କେନ୍ଦ୍ରାପଡ଼ା ଅଫିସ, ୩୦।୩: କେନ୍ଦ୍ରାପଡ଼ା ପୌର ପରିଷଦ ନିର୍ବାଚନ ସରିଛି। ଅଧ୍ୟକ୍ଷା ପଦରେ ବିଜେଡିର ସରିତା ସାହୁ ପ୍ରତ୍ୟେକ ୱାର୍ଡରୁ ବିଜୟ ସଂଖ୍ୟକ ଭୋଟ ପାଇ ନିର୍ବାଚିତ ହୋଇଛନ୍ତି। ତେବେ ଉପାଧ୍ୟକ୍ଷ ପଦବୀ ପାଇଁ ବିଜେଡି ରାଜନୈତିକ ଗଣିତ ଅଛିଣ୍ଡା ହୋଇଛି। ବିଜେଡିର କାଉନସିଲର ସଂଖ୍ୟା ଅଧିକ ସତ୍ତ୍ୱେ ମଧ୍ୟ ବିଜୟୀ ବିଦ୍ରୋହୀ କାଉନ୍ସିଲର ଏହି ଗଣିତକୁ ଓଲଟପାଲଟ କରିବା ସମ୍ଭାବନା ଅଛି। ଅପରପକ୍ଷରେ ସମସ୍ତ ବିଜୟୀ କାଉନ୍ସିଲର ଉପାଧ୍ୟକ୍ଷ ପଦବୀ ପାଇଁ ଆଶାୟୀ ଥିବା ବେଳେ ଦଳୀୟ ହସ୍ତକ୍ଷେପ ବା ହୁଇପକୁ ଅପେକ୍ଷା କରିଛନ୍ତି। ତେବେ ଦୁଇ ପୁଷ୍ପାଙ୍କ ମଧ୍ୟରେ ଜଣେ ଉପାଧ୍ୟକ୍ଷ ପଦବୀ ପାଇପାରନ୍ତି ବୋଲି ରାଜନୈତିକ ବିଶ୍ଲେଷକ ମତ ଦେଇଛନ୍ତି।
ଏ ସମ୍ପର୍କରେ ସହରର ମୀର ଅବୁ ଓବେଦା, ବୁଦ୍ଧିଜୀବୀ ଗଣେଣ ଚନ୍ଦ୍ର ସାମଲ, ଚିତ୍ତରଞ୍ଜନ ସାହୁ ପ୍ରମୁଖ ଦର୍ଶାଇଛନ୍ତି, ବିଜେଡିର ଠିକ୍ ଗୋଟି ଚାଳନା ହିଁ ଏହାର ସମାଧାନ କରିପାରିବ। ପୌରାଞ୍ଚଳର ୨୧ ୱାର୍ଡରୁ ୧୧ ବିଜେଡି, ୫ଟି କଂଗ୍ରେସ, ୪ଟି ବିଦ୍ରୋହୀ ବିଜେଡି ଓ ଗୋଟିଏ ୱାର୍ଡରେ ଭାଜପା କାଉନ୍ସିଲର ପ୍ରାର୍ଥୀ ବିଜୟୀ ହୋଇଛନ୍ତି। ଉପାଧ୍ୟକ୍ଷ ପଦବୀ ପାଇଁ ପ୍ରଥମ ଦାବିଦାର ଥିବା ମଙ୍ଗଳବରଣ ସିଂହ ଓ ନିକଟରେ କଂଗ୍ରେସରୁ ବିଜେଡିରେ ସାମିଲ ହୋଇଥିବା ଶରତ କୁମାର ବେହେରା ନିର୍ବାଚନରେ ହାରି ଯାଇଛନ୍ତି। ବିଜୟୀ କାଉନ୍ସିଲଙ୍କ ମଧ୍ୟରୁ ପ୍ରଭାଶିଷ ପଣ୍ଡା କେନ୍ଦ୍ରାପଡ଼ା ବିଧାୟକ ଶଶିଭୂଷଣ ବେହେରା ଓ ପୂର୍ବତନ ବିଧାୟକ କିଶୋର ଚନ୍ଦ୍ର ତରାଇଙ୍କ ଘନିଷ୍ଠ। ସେହିପରି ଉମେଶ ଚନ୍ଦ୍ର ନାୟକ ସର୍ବାଧିକ ଭୋଟ ପାଇ ଉପାଧ୍ୟକ୍ଷ ପଦବୀକୁ ଆଶା କରିଛନ୍ତି। ତେବେ ୨ ନଂ. ୱାର୍ଡର ବିଜୟୀ ସ୍ବାଧୀନ ପ୍ରାର୍ଥୀ କାଳି ପ୍ରସାଦ ମିଶ୍ର ଉପାଧ୍ୟକ୍ଷ ପଦବୀ ପାଇଁ ଗୋଟିଚାଳନା ଆରମ୍ଭ କରିଛନ୍ତି। ଚଳିତ ନିର୍ବାଚନ ସମୟରେ ବିଜେଡି ଟିକେଟ ପାଇ ନ ଥିବାରୁ ସ୍ବାଧୀନ ଭାବେ ଲଢ଼ିଥିବା ମିଶ୍ରଙ୍କ ସମେତ ୪ ଜଣଙ୍କୁ ବିଜେଡି ନିଲମ୍ବିତ କରିଥିଲା। ଏମାନେ ଦଳକୁ ଫେରି ଉପାଧ୍ୟକ୍ଷ ପଦବୀ ହାସଲ କରିବାକୁ ଯୋଜନା କରିଛନ୍ତି। ଦଳୀୟ ପ୍ରାର୍ଥୀ ନ ହେଲେ ଉପାଧ୍ୟକ୍ଷ ପଦବୀ ପାଇଁ ବିଜୟୀ କଂଗ୍ରେସ, ଭାଜପା ଓ ସ୍ବାଧୀନ କାଉନ୍ସିଲର ଏକାଠି ହେବା ସମ୍ଭାବନା ଅଛି। ଏଥିସହ ବିଜେଡିରୁ ଜଣେ କାଉନସିଲର ହାତକୁ ଆସିଲେ ବିରୋଧୀଙ୍କୁ ଉପାଧ୍ୟକ୍ଷ ପଦବୀ ମିଳିବାରେ ଅସୁବିଧା ନାହିଁ। ତେବେ ନିଲମ୍ବିତ ପ୍ରାର୍ଥୀ ଦଳକୁ ଫେରିଲେ ଦଳୀୟ କାଉନସିଲରଙ୍କ ମଧ୍ୟରେ ଭବିଷ୍ୟତରେ କନ୍ଦଳ ଲାଗିବା ସମ୍ଭାବନା ଅଛି। ଏ କ୍ଷେତ୍ରରେ ୧ ନଂ. ୱାର୍ଡରେ ବିଜୟୀ ହୋଇଥିବା ପୁଷ୍ପଲତା ବେହେରା ଓ ୧୧ ନଂ. ୱାର୍ଡରେ ବିଜୟୀ ପୁଷ୍ପାଞ୍ଜଳି ବସ୍ତିଆ ବିଜେଡି ପାଇଁ ଟ୍ରମ୍ପ କାର୍ଡ ସାଜିଛନ୍ତି। ୧୧ ନଂ. ୱାର୍ଡର ବିଜୟୀ ବସ୍ତିଆ ହେଉଛନ୍ତି ପୂର୍ବତନ କାଉନ୍ସିଲର ହିରଣ୍ୟ କୁମାର ପଣ୍ଡାଙ୍କ ସ୍ତ୍ରୀ। ହିରଣ୍ୟ କୁମାର ଦଳୀୟ କାର୍ଯ୍ୟକ୍ରମ ସହ ଜୀବନ ବିନ୍ଦୁ କାର୍ଯ୍ୟକ୍ରମରେ ଯୋଡି ହୋଇ ଦଳୀୟ ନେତା ଓ ପୌରାଞ୍ଚଳବାସୀଙ୍କ ଆସ୍ଥାଭାଜନ ହୋଇଛନ୍ତି। ଏଥିସହ ୧୧ ନଂ. ୱାର୍ଡରେ ଦଳୀୟ ଅଧ୍ୟକ୍ଷାଙ୍କ ସହିତ ସମାନ ଭୋଟ ପାଇ ବସ୍ତିଆ ଚର୍ଚ୍ଚାରେ ଅଛନ୍ତି। ସେହିପରି ୧ ନଂ. ୱାର୍ଡରେ ବିଜୟୀ ବେହେରା ଓ ୨ ନଂ. ୱାର୍ଡର ବିଜୟୀ ସ୍ବାଧୀନ ପ୍ରାର୍ଥୀ କାଳିପ୍ରସାଦଙ୍କ ଗୋଟିଏ ବିଜୟ ଶୋଭାଯାତ୍ରାରେ ସାମିଲ ହେବା ଉପାଧ୍ୟକ୍ଷ ପଦବୀକୁ ନେଇ ଅଙ୍କକଷା ଆରମ୍ଭ ହୋଇଛି। ଦଳୀୟ ପଦକ୍ଷେପକୁ ସହରବାସୀ ଅପେକ୍ଷା କରିଥିବା ବିଶ୍ଲେଷକମାନେ ପ୍ରକାଶ କରିଛନ୍ତି।
