ବରଗଡ଼ ଅଫିସ୍,୨୭।୧୧: ପଦ୍ମପୁର ଉପନିର୍ବାଚନରେ ପ୍ରଚାର ଜୋରଦାର। କଂଗ୍ରେସ, ଭାଜପା ଓ ବିଜେଡି ହେଭିଓ୍ବେଟ୍ ନିର୍ବାଚନମଣ୍ଡଳୀ ଗସ୍ତ କରି ଭୋଟରଙ୍କୁ ଭେଟୁଛନ୍ତି। ସବୁ ନେତାଙ୍କ ମୁହଁରେ ଏବେ ପଦ୍ମପୁର ନିର୍ବାଚନ ମଣ୍ଡଳୀର ବିକାଶ କଥା। ଏଠାର ଭୋଟର ସବୁଦଳକୁ ସୁଯୋଗ ଦେଇଛନ୍ତି। କଂଗ୍ରେସ ପ୍ରାର୍ଥୀ ସତ୍ୟଭୂଷଣ ସାହୁ ଜଣେ ପୂର୍ବତନ ବିଧାୟକ ହୋଇଥିବାବେଳେ ଭାଜପାର ପ୍ରଦୀପ ପୁରୋହିତ ୨୦୧୪ରେ ନିର୍ବାଚିତ ହୋଇଥିଲେ। ବିଜେଡି ପ୍ରାର୍ଥିନୀ ବର୍ଷା ସିଂ ବରିହା ନବାଗତା ହେଲେ ମଧ୍ୟ ପଦ୍ମପୁର ତାଙ୍କ ବାପା ସ୍ବର୍ଗତ ବିଜୟ ରଞ୍ଜନ ସିଂ ବରିହାଙ୍କ ଗଡ଼ ଥିଲା। ଏସବୁ ସତ୍ତ୍ୱେ ପ୍ରକୃତ ବିକାଶ ପଦ୍ମପୁରକୁ ଛୁଇଁପାରିନାହିଁ।
ଦାଦନ କିମ୍ବା ଜଳସେଚନ କଥା ଉଠିଲେ ଜିଲାରେ ପ୍ରଥମେ ପଦ୍ମପୁର ଉପଖଣ୍ଡ ଆସିବ। ଏଠାରୁ ସର୍ବାଧିକ ଶ୍ରମିକ ଦାଦନ ଖଟିବାକୁ ଯାଇଥାନ୍ତି। ଜିଲାର ହୀରାକୁଦ ଅଣଜଳସେଚିତ କହିଲେ ପଦ୍ମପୁର ଉପଖଣ୍ଡକୁ ବୁଝାଯାଏ। କିନ୍ତୁ ଦାଦନ, ଜଳସେଚନ ଭଳି ବଡ଼ ସମସ୍ୟାର ସମାଧାନ କରିବାରେ କୌଣସି ଦଳ ସକ୍ଷମ ହୋଇନାହାନ୍ତି। ବରଗଡ଼ ଭାୟା ପଦ୍ମପୁର ଦେଇ ନୂଆପଡ଼ାକୁ ରେଳପଥ, ପଦ୍ମପୁର ଜିଲା ଗଠନ, କ୍ଷତିଗ୍ରସ୍ତ ଚାଷୀଙ୍କୁ ପ୍ରଧାନମନ୍ତ୍ରୀ ଫସଲବୀମା ରାଶି ଏବଂ ଇନପୁଟ୍ ସହାୟତା ରାଶି ଅଞ୍ଚଳବାସୀଙ୍କ ପ୍ରମୁଖ ଦାବି ରହିଛି। ବରଗଡ଼ ଭାୟା ପଦ୍ମପୁର ଦେଇ ନୂଆପଡ଼ାକୁ ରେଳପଥ ଯେଭଳି ଅଞ୍ଚଳବାସୀଙ୍କ ଦଶନ୍ଧିର ଦାବି ଥିଲା, ଜଳସେଚନ ଏବଂ ଦାଦନ ସମସ୍ୟା ମଧ୍ୟ ଦୀର୍ଘଦିନର ଦାବି। କଂଗ୍ରେସ ଜିଲା ସଭାପତି ନିହାର ରଞ୍ଜନ ମହାନନ୍ଦ କହିଛନ୍ତି, ଦାଦନ, କୃଷି, ସ୍ବାସ୍ଥ୍ୟ, ଶିକ୍ଷା, ବିଦ୍ୟୁତ୍, ନିଯୁକ୍ତିକୁ ନେଇ ଦଳ ଭୋଟରଙ୍କ ପାଖକୁ ଯାଉଛି। କେନ୍ଦ୍ର ୨କୋଟି ଏବଂ ରାଜ୍ୟ ସରକାର ୨ଲକ୍ଷ ନିଯୁକ୍ତି ଦେବେ ବୋଲି ପୂର୍ବ ପ୍ରତିଶ୍ରୁତି ଫମ୍ପା ଆଓ୍ବାଜ ପାଲଟିଥିବା ସେ କହିଛନ୍ତି। ଭାଜପା ଜିଲା ସଭାପତି ଅଶ୍ୱିନୀ ଷଡ଼ଙ୍ଗୀ କହିଛନ୍ତି, ଦାଦନ, ଜଳସେଚନ, ପାନୀୟଜଳ ଭଳି ସମସ୍ୟା ନିର୍ବାଚନମଣ୍ଡଳୀରେ ରହିଛି। ଭାଜପା ପ୍ରାର୍ଥୀ ପ୍ରଦୀପ ପୁରୋହିତ ବିଜୟୀ ହେଲେ ସମାଧାନ ପାଇଁ ବିଧାନସଭାରେ ସ୍ବର ଉଠାଇବେ ବୋଲି ଷଡ଼ଙ୍ଗୀ କହିଛନ୍ତି। ବରଗଡ଼ ବିଧାୟକ ଦେବେଶ ଆଚାର୍ଯ୍ୟ କହିଛନ୍ତି, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବଚ୍ଛ ଶାସନ ଏବଂ ବିକାଶ ଧାରାକୁ ନେଇ ବିଜେଡି ଭୋଟରଙ୍କ ପାଖରେ ପହଞ୍ଚୁଛି। ଜଳସେଚନ, ରାସ୍ତାଘାଟ, ଶିକ୍ଷା, ସ୍ବାସ୍ଥ୍ୟ ଭଳି ସାମଗ୍ରିକ ବିକାଶ ପ୍ରସଙ୍ଗ ରହିଛି। ପ୍ରଧାନମନ୍ତ୍ରୀ ଫସଲବୀମା ନେଇ କେନ୍ଦ୍ରର ଭାଜପା ସରକାର କୁମ୍ଭୀର କାନ୍ଦଣା କରୁଥିବାବେଳେ ବରଗଡ଼ ଭାୟା ପଦ୍ମପୁର ଦେଇ ନୂଆପଡ଼ା ରେଳପଥକୁ ନେଇ ଭୁଆଁ ବୁଲାଉଛି ବୋଲି ସେ କହିଥିଲେ। ଲୋକେ ୩ ପ୍ରମୁଖ ଦଳର ମନ୍ତବ୍ୟକୁ ସହଜରେ ଗ୍ରହଣ କରି ପାରୁନାହାନ୍ତି। ଉକ୍ତ ନିର୍ବାଚନ ମଣ୍ଡଳୀ ଅନ୍ତର୍ଗତ ପାଇକମାଳ ବ୍ଲକ ରସମୁଣ୍ଡା ଗ୍ରାମର ଉମାକାନ୍ତ ଶତପଥି କହିଛନ୍ତି, ସବୁଦଳ ସବୁ ନିର୍ବାଚନରେ ପ୍ରତିଶ୍ରୁତି ଦେଇଆସୁଛନ୍ତି। ଏହା ବିଶ୍ୱାସଯୋଗ୍ୟ ନୁହେଁ। ଚାଷୀଙ୍କୁ ଯଦି ଠକୁଛନ୍ତି, ଅନ୍ୟମାନଙ୍କୁ କଣ କରୁଥିବେ ବୋଲି ସେ କହିଥିଲେ। ପାଇକମାଳର ଅନ୍ୟ ଜଣେ ଭୋଟର ସନ୍ତୋଷ ପାଣିଗ୍ରାହୀ କହିଛନ୍ତି, ନିର୍ବାଚନବେଳେ ସବୁଦଳ ଏଭଳି ପ୍ରତିଶ୍ରୁତି ଦେଇଥାନ୍ତି। ଆମେ ବିଶ୍ୱାସ ମଧ୍ୟ କରିଥାଉ। କିନ୍ତୁ ନିର୍ବାଚନ ପରେ ସେମାନେ ଭୁଲି ଯାଇଥାନ୍ତି। ଆମେ ସବୁକଥାକୁ ସହୁଛୁ। ହେଲେ ପରବର୍ତ୍ତୀ ନିର୍ବାଚନରେ ପୁଣି ଭୋଟ୍ ଦେଉଛୁ। ଝାରବନ୍ଧ ବ୍ଲକ କୋତନାର ଭୋପାଳ ଚନ୍ଦ୍ର ସାହୁ କହିଛନ୍ତି, ଯେଉଁମାନେ ଅଞ୍ଚଳର ଉନ୍ନତି କରିବେ ବୋଲି ଅନୁଭବ କରୁଛୁ, ତାଙ୍କ ସପକ୍ଷରେ ଭୋଟ୍ ଦେବୁ। ପ୍ରଚାର ପାଇଁ ନେତା, ମନ୍ତ୍ରୀ ତ ଅନେକ ଆସୁଛନ୍ତି। ବହୁତ ଉନ୍ନତି କରିବୁ ବୋଲି କହୁଛନ୍ତି। ହେଲେ ସବୁଦିନ ଆମେ ଏହା ଶୁଣି ଆସୁଛୁ।
