ବରଗଡ଼, ୧୦।୪(ପ୍ରେମାନନ୍ଦ ଖମାରୀ) – ବରଗଡ଼ ଜିଲାରେ ଗତ ୭ତାରିଖରୁ ଖରିଫ୍ ଧାନ ସଂଗ୍ରହ ପ୍ରକ୍ରିୟାକୁ ସରିଯାଇଛି। ଅନ୍ୟ ପକ୍ଷରେ ଆଉ ପ୍ରାୟ ମାସକ ପରେ ଜିଲାରେ ରବି ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେବ। କିନ୍ତୁ ଏପର୍ଯ୍ୟନ୍ତ ଜିଲାର ଅନେକ ଚାଷୀ ବିଭାଗୀୟ ଅବହେଳା ଯୋଗୁ ପଞ୍ଜୀକରଣରୁ ବାଦ୍ ପଡି ଖରିଫରେ ଅମଳ ଧାନ ବିକ୍ରି କରି ପାରି ନାହାନ୍ତି। ଜିଲାର ଭେଡେନ ବ୍ଲକ ଅନ୍ତର୍ଗତ ସହରାଟିକ୍ରା ମଣ୍ଡି ଉପରେ ନିର୍ଭରଶୀଳ ଗ୍ରାମ ଗୁଡିକର ଅନେକ ଚାଷୀ ଏଭଳି ସମସ୍ୟାରେ ପଡିଛନ୍ତି। ସେମାନଙ୍କର ପ୍ରାୟ ୨୫ହଜାର ଧାନ ଏପର୍ଯ୍ୟନ୍ତ ବିକ୍ରି ହୋଇ ପାରି ନ ଥିବା ଚାଷୀମାନେ ଅଭିଯୋଗ କରିଛନ୍ତି। ସ୍ଥାନୀୟ ଜନ ପ୍ରତିନିଧି, ଜିଲାପାଳଙ୍କଠାରୁ ଆରମ୍ଭ କରି ମୁଖ୍ୟମନ୍ତ୍ରୀଙ୍କୁ ଲେଖି ଜଣାଇବା ସତ୍ତ୍ବେ କିଛି ସୁଫଳ ମିଳି ନାହିଁ। ଫଳରେ ଚାଷୀମାନେ ଗତମାସ ୯ତାରିଖରୁ ଧାନ ଗଦା କରି ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଦିନରାତି ଧାରଣାରେ ବସିଛନ୍ତି।
ତଥାପି ସେମାନଙ୍କ ସମସ୍ୟା ଅସମାହିତ ରହିଛି। ଅନ୍ୟପଟେ ଧାରଣାରତ ଚାଷୀଙ୍କ ଦୁଃଖ ବଢି ଚାଲିଛି। ଝଡବର୍ଷା, କରାମାଡ, ଖରା ସତ୍ତ୍ବେ ନିଜର ହକ୍ ଦାବିରେ ସେମାନେ ଧାରଣା ଜାରି ରଖିଛନ୍ତି। କେବଳ ସେତିକି ନୁହେଁ, ଗ୍ରାମରେ ଘରକୁ ଘର ବୁଲି ଡାଲି, ଚାଉଳ, ପରିବା ସଂଗ୍ରହ କରୁଛନ୍ତି ଏବଂ ଧାରଣାସ୍ଥଳରେ ଚୂଲି ଦ୍ବାରା ରୋଷେଇ କରି ଭୋଜନ କରୁଛନ୍ତି। ତେବେ ଏଭଳି ଭାବରେ ଧାରଣାକୁ ମାସେ ବିତିଯାଇ ଥିଲେ ସୁଦ୍ଧା ସରକାରୀ କଳ ସେଥିପ୍ରତି ନିର୍ବିକାର ରହିବା ବିଡମ୍ବନାର ବିଷୟ ହୋଇ ପଡିଛି।
