ଭଞ୍ଜନଗର,୨୫ା୯(ବାବୁଲା ପ୍ରଧାନ):ସାମାଜିକ ସୁରକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଭଞ୍ଜନଗର ବ୍ଲକ କୁଲାଡ଼ ପଞ୍ଚାୟତ ଜାତୀୟସ୍ତରରେ ଦ୍ୱିତୀୟ ଶ୍ରେଷ୍ଠ ପଞ୍ଚାୟତ ଭାବେ ପୁରସ୍କୃତ ହୋଇଥିଲା। ପଞ୍ଚାୟତକୁ ୭୫ଲକ୍ଷ ଟଙ୍କା ପୁରସ୍କାର ରାଶି ମିଳିଥିଲା। ଏହାପରେ ରାଜ୍ୟ ସରକାର ମଧ୍ୟ ପୁରସ୍କାର ସହ ପଞ୍ଚାୟତକୁ ୨ କୋଟିରୁ ଉର୍ଦ୍ଧ୍ୱ ଟଙ୍କା ପ୍ରୋତ୍ସାହନ ରାଶି ଭାବେ ଦେଇଥିଲେ। ପୁରସ୍କାର ମିଳିବା ପରେ ପ୍ରାୟ ୫ମାସ ହେବ ପଞ୍ଚାୟତରେ ଉନ୍ନୟନ କାର୍ଯ୍ୟ ଧିମେଇ ଯାଇଛି । କେବଳ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା(ଏମଜିଏନ୍ଆର୍ଇଜିଏସ୍)ରେ ଯାହା କିଛି କାମ ହେଉଛି । ପୁରସ୍କାର ରାଶି ସହ ପଞ୍ଚାୟତ ଫଣ୍ଡ, ଜିଲା ପରିଷଦ ଫଣ୍ଡ ସମେତ ବିଭିନ୍ନ ଅନୁଦାନ ମିଶି ପ୍ରାୟ ୪ କୋଟି ଟଙ୍କା ଥିଲେ ମଧ୍ୟ ବିନିଯୋଗ ହୋଇପାରୁନାହିଁ । ପଞ୍ଚାୟତ ପ୍ରତିନିଧିମାନେ ଉକ୍ତ ଅର୍ଥକୁ ବିନିଯୋଗ ଉପରେ ସେଭଳି ଗୁରୁତ୍ୱ ଦେଉନଥିବା କେତେଜଣ ଗ୍ରାମବାସୀ ପ୍ରକାଶ କରିଛନ୍ତି ।
୨୦୨୨-୨୦୨୩ ଆର୍ଥିକ ବର୍ଷରେ କୁଲାଡ଼ ଜଗନ୍ନାଥ ମନ୍ଦିରକୁ ଲାଗିଥିବା ପୋଖରୀର ପଙ୍କ ଉଦ୍ଧାର ସମେତ ଗାର୍ଡ଼ ୱାଲ୍ ନିର୍ମାଣ ପାଇଁ ୨୮ଲକ୍ଷରୁ ଉର୍ଦ୍ଧ୍ୱ ଟଙ୍କା ବ୍ୟୟ ହୋଇଥିଲା। ବର୍ତ୍ତମାନ ପୋଖରୀଟି ପୁଣି ଲଟାବୁଦାରେ ଭର୍ତ୍ତି ହୋଇଗଲାଣି । ପୁରସ୍କାର ରାଶିରୁ ୫୦ ଲକ୍ଷ ପୋଖରୀର ସୌନ୍ଦର୍ଯ୍ୟକରଣ ପାଇଁ ରଖାଯାଇଛି । ପୋଖରୀ ଆଡିରେ ଓପନ ଜିମ, ୧୦୦ ମିଟର ଉଚ୍ଚତାରେ ଜାତୀୟ ପତାକା ଉଡାଇବା, କବିସମ୍ରାଟ ଉପେନ୍ଦ୍ର ଭଞ୍ଜଙ୍କ ଏକ ବିରାଟ ପ୍ରତିମୂର୍ତ୍ତି ନିର୍ମାଣ ପାଇଁ ଯୋଜନା ଅଛି । ହେଲେ ଏ ଯାଏ କାମ ଆରମ୍ଭ ହେଉନାହିଁ। ବଳକା ଗଚ୍ଛିତ ଅର୍ଥରେ ଅନ୍ୟାନ୍ୟ ଉନ୍ନୟନ କାର୍ଯ୍ୟ କରିବା ଯୋଜନା ଅଛି । ବଡ଼ ପ୍ରକଳ୍ପ ଗୁଡ଼ିକୁ ଛାଡ଼ି ଇତିମଧ୍ୟରେ କମ୍ ଅର୍ଥରେ ହେବାକୁ ଥିବା କିଛି ପ୍ରକଳ୍ପ କାର୍ଯ୍ୟ ଆରମ୍ଭ ହୋଇଥିଲେ ବି ତାହା ମନ୍ଥର ଗତିରେ ଚାଲିଛି । ବିଶ୍ୱ ପ୍ରସିଦ୍ଧ କବିସମ୍ରାଟ ଉପେନ୍ଦ୍ର ଭଞ୍ଜଙ୍କ ଜନ୍ମ ମାଟି ହେଉଛି କୁଲାଡ଼। ଏଠାରେ ଭଞ୍ଜ ରାଜାଙ୍କ ଶାସନ ସମୟରେ ସ୍ଥାପିତ ଜଗନ୍ନାଥ ମନ୍ଦିର, ବ୍ୟାଘ୍ରଦେବୀ ମନ୍ଦିର, ନାରାୟଣ ମନ୍ଦିର ଥିବାରୁୁ ଦୈନନ୍ଦିନ ବିଭିନ୍ନ ଅଞ୍ଚଳରୁ ଶହ ଶହ ପର୍ଯ୍ୟଟକ ଆସୁଛନ୍ତି। ୫-ଟି ସଚିବ ଭି.କେ ପାଣ୍ଡିୟାନ ଗତ ୨୬ ତାରିଖରେ ଭଞ୍ଜନଗର ଗସ୍ତରେ ଆସିଥିବା ବେଳେ କୁଲାଡ଼ରେ ଥିବା ବିଭିନ୍ନ ମନ୍ଦିରର ଉନ୍ନତୀକରଣ ପାଇଁ ଅର୍ଥ ଦିଆଯିବ ବୋଲି ଘୋଷଣା କରିଥିଲେ। ଏ ବାବଦରେ ପ୍ରାୟ ୨ କୋଟିରୁ ଉଦ୍ଧ୍ୱର୍ର୍ ଟଙ୍କା କିଛିଦିନ ମଧ୍ୟରେ ଆସିବ। କୁଲାଡ଼ ଭଳି ପର୍ଯ୍ୟଟନସ୍ଥଳୀର ବିକାଶ ପାଇଁ ସ୍ଥାନୀୟ ବିଧାୟକ ତଥା ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ ଗୁରୁତ୍ୱ ଦେଉଛନ୍ତି। ହେଲେ ପଞ୍ଚାୟତ ପ୍ରତିନିଧିମାନେ ଉକ୍ତ ଅନୁଦାନ ଗୁଡ଼ିକୁ ନିର୍ଦ୍ଧାରିତ ସମୟରେ ଖର୍ଚ୍ଚ କରିପାରୁନାହାନ୍ତି। ଫଳରେ ନୂଆ ଅନୁଦାନ ଆସିପାରୁନାହିଁ। ଏନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ ଦୃଷ୍ଟିଦେଇ ଆବଶ୍ୟକ ପଦକ୍ଷେପ ନେବାପାଇଁ ସାଧାରଣରେ ଦାବି ହୋଇଛି । ଅନ୍ୟପଟେ ପଞ୍ଚାୟତଗୁଡ଼ିକରେ ଥିବା ଗଚ୍ଛିତ ଅର୍ଥର ସଦ୍ବିନିଯୋଗ ପାଇଁ ଆବଶ୍ୟକ ପଦକ୍ଷେପ ନିଆଯାଇଛି ବୋଲି ବ୍ଲକର ଜଣେ ଅଧିକାରୀ କହିଛନ୍ତି ।
