ଦାରିଙ୍ଗବାଡ଼ି,୨୯ା୧୧(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଜାଗୃତି କାର୍ଯ୍ୟାଳୟ ପରିସର ମଧ୍ୟରେ ଅନ୍ତର୍ଜାତୀୟ କମଳା ଦିବସ ନାରୀନେତ୍ରୀ ମମତା ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଏଥିରେ ଜାଗୃତି ସମ୍ପାଦକ କୈଳାସ ଚନ୍ଦ୍ର ଦଣ୍ଡପାଟ ମୁଖ୍ୟ ଅତିଥି ଭାବେ ଯୋଗଦାନ କରିଥିଲେ। ଅନ୍ୟମାନଙ୍କ ମଧ୍ୟରେ ବ୍ଲକସ୍ତରୀୟ ନାରୀ ମହାସଙ୍ଘର ନାରୀନେତ୍ରୀ ସଭାନେତ୍ରୀ ଲୁସିମା ପ୍ରଧାନ, ମେନକା ପ୍ରଧାନ, ମହେନ୍ଦ୍ର ପରିଡ଼ା, ବିପିନ କୁମାର ଦିଗାଲ ପ୍ରମୁଖ ମଞ୍ଚାସୀନ ରହିଥିଲେ। ଏହି କମଳା ଦିବସର ଉଦ୍ଦେଶ୍ୟ ସମ୍ପର୍କରେ ଅତିଥିମାନେ କହିଥିଲେ ଯେ, ସମାଜରେ ମହିଳା ଓ ଝିଅମାନଙ୍କ ସୁରକ୍ଷା, ସମ୍ମାନ ଓ ଅଧିକାର ପାଇଁ ଏହି ଦିବସ ପାଳନ କରାଯାଉଛି। ଏଥିସହ ପ୍ରତ୍ୟେକ ମହିଳା ଓ ଝିଅ ପାଇଁ ସମ୍ମାନ, ସୁରକ୍ଷା ଓ ସମାନ ଅଧିକାର ପାଇଁ ଏହି ଦିବସଟିକୁ ପାଳନ କରୁଛନ୍ତି। ଏସ୍ଏଚ୍ଜି ମହିଳାମାନେ ଆଜି ସମାଜରେ ପରିବର୍ତ୍ତନର ମୂଳ ଶକ୍ତି। ସେମାନଙ୍କ ନେତୃତ୍ୱ, ସାହସ ଓ ସଚେତନତା ଘରୋଇ ହିଂସା, ନିର୍ଯାତନା, ବାଲ୍ୟ ବିବାହ, ମହିଳା ଶୋଷଣ ଭଳି ସମସ୍ୟାକୁ କମାଇବାରେ ବଡ଼ ଭୂମିକା ନେଉଛି। ଆମେ ନିଜ-ନିଜ ଗାଁରେ ମହିଳାଙ୍କୁ ସଶକ୍ତ କରୁଛୁ ଶିକ୍ଷା, ନେତୃତ୍ୱ, ଆର୍ଥିକ କ୍ଷମତା, ଓ ମାନସିକ ସମର୍ଥନ ମାଧ୍ୟମରେ। ଆଜି ଯେ ସମସ୍ତ ସମ୍ମାନ ଓ ସମ୍ମାନନୀୟ ଉପାଧି ପ୍ରଦାନ ହେବାକୁଯାଉଛି। ସେମାନେ ହେଲେ ସମାଜ ମଧ୍ୟରେ ଆଦର୍ଶ ସୃଷ୍ଟି କରୁଥିବା ମହିଳାମାନେ ବୋଲି କୁହାଯାଇଥିଲା ଶେଷରେ ଆମର ଏକ ଦାୟିତ୍ୱ ମହିଳାଙ୍କୁ ସୁରକ୍ଷିତ, ଶକ୍ତିଶାଳୀ ଓ ସମ୍ମାନିତ ରଖିବା। ଆଜିର କମଳା ଦିବସ ଆମ ସମସ୍ତଙ୍କୁ ଏକତା ଆଣିଛି ଯାହାକି ହିଂସା ବିରୋଧରେ ଦୃଢ ଭାବେ କାମକରିବା। ଯଦି ଆପଣମାନଙ୍କ ସମର୍ଥନ ଓ ସହଭାଗିତା ହେଲେ ଆମେ ଆସନ୍ତା ପିଢ଼ି ପାଇଁ ଗୋଟେ ସୁରକ୍ଷିତ ସମାଜ ଗଢ଼ିପାରିବା ବୋଲି ଅତିଥିମାନେ ମତ ପ୍ରକାଶ କରିଥିଲେ। ଏଥିରେ ମହିଳାମାନେ ସମସ୍ତେ ମିଶି ହିଂସାମୁକ୍ତ ସମାଜ ଗଢ଼ିବାକୁ ସଂକଳ୍ପ ଓ ଶପଥ ଗ୍ରହଣ କରିଥିଲେ। ଏହି ଅବସରରେ ବିଭିନ୍ନ କାର୍ଯ୍ୟରେ ଉଲ୍ଲେଖନୀୟ ଅବଦାନ ପାଇଁ ପୁରସ୍କୃତ ସହ ଟ୍ରଫି ପ୍ରଦାନ କରାଯାଇଛି। ସେମାନଙ୍କ ମଧ୍ୟରେ ମହିଳା ଉଦ୍ୟୋଗୀ ଭାବେ ବଡ଼ାଙ୍ଗିଆ ଗ୍ରାମର ମା’ ବିମଳା ଏସ୍ଏଚ୍ଜି ସଦସ୍ୟା କିରାଣି ଉଠାଣସିଂ ଏବଂ ଭ୍ରମରବାଡ଼ି ପଞ୍ଚାୟତ ପୁଡ୍ରାଜଳାର ମହାଲକ୍ଷ୍ମୀ ଏସ୍ଏଚ୍ଜିର ସଦସ୍ୟା ମମତା ସାହୁଙ୍କୁ ସମ୍ମାନିତ କରାଯାଇଥିଲା।
ସେହିପରି ଶ୍ରେଷ୍ଠ ସ୍ବୟଂ ସହାୟକ ଗୋଷ୍ଠୀ ପାଇଁ ଭ୍ରମରବାଡ଼ି ପଞ୍ଚାୟତ ଜେଙ୍ଗଡବାଡ଼ି ଗ୍ରାମର ବାଡ଼ାବାଲି ଏସ୍ଏଚ୍ଜି ଏବଂ ସିର୍କାବର୍ଗ ପଞ୍ଚାୟତ ମାନେକଯୋଡ଼ି ଗ୍ରାମର ଇମ୍ମାନୁଏଲ ଏସ୍ଏଚଜିଙ୍କୁ ସମ୍ମାନିତ କରାଯାଇଛି।
ସେହିପରି ମହିଳା ନେତ୍ରୀ ଭାବେ ଡମକ୍ଲିୟୁ ଆଲୋକ ଏସ୍ଏଚ୍ଜିର ମେନକା ପ୍ରଧାନ ଏବଂ ଶ୍ରାକିପାଙ୍ଗା କରୁଣାମୟୀ ଏସ୍ଏଚ୍ଜି ରାମକାନ୍ତି ପ୍ରଧାନଙ୍କୁ ସମ୍ମାନିତ କରାଯାଇଛି। ସେହିପରି ମହିଳାଙ୍କ ଉପରେ ହିଂସା ବିରୋଧରେ କାମ କରୁଥିବା ଏସ୍ଏଚ୍ଜି ଦଳ ତଥା ଆଲୋକ ଓ ରାଜେଶ୍ବରୀ ଏସ୍ଏଚଜି ଏବଂ ଶ୍ରାକିପାଙ୍ଗାର ମା’ ମେରି, କରୁଣାମୟୀ, ବେଣ୍ଟମାୟୀ ଏସ୍ଏଚ୍ଜି ସମ୍ବର୍ଦ୍ଧିତ ସେହିପରି ସଫଳ ମହିଳା ସଦସ୍ୟାଭାବେ ଦଳବାଡ଼ି ଜୀବନ ଜ୍ୟୋତି ଏସ୍ଏଚ୍ଜିର ସଦସ୍ୟା ନିହାରିକା ପ୍ରଧାନ ଏବଂ ସେଡ଼ାଙ୍ଗପାଙ୍ଗାଗ୍ରାମର ସେଣ୍ଡାମାରା ଏସ୍ଏଚ୍ଜିର ସଦସ୍ୟା ଶଟାବୁଡିଙ୍କୁ ସମ୍ବର୍ଦ୍ଧିତ କରାଯାଇଛି। କାର୍ଯ୍ୟକ୍ରମ ଶେଷରେ ନାରୀନେତ୍ରୀ ସୁବାସିନୀ ସିଂ ସାଧୁବାଦ ଜଣାଇଥିଲେ।
Dharitri – Odisha’s No.1 Odia Daily
