ମୁମ୍ବାଇ,୧୫ା୪: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ)ରେ ରବିବାର ଡବଲ ହେଡର ଦ୍ୱିତୀୟ ମ୍ୟାଚ୍ରେ ରୋହିତ ଶର୍ମାଙ୍କ ଶତକ ସତ୍ତ୍ୱେ ଚେନ୍ନାଇ ସୁପର କିଙ୍ଗ୍ସ ନିକଟରୁ ୨୦ ରନ୍ରେ ହାରିଛି ମୁମ୍ବାଇ ଇଣ୍ଡିଆନ୍ସ। ପ୍ରଥମେ ବ୍ୟାଟିଂ କରିଥିବା ଚେନ୍ନାଇ ୨୦ ଓଭରରେ ୪ ଉଇକେଟ ହରାଇ ୨୦୬ ରନ୍ କରିଥିଲା। ଜବାବରେ ମୁମ୍ବାଇର ୬ ଉଇକେଟ ହରାଇ୧୮୬ ରନ୍ କରିଥିଲା। ରୋହିତ ଶର୍ମା ୧୦୫ ରନ୍ କରିଥିଲେ ମଧ୍ୟ ମୁମ୍ବାଇ ମ୍ୟାଚ ହାରି ଯାଇଥିଲା।
ଟସ୍ ଜିତି ମୁମ୍ବାଇ ପ୍ରଥମେ ବୋଲିଂ କରିଥିଲା। ଟପ୍ ଅର୍ଡରରେ ଅଜିଙ୍କ୍ୟ ରାହାନେ ୫ ଓ ରାଚିନ୍ ରବୀନ୍ଦ୍ର ୨୧ ରନ୍ ବିଫଳ ହୋଇଥିଲେ। ତେବେ ଅଧିନାୟକ ଋତୁରାଜ ଗାଏକ୍ୱାଡଙ୍କ ସହ ଶିବମ ଦୁବେ କ୍ରିଜରେ ଯୋଗ ଦେଇ ୯୦ ରନ୍ ଯୋଡିଥିଲେ। ଗାଏକ୍ୱାଡ ୪୦ ବଲ୍ ଖେଳି ୫ଟି ଲେଖାଏ ଛକା ଓ ଚୌକା ମାରି ୬୯ ରନ୍ କରିଥିଲେ। ଅନ୍ୟ ପକ୍ଷରେ ଶେଷ ଯାଏ ଅପରାଜିତ ଥିବା ଦୁବେ ୩୮ ବଲ୍ ଖେଳି ୧୦ ଚୌକା ଓ ୨ ଛକା ମାରିଥିଲେ। ମହେନ୍ଦ୍ର ସିଂ ଧୋନୀ ବ୍ୟାଟିଂ କରିବାକୁ ଆସିଥିବା ବେଳେ ମାତ୍ର ୪ ବଲ୍ ଖେଳି ୨୦ ରନ୍ କରିଥିଲେ॥ ହାର୍ଦ୍ଦିକ ପାଣ୍ଡ୍ୟାଙ୍କୁ ହ୍ୟାଟ୍ରିକ୍ ଛକା ମାରିଥିଲେ ଧୋନୀ।
ମୁମ୍ବାଇ ପକ୍ଷରୁ ହାର୍ଦ୍ଦିକ ପାଣ୍ଡ୍ୟା ୨, ଜେରାଲ୍ଡ କୋଜି ଓ ଶ୍ରେୟସ ଗୋପାଳ ଗୋଟିଏ ଲେଖାଏ ଉଇକେଟ ନେଇଥିଲେ। ୨୦୭ ରନ୍ ଲକ୍ଷ୍ୟରେ ରୋହିତ ଓ ଇଶାନ କିଶନ(୨୩) ପ୍ରଥମ ଉଇକେଟରେ ୭୦ ରନ୍ ଯୋଡିଥିଲେ। ଗୋଟିଏ ପଟରୁ ଆକ୍ରମଣ କରି ରୋହିତ ୬୩ ବଲ ଖେଳି ୧୧ ଚୌକା ଓ ୫ ଛକା ମାରିଥିଲେ। ତେବେ ଅନ୍ୟ ପଟରୁ ଉଇକେଟ ପଡି ଚାଲିଥିଲା। ତିଳକ ବର୍ମା ୩୧ ଓ ଟିମ ଡେଭିଡ୍ ୧୩ ରନ୍ କରିଥିଲେ। ଚେନ୍ନାଇ ପକ୍ଷରୁ ମଥିଶା ପଥିରାନା ୪, ତୁଷାର ଦେଶପାଣ୍ଡେ ଓ ମୁସ୍ତାଫିଜୁର ରେହମାନ ଗୋଟିଏ ଲେଖାଏ ଉଇକେଟ ନେଇଥିଲେ।
