ଦାରିଙ୍ଗବାଡି, ୧୦।୨ (ଅରୁଣ ସାହୁ ): ଓଡିଶାର କଶ୍ମୀର କୁହାଯାଉଥିବା ଦାରିଙ୍ଗବାଡି ଗସ୍ତରେ ରାଜ୍ୟର ଉପମୁଖ୍ୟମନ୍ତ୍ରୀ ତଥା ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡା ଗସ୍ତ କରିଛନ୍ତି। ସେ ସୋମବାର ଦାରିଙ୍ଗବାଡିରେ ପହଞ୍ଚି ଇକୋ ରିଟ୍ରିଟରେ ପହଞ୍ଚି ରାତ୍ରିଯାପନ କରିଥିବାବେଳେ ମଙ୍ଗଳବାର ସକାଳ ୧୦ଟାରେ ସେ ଦାରିଙ୍ଗବାଡିର ବିଭିନ୍ନ ପର୍ଯ୍ୟଟନସ୍ଥଳ ବୁଲିଥିଲେ। ପ୍ରଥମେ ସାଂଜାସରୁ ଉନ୍ନୟନ ଟ୍ରଷ୍ଟ ଅଧୀନରେ ରହିଥିବା ହିଲଭିୟୁ ପାର୍କ ବୁଲିଥିଲେ। ସେଠାକାର ଭିୟୁ ଓ ପାର୍କରେ ନୂତନ ୱାଚ ଟାୱାରକୁ ଯାଇ ସେଠାରୁ ଇକୋ ରିଟ୍ରିଟ ସମେତ ପାହାଡ଼ ଜଙ୍ଗଲକୁ ଦେଖି ଖୁସି ହେବା ସହ ସେଲ୍ଫି ପଏଣ୍ଟ ଓ ତାର ଉନ୍ନତି ପାଇଁ ଜିଲାପାଳ ବେଦ ଭୂଷଣ, ଟ୍ରଷ୍ଟର ଅଧ୍ୟକ୍ଷା ତଥା ବାଲିଗୁଡା ଉପଜିଲାପାଳ ପ୍ରଣୀତା ଦାସ, ବିଡ଼ିଓ ପ୍ରୀତିରଞ୍ଜନ ରଥଙ୍କ ସହ ଆଲୋଚନା କରିଥିଲେ।
ପରେ ସେଠାରୁ କଫି ବଗିଚା ଓ ଡ଼ୁଲୁରୀ ପାଇନ ବଣ ବୁଲି ଦେଖିଥିଲେ। ଏନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ତାଙ୍କ ପ୍ରତିକ୍ରିୟାରେ କହିଛନ୍ତି, ମୁଁ ସମସ୍ତ ପର୍ଯ୍ୟଟନ କ୍ଷେତ୍ର ସମ୍ପର୍କରେ ଅଧିକାରୀଙ୍କ ସହ ଆଲୋଚନା କରି ଏହାର ବିକାଶ ପାଇଁ କ’ଣ ପଦକ୍ଷେପ ନିଆଯିବ ସେ ନେଇ ଖବରଦାତା ସମ୍ମିଳନୀରେ କହିବି ବୋଲି କହିଛନ୍ତି। ସେ ପର୍ଯ୍ୟଟନ କ୍ଷେତ୍ର ବୁଲିବା ପରେ ଶ୍ରାନିକେତା ପଞ୍ଚାୟତ ଦଣ୍ଡିମାଠାରେ ଷ୍ଟ୍ରବେରୀ ଚାଷ ଦେଖିବା ପାଇଁ ଯାଇଥିଲେ।
Dharitri – Odisha’s No.1 Odia Daily
