ପୁରୀ ଅଫିସ,୫।୮: ଦେଶର ପ୍ରମୁଖ ମନ୍ଦିର ମଧ୍ୟରୁ ଶ୍ରୀମନ୍ଦିର ଅନ୍ୟତମ। ଏଠାକୁ ପ୍ରତ୍ୟହ ରାଜ୍ୟ ତଥା ଦେଶର ବିଭିନ୍ନ ସ୍ଥାନରୁ ଶ୍ରଦ୍ଧାଳୁ ଆସିଥାନ୍ତି। ସାଧାରଣ ଦିନଗୁଡ଼ିକରେ ପ୍ରାୟ ୬୦ରୁ ୭୦ ହଜାର ଦର୍ଶନାର୍ଥୀ ଆସୁଥିବାବେଳେ ଛୁଟି ତଥା ବିଭିନ୍ନ ପର୍ବପର୍ବାଣିରେ ଏହି ସଂଖ୍ୟା ଲକ୍ଷେ ଟିପିଯାଇଥାଏ। ମହାପ୍ରଭୁଙ୍କ ପ୍ରତି ଥିବା ଆସ୍ଥା ଓ ବିଶ୍ୱାସକୁ ନେଇ କାହିଁ କେତେଦୂରରୁ ଶ୍ରଦ୍ଧାଳୁ ଛୁଟିଆସନ୍ତି ଶ୍ରୀକ୍ଷେତ୍ର। ହେଲେ ମହାମାରୀ କରୋନା ଏଥିରେ ପ୍ରତିବନ୍ଧକ ସାଜିଛି। କିଛିଦିନ କି କିଛି ମାସ ନୁହେଁ, ସାଢେ ୪ ମାସରୁ ଊର୍ଦ୍ଧ୍ୱ ହେବ ଭକ୍ତଙ୍କୁ ମନ୍ଦିର ପ୍ରବେଶ ବାରଣ କରାଯାଇଛି। ଏପରି କି ରଥଯାତ୍ରାରେ ବି ଭକ୍ତଙ୍କୁ ପ୍ରତ୍ୟକ୍ଷ ଦର୍ଶନ ସୁଯୋଗ ଦିଆଗଲା ନାହିଁ। ଏତେଦିନ ଧରି ମହାପ୍ରଭୁଙ୍କ ଦର୍ଶନରୁ ବଞ୍ଚତ୍ତ ରହି ଭକ୍ତ ଓ ଶ୍ରଦ୍ଧାଳୁଙ୍କ ଧୈର୍ଯ୍ୟ ଭାଙ୍ଗିଲାଣି। ମହାପ୍ରଭୁଙ୍କ ଦର୍ଶନ ପାଇଁ ମନ ବ୍ୟଥିତ ହେଲାଣି। ତେଣୁ ଯଥାଶୀଘ୍ର ମହାପ୍ରଭୁଙ୍କ ଦର୍ଶନ ସୁଯୋଗ ଦେବା ସହ ରାଜ୍ୟର ଅନ୍ୟ ଧର୍ମୀୟପୀଠ ଖୋଲିବାକୁ ଅନୁମତି ଦେବାକୁ ପୁରୀର ତ୍ରିଲୋଚନ ରଥ ହାଇକୋର୍ଟରେ ଏକ ଜନସ୍ବାର୍ଥ ମାମଲା କରିଛନ୍ତି।
ସେ ଦର୍ଶାଇଛନ୍ତି ଯେ, କେନ୍ଦ୍ର ସରକାର ଅନ୍ଲକ୍-୧ରେ ଧର୍ମାନୁଷ୍ଠାନ ଖୋଲିବା ପାଇଁ ନିଷ୍ପତ୍ତି ନେଇଥିଲେ। ଇତିମଧ୍ୟରେ ଅନ୍ଲକ୍-୩ରେ ପ୍ରାୟ ଅନେକ ଅନୁଷ୍ଠାନ ଖୋଲିଗଲାଣି। ମଦ ଦୋକାନ, ମଲ୍, ଜିମ୍, ଯୋଗକେନ୍ଦ୍ର ଆଦି ଖୋଲିପାରୁ ଥିବାବେଳେ ମନ୍ଦିର ଖୋଲିବାରେ ଅସୁବିଧା କେଉଁଠି ବୋଲି ଆବେଦନକାରୀ ପ୍ରଶ୍ନ କରିଛନ୍ତି। ହାଇକୋର୍ଟରେ ଜନସ୍ବାର୍ଥ ମାମଲା ପରେ ଶ୍ରୀମନ୍ଦିର ଖୋଲିବା ନେଇ ଆରମ୍ଭ ହୋଇଯାଇଛି ଚର୍ଚ୍ଚା। ଭକ୍ତ ଦିଲୀପ ବରାଳ କହିଛନ୍ତି, ତାଙ୍କ ଭଳି ପ୍ରତ୍ୟହ ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରୁଥିବା ଦର୍ଶନାର୍ଥୀ ଧୈର୍ଯ୍ୟ ହରାଇଲେଣି। କେତେଦିନ ଆଉ ଅପେକ୍ଷା କରିବେ। ମନ ବ୍ୟଥିତ ହେଲାଣି। କୋଭିଡ୍ ଗାଇଡ୍ଲାଇନ ପାଳନ କରି କିପରି ମହାପ୍ରଭୁଙ୍କୁ ଦର୍ଶନ କରିହେବ ସେହି ବ୍ୟବସ୍ଥା କରାଯିବା ଦରକାର। ଏଥିପାଇଁ ସରକାର ପଦକ୍ଷେପ ନିଅନ୍ତୁ।
ଏ ସମ୍ପର୍କରେ ଶ୍ରୀମନ୍ଦିର ସେବାୟତ ବିନାୟକ ଦାସମହାପାତ୍ର କହିଛନ୍ତି, ସାଢେ ୪ ମାସରୁ ଊର୍ଦ୍ଧ୍ୱ ହେଲାଣି ଦର୍ଶନ ବନ୍ଦ ରହିଛି। ଏହାଦ୍ୱାରା ଭକ୍ତଙ୍କ ମନରେ ଅସନ୍ତୋଷ ବୃଦ୍ଧିପାଇଥିବା ବେଳେ ସେବାୟତ ପରିବାରର ଆର୍ଥିକ ସ୍ଥିତି ବି ଦୋହଲି ଗଲାଣି। ତଥାପି ଜୀବନ ଓ ଜୀବିକା ଦୁଇଟିକୁ କିପରି ସମାନ୍ତରାଳ ଭାବେ ସୁରକ୍ଷା ଦେଇହେବ ସେ ନେଇ ରାଜ୍ୟ ସରକାର ବ୍ୟବସ୍ଥା କରିବା ଦରକାର। କୋଭିଡ୍ ଗାଇଡ୍ଲାଇନ ପାଳନ ସହ ଭକ୍ତମାନେ ମହାପ୍ରଭୁଙ୍କୁ ଯେପରି ଦର୍ଶନ କରିପାରିବେ ସେ ବ୍ୟବସ୍ଥା ହେବା ଉଚିତ। ସମସ୍ତେ ମାସ୍କ ପରିଧାନ, ସାମାଜିକ ଦୂରତ୍ୱ ରକ୍ଷା, ମନ୍ଦିର ପ୍ରବେଶ ପୂର୍ବରୁ ହାତ ସାଇଟାଇଜ୍, ମନ୍ଦିର ପରିସରରେ କୌଣସି ସ୍ଥାନକୁ ସ୍ପର୍ଶ ନ କରିବା ଏମିତି ଏକାଧିକ କଟକଣା କରାଯାଇ ଯଦି ଦର୍ଶନ ସୁଯୋଗ ମିଳେ ତେବେ ଭାବୁଛି କିଛି ସମସ୍ୟା ହେବ ନାହିଁ। ଆଉ ଗୋଟେ କଥା, ଏବେ ପୁରୀରେ ସଂକ୍ରମିତଙ୍କ ସଂଖ୍ୟା ବି ବଢୁଛି। ତେଣୁ ସବୁ ଦିଗକୁ ବିଚାର କରି ନିଷ୍ପତ୍ତି ନେବା ଶ୍ରେୟସ୍କର ବୋଲି ଦାସମହାପାତ୍ର କହିଛନ୍ତି।
