ହାଇଦ୍ରାବାଦ/ନୂଆଦିଲ୍ଲୀ,୧୯ା୩: ଇଣ୍ଡିଆ ବ୍ଲକ୍ର ଇସ୍ତାହାର କେବଳ ‘ଶକ୍ତି’କୁ ଶେଷ କରିଦେବା ଉପରେ ଗୁରୁତ୍ୱ ଦେଉଛି। ଏହି ଲଢ଼େଇ ଦୁଇଟି ପକ୍ଷ ମଧ୍ୟରେ ଚାଲିଛି। ଗୋଟିଏ ପକ୍ଷ ‘ଶକ୍ତି’କୁ ଧ୍ୱଂସ କରିଦେବାକୁ ଚାହୁଁଥିବାବେଳେ ଅନ୍ୟ ପକ୍ଷ ଶକ୍ତିକୁ ‘ଦୈବୀଶକ୍ତି’ ବିବେଚନା କରି ପୂଜା କରୁଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତେଲଙ୍ଗାନାର ଜଗତିଆଲରେ ବିରୋଧୀ କଂଗ୍ରେସକୁ ଟାର୍ଗେଟ କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି, ରବିବାର ମୁମ୍ବାଇର ଶିବାଜୀ ପାର୍କରେ ଇଣ୍ଡି ମେଣ୍ଟର ରାଲି ବେଳେ ବିରୋଧୀ ନିଜ ଇସ୍ତାହାର ଘୋଷଣା କରିଥିଲେ। ସେମାନେ କହିଥିଲେ, ସେମାନଙ୍କ ଲଢ଼େଇ ହେଉଛି ‘ଶକ୍ତି’ ବିରୋଧରେ। କିନ୍ତୁ ମୁଁ ଭାରତ ମାତାର ପୂଜାରୀ। ମୁଁ ଭାରତର ପ୍ରତ୍ୟେକ ମା’ ଓ ଝିଅଙ୍କୁ ପୂଜା କରିଥାଏ। ଦେଶ ‘ଚନ୍ଦ୍ରୟାନ’ ସଫଳତାର ଶ୍ରେୟ ‘ଶିବଶକ୍ତି’କୁ ଦେଇଥିବାବେଳେ ବିରୋଧୀ ଦଳଗୁଡ଼ିକ ‘ଶକ୍ତି’ର ବିନାଶ ଚାହୁଁଛନ୍ତି। ଏହି ଚ୍ୟାଲେଞ୍ଜକୁ ମୁଁ ଗ୍ରହଣ କରୁଛି। ଦେଶମାତୃକାର ସୁରକ୍ଷା ପାଇଁ ମୁଁ ନିଜ ଜୀବନକୁ ତ୍ୟାଗ କରିବାକୁ ପ୍ରସ୍ତୁତ ବୋଲି ମୋଦି କହିଥିଲେ। ପ୍ରଧାନମନ୍ତ୍ରୀ ଆହୁରି କହିଥିଲେ, କଂଗ୍ରେସ ତେଲଙ୍ଗାନାକୁ ଏଟିଏମ୍ ରାଜ୍ୟରେ ପରିଣତ କରିଦେଇଛି। ଏଠାରୁ ଲୁଟ୍ ହୋଇଥିବା ଟଙ୍କା ଦିଲ୍ଲୀକୁ ଯାଉଛି।
ଯେ, ମୁମ୍ବାଇରେ ଭାରତ ଯୋଡ଼ୋ ନ୍ୟାୟ ଯାତ୍ରାର ସମାପନ ରାଲିରେ ରାହୁଲ କହିଥିଲେ, ରାଜାଙ୍କ ଆମତ୍ା ଇଭିଏମ୍ରେ ରହିଛି। ଇଭିଏମ୍, ଇଡି, ସିବିଆଇ ଏବଂ ଆୟ କର ବିଭାଗ ବିନା ପ୍ରଧାନମନ୍ତ୍ରୀ ଏହି ଲୋକ ସଭା ନିର୍ବାଚନ ଜିତିପାରିବେ ନାହିଁ। ମୋଦି ହେଉଛନ୍ତି ଜଣେ ‘ମାସ୍କ’, ଯିଏକି ଏକ ‘ଶକ୍ତି’ ପାଇଁ କାର୍ଯ୍ୟ କରୁଛନ୍ତି। ସେ ଜଣେ ଉପରଠାଉରିଆ ବ୍ୟକ୍ତି। ତାଙ୍କର ୫୬ ଇଞ୍ଚ୍ ଛାତି ନାହିଁ। ଅନ୍ୟପକ୍ଷେ ପ୍ରଧାନମନ୍ତ୍ରୀ ଏହି ପ୍ରସଙ୍ଗରେ ଘେରିବା ପରେ ରାହୁଲ ସଫେଇ ଦେଇ କହିଛନ୍ତି, ସେ କୌଣସି ‘ଦୈବୀଶକ୍ତି’ କଥା ଉଲ୍ଲେଖ କରିନାହାନ୍ତି। ମୋଦି ଯେଉଁ ଶକ୍ତିର ମୁଖାବରଣ ପିନ୍ଧିଛନ୍ତି, ତା’ ଉପରେ ସେ କହିଥିଲେ। ମୋଦି ତାଙ୍କ କଥାକୁ ପସନ୍ଦ କରନ୍ତି ନାହିଁ। ତେଣୁ ତାକୁ ମୋଡ଼ିତୋଡ଼ି ଉପସ୍ଥାପନ କରୁଛନ୍ତି। ପ୍ରଧାନମନ୍ତ୍ରୀ ସେହି ଶକ୍ତିକୁ ବ୍ୟବହାର କରି ଭାରତୀୟ ବ୍ୟାଙ୍କଗୁଡ଼ିକର ଅନେକ କୋଟି ଟଙ୍କାର ଋଣ ଛାଡ଼ କରିଛନ୍ତି, ଯେତେବେଳେ କି ଅଳ୍ପ କିଛି ହଜାର ଟଙ୍କାର ଋଣ ଶୁଝି ନ ପାରି ଚାଷୀମାନେ ଆମତ୍ହତ୍ୟା କରୁଛନ୍ତି। ତେଣୁ ଦେଶକୁ ‘ଅସୁର ଶକ୍ତି’ ନା ‘ଦୈବୀଶକ୍ତି’ ଶାସନ କରିବ, ତାହା ଏହି ନିର୍ବାଚନ ସ୍ଥିର କରିବ ବୋଲି ପ୍ରଧାନମନ୍ତ୍ରୀଙ୍କୁ ରାହୁଲ ପାଲଟା ଜବାବ ଦେଇଛନ୍ତି।
