ଛତ୍ରପୁର, ୧।୮ (ଦିଲ୍ଲୀପ ସାମଲ/ଦ୍ୱାରକା ପଟ୍ଟନାୟକ): ଛତ୍ରପୁର ସହରର ଆରାଧ୍ୟ ଦେବୀ ମା’ ରାମାୟଣାମ୍ମା ଠାକୁରାଣୀ ଯାତ୍ରା କମିଟି ପକ୍ଷରୁ ମନ୍ଦିର ପରିଚାଳନା କମିଟି ଓ ବହୁ ମାନ୍ୟଗଣ୍ୟ ବ୍ୟକ୍ତିଙ୍କୁ ନେଇ ଏକ ସ୍ୱତନ୍ତ୍ର ବୈଠକ ମନ୍ଦିର ପରିସରରେ ଅନୁଷ୍ଠିତ ହୋଇଯାଇଛି। ପରିଚାଳନା କମିଟିର ସଭାପତି ଏସ୍. ରାମମୋହନ ରାଓ ଓ ସମ୍ପାଦକ ବି. ଶ୍ରୀନିବାସଙ୍କ ସଂଯୋଜନାରେ ଆୟୋଜିତ ଏହି ବୈଠକରେ ମନ୍ଦିରର ବିଭିନ୍ନ ଉନ୍ନୟନମୂଳକ କାର୍ଯ୍ୟ ସହ ଚଳିତ ବର୍ଷର ଠାକୁରାଣୀ ଯାତ୍ରାର ସଫଳ ଆୟୋଜନ ଉପରେ ବିସ୍ତୃତ ଆଲୋଚନା ହୋଇଥିଲା।
ଯାତ୍ରା କମିଟିର ପରିଚାଳକ ସିଏଚ୍. ଦୟାନନ୍ଦ ରେଡ୍ଡୀ, ସହକାରୀ ପରିଚାଳକ ଏମ୍. ସମରେନ୍ଦ୍ର ସେନାପତି, ସମ୍ପାଦକ ପି. ରାଜୁ, ସିଏଚ୍. ଚିନ୍ନାବାବୁ, ଏମ୍. ଶ୍ରୀନିବାସ, ଦିଲ୍ଲୀପ କୁମାର ପାଳ ଓ ଅନ୍ୟାନ୍ୟ ସଦସ୍ୟମାନେ ଉପସ୍ଥିତ ରହି ଚଳିତ ବର୍ଷର ଠାକୁରାଣୀ ଯାତ୍ରା ଶାନ୍ତି, ଶୃଙ୍ଖଳା ଓ ଭବ୍ୟତାର ସହିତ ସମ୍ପନ୍ନ ହୋଇଥିବାରୁ ମନ୍ଦିର ପରିଚାଳନା କମିଟି, ଛତ୍ରପୁର ଓ ଆଖପାଖ ଅଞ୍ଚଳର ଜନସାଧାରଣ, ଶ୍ରଦ୍ଧାଳୁ, ପୋଲିସ ପ୍ରଶାସନ, ଛତ୍ରପୁର ବିଧାୟକ, ଜନପ୍ରତିନିଧି ଏବଂ ଗଣମାଧ୍ୟମ ପ୍ରତିନିଧିମାନଙ୍କୁ କୃତଜ୍ଞତା ଜଣାଇଥିଲେ।
ଏହି ଅବସରରେ ଯାତ୍ରା କମିଟିର ପରିଚାଳକ ସିଏଚ୍. ଦୟାନନ୍ଦ ରେଡ୍ଡୀ ମା’ ରାମାୟଣାମ୍ମା ମନ୍ଦିର ପରିଚାଳନା କମିଟିକୁ ୨ ଲକ୍ଷ ୫୪ ହଜାର ଟଙ୍କା ସହ ଏକ ଶୀତତାପ ନିୟନ୍ତ୍ରଣ ଯନ୍ତ୍ର (ଏସି) ପ୍ରଦାନ କରିଥିଲେ। ସେହିପରି ନୀଳକଣ୍ଠେଶ୍ୱର ମନ୍ଦିର ପରିଚାଳନା କମିଟିକୁ ମଧ୍ୟ ୧୦ ହଜାର ଟଙ୍କା ଅନୁଦାନ ପ୍ରଦାନ କରାଯାଇଥିଲା।
ଏହି ମହତ୍ କାର୍ଯ୍ୟ ପାଇଁ ଯାତ୍ରା କମିଟିର ପରିଚାଳକ ଏବଂ ସମସ୍ତ ସଦସ୍ୟଙ୍କୁ ଉପସ୍ଥିତ ଅତିଥି ଓ ସଦସ୍ୟମାନେ ପ୍ରଶଂସା କରିବା ସହ ଶୁଭେଚ୍ଛା ଜଣାଇଥିଲେ।ବୈଠକରେ ମନ୍ଦିର ପରିଚାଳନା କମିଟିର କୋଷାଧ୍ୟକ୍ଷ ଏନ୍. ପ୍ରଭାକର ରାଓ, ଉପଦେଷ୍ଟା ଏ. ରାବଣା ରାଓ, ରବୀନ୍ଦ୍ର ନାଥ ସାହୁ, ଏମ୍. ସତ୍ୟନାରାୟଣ, ଲିଙ୍ଗରାଜ ରେଡ୍ଡୀ, ଏସ୍. ଦାଲେୟା ରେଡ୍ଡୀ, କେ. ରାମବାବୁ, ଏସ୍. ରମେଶ ରେଡ୍ଡୀ, ବୁଲୁ ରେଡ୍ଡୀଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ। ଶେଷରେ ଯାତ୍ରା କମିଟିର ସମ୍ପାଦକ ବି. ଶ୍ରୀନିବାସ ସମସ୍ତଙ୍କୁ ଧନ୍ୟବାଦ ଜଣାଇ ବୈଠକର ସମାପ୍ତି ଘୋଷଣା କରିଥିଲେ।
