଛି। ମତଦାନ କେନ୍ଦ୍ରରେ ପହଞ୍ଚିବା ପରେ ମତଦାନ କକ୍ଷକୁ ଯିବାପାଇଁ ପ୍ରତି ବୁଥ୍ରେ ଗୋଟିଏ ଲେଖାଏ ହ୍ବିଲ୍ ଚେୟାର ଓ ଦୁଇଜଣ ସହାୟକ ଉପସ୍ଥିତ ରହିବାର ବ୍ୟବସ୍ଥା କରାଯାଇଛି। ସମୁଦାୟ ୨୫୨ଟି ବୁଥ୍ ପାଇଁ ୨୫୨ଟି ହ୍ବିଲ ଚେୟାର ପ୍ରସ୍ତୁତ ଥିଲା ବେଳେ ୫୦୪ଜଣ ସ୍ବେଚ୍ଛାସେବୀ ନିୟୋଜିତ ରହିବେ। ସ୍କାଉଟ୍, ଗାଇଡ଼୍ ଓ ଏନ୍ସିସି ବିଦ୍ୟାର୍ଥୀମାନଙ୍କୁ ଏହି ସ୍ବେଚ୍ଛାସେବୀ ଦାୟିତ୍ୱ ନିର୍ବାହ ପାଇଁ ଚିହ୍ନଟ କରାଯିବ। ସୂଚନାଯୋଗ୍ୟ ଯେ. ଏହି ଉପନିର୍ବାଚନ ପାଇଁ ପ୍ରକାଶିତ ଭୋଟର ତାଲିକା ଅନୁଯାୟୀ ୪୦ ପ୍ରତିଶତରୁ ଊର୍ଦ୍ଧ୍ୱ ପ୍ରମାଣପତ୍ର ପାଇଥିବା ୪୮୭୧ ଜଣ ଭୋଟରଙ୍କ ନାମ ଭୋଟର ତାଲିକାରେ ଅଛି ା
