ଢେଙ୍କାନାଳ ଅଫିସ,୧୪।୪: ବୌଦ୍ଧ, କନ୍ଧମାଳ ଜିଲାରୁ ଆସୁଥିଲା ଗଞ୍ଜେଇ। ଏହାକୁ ରଖିବା ଲାଗି ଢେଙ୍କାନାଳରେ କରାଯାଇଥିଲା ଡିପୋ। ସେଠାରୁ ପ୍ୟାକେଟ୍ କରାଯାଇ ରାଜସ୍ଥାନ, ମଧ୍ୟପ୍ରଦେଶ, ବିହାର, ରାଜସ୍ଥାନ ଏବଂ ଉତ୍ତରପ୍ରଦେଶକୁ ଚାଲାଣ ହେଉଥିଲା। ରାଜସ୍ଥାନ ସୀମାନ୍ତରେ ରହି ଏହାକୁ ଅପରେଟ କରୁଥିଲେ କିଙ୍ଗ୍ପିନ୍। ଗୁରୁବାର ଏଭଳି ଏକ ଆନ୍ତଃରାଜ୍ୟ ଗଞ୍ଜେଇ ଚୋରା ଚାଲାଣ ର଼୍ୟାକେଟର ପର୍ଦ୍ଦାଫାଶ କରିଛି ମଧ୍ୟପ୍ରଦେଶର ରାଜ୍ୟର ପାନ୍ନା ପୋଲିସ। ଏହି ଘଟଣାରେ ସଦରଥାନା ଗୋହିରାଖାଲ ଗ୍ରାମର ସୁଧାକର ଦାସ (୪୭) ଏବଂ ବିହାର ପାଟନା ଅଞ୍ଚଳର ବ୍ୟବସାୟୀ ନନ୍ଦଲାଲ୍ ମୁକେଶ (୨୩) ଗିରଫ ହୋଇଛନ୍ତି। ବାହାର ରାଜ୍ୟର ଅନ୍ୟ ୨ ବ୍ୟବସାୟୀ କୌଶଳକ୍ରମେ ଖସିଯିବାରେ ସକ୍ଷମ ହୋଇଛନ୍ତି। ଘଟଣାସ୍ଥଳରୁ ୨ କେ.ଜି. ୬୧୮ ଗ୍ରାମ ଗଞ୍ଜେଇ, ନଗଦ ୧ ଲକ୍ଷ ୧୭ ହଜାର ୧୫୦ ଟଙ୍କା, ଏକ କାର୍ (ନଂ. ଓଡ଼ି ୦୨ ବିଏମ୍ ୦୬୪୭), ୩ଟି ପାସ୍ବୁକ୍, ୫ କ୍ରେଡିଟ୍ କାର୍ଡ ଜବତ କରାଯାଇଛି। ଅନ୍ୟପଟେ ଟାଉନ ଥାନା ଅନ୍ତର୍ଗତ ମହିଷାପାଟ ଅଞ୍ଚଳର ଏକ ଭଡ଼ାଘରେ ଦୀର୍ଘ ୩ବର୍ଷ ଧରି ଏଭଳି କାରବାର ଚାଲିଥିବାବେଳେ ପୋଲିସ ସାମାନ୍ୟତମ ସୁରାକ ପାଇ ନ ପାରିବା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।
ସୂଚନାଯୋଗ୍ୟ, ଦୁଇ ସପ୍ତାହ ତଳେ ମଧ୍ୟପ୍ରଦେଶର ପାନ୍ନା ଥାନା ଅଞ୍ଚଳରୁ ୫୦ କେ.ଜି.ରୁ ଊର୍ଦ୍ଧ୍ୱ ଚୋରା ଗଞ୍ଜେଇ ସ୍ଥାନୀୟ ପୋଲିସ ଜବତ କରିଥିଲା। ଏହି ଘଟଣାରେ ୨ ଆନ୍ତଃରାଜ୍ୟ ବ୍ୟବସାୟୀ ଧରାପଡ଼ିଥିଲେ। ସେମାନଙ୍କୁ ପଚରାଉଚରା ବେଳେ ଏହାର ଲିଙ୍କ୍ ଢେଙ୍କାନାଳରୁ ମିଳିଥିଲା। ଏ ସମ୍ପର୍କରେ ଅଧିକ ଖୋଳତାଡ଼ କରିବା ପାଇଁ ପାନ୍ନା ଥାନାର ଇନ୍ସପେକ୍ଟର ଅରବିନ୍ଦ କୁମାରଙ୍କ ନେତୃତ୍ୱରେ ୫ଜଣିଆ ପୋଲିସ ଟିମ୍ ଢେଙ୍କାନାଳରେ ପହଞ୍ଚତ୍ଥିଲା। ମହିଷାପାଟ ଅଞ୍ଚଳର ଏକ ଭଡ଼ା ଘରେ ଗଞ୍ଜେଇ ଡିପୋ ଚାଲିଥିବା ଜଣାପଡ଼ିବା ପରେ ଟାଉନ ଥାନା ଅଧିକାରୀ ରାଜେନ୍ଦ୍ର ପ୍ରସାଦ ମହାପାତ୍ରଙ୍କ ସହାୟତାରେ ଚଢ଼ାଉ କରାଯାଇଥିଲା। ପୋଲିସ ସୂଚନା ଅନୁଯାୟୀ, ବୌଦ୍ଧ ଏବଂ କନ୍ଧମାଳ ଜିଲାରୁ ଗଞ୍ଜେଇ ଅଣାଯାଇ ଢେଙ୍କାନାଳ ମହିଷାପାଟର ଉକ୍ତ ଭଡ଼ା ଘରେ ରଖାଯାଉଥିଲା। ସେଠାରୁ ପ୍ୟାକେଟ୍ କରାଯାଇ ମଧ୍ୟପ୍ରଦେଶ, ବିହାର, ରାଜସ୍ଥାନ ଏବଂ ଉତ୍ତରପ୍ରଦେଶକୁ ରାତାରାତି ଚାଲାଣ କରି ଦିଆଯାଉଥିଲା। ଏହି ର଼୍ୟାକେଟ୍କୁ ପରିଚାଳନା କରୁଥିବା ମୁଖ୍ୟ ଅଭିଯୁକ୍ତ ରାଜସ୍ଥାନ ଜୈସାଲମେର ସୀମାନ୍ତରେ ରହୁଥିବା ଜଣାପଡ଼ିଛି। ଫଳରେ ରାଜସ୍ଥାନ ସୀମାଦେଇ ଦେଶ ବାହାରକୁ ଗଞ୍ଜେଇ ଚାଲାଣ ଚେର ଲମ୍ବିଥିବା ସନ୍ଦେହ ଦୃଢ଼ୀଭୂତ ହୋଇଛି। ତେବେ ଏ ସମ୍ପର୍କରେ ସବିଶେଷ ତଥ୍ୟ ହାସଲ ପାଇଁ ଅଧିକ ତଦନ୍ତ କରାଯିବ ବୋଲି ଜଣାପଡ଼ିଛି।
ଗଞ୍ଜେଇ ଡିପୋ ସମ୍ପର୍କରେ ପୋଲିସ ନିକଟରେ ସୂଚନା ନ ଥିବା ସମ୍ପର୍କରେ ପଚାରିବାରେ ଏସ୍ଡିପିଓ ସୂର୍ଯ୍ୟମଣି ପ୍ରଧାନ କୁହନ୍ତି, ବାହାରୁ ଗଞ୍ଜେଇ ଅଣାଯିବା ପରେ ଏହାକୁ ପ୍ୟାକେଟ କରି ଅନ୍ୟ ରାଜ୍ୟକୁ ଚାଲାଣ କରି ଦିଆଯାଉଥିଲା। ତେଣୁ ଏହା ଜଣାପଡ଼ି ନ ଥିଲା। ଏବେ ଏହା ସ୍ପଷ୍ଟ ହେବା ପରେ ଅଧିକ ତଦନ୍ତ କରାଯିବ। ଏସ୍ପି ଜ୍ଞାନରଞ୍ଜନ ମହାପାତ୍ର କୁହନ୍ତି, ସମ୍ପୂର୍ଣ୍ଣ ତଦନ୍ତ ସରିବା ପରେ ଏ ସମ୍ପର୍କରେ ଜଣାଇବେ। ଏଥିପୂର୍ବରୁ ପାନ୍ନା ପୋଲିସ ଢେଙ୍କାନାଳରେ ଚଢ଼ାଉ କରି ବର୍ଷକ ଭିତରେ ୩ ଅଭିଯୁକ୍ତଙ୍କୁ ଗିରଫ କରିଛି। ତେବେ ଢେଙ୍କାନାଳରେ ଗଞ୍ଜେଇ କାରବାରର ମୁଖ୍ୟ ଅଭିଯୁକ୍ତ କୁହାଯାଉଥିବା ସୁଧାକର ଦାସ ଫେରାର ହୋଇଯାଇଥିଲେ। ଅଭିଯୁକ୍ତମାନେ ମୋବାଇଲ ସିମ୍ ଅଦଳବଦଳ କରି ଯୋଗାଯୋଗ କରୁଥିବାବେଳେ ପୋଲିସ ଟ୍ରାକ୍ କରି ସେମାନଙ୍କ ବିଷୟରେ ସୂଚନା ପାଇଥିଲା।