କଟକ ସଦର,୨୨ା୫(ଡି.ଏନ୍.ଏ.): କଟକ ସଦର ବ୍ଲକ ଅଞ୍ଚଳରେ ୨୦୦୯ ପରଠାରୁ କରାଯାଇଥିବା ସମସ୍ତ ଉନ୍ନୟନମୂଳକ କାର୍ଯ୍ୟରେ କାର୍ଯ୍ୟ ନିର୍ବାହୀ(ଶ୍ରମିକ ପ୍ରତିନିଧି)ମାନଙ୍କଠାରୁ ଅମାନତ ରାଶି ରଖାଯାଇଥିଲା। ଇତିମଧ୍ୟରେ ୧୩ ବର୍ଷ ବିତିଯାଇଥିଲେ ସୁଦ୍ଧା ଉକ୍ତ ଟଙ୍କା ବ୍ଲକ ପ୍ରଶାସନ ଫେରସ୍ତ କରୁନାହିଁ ବୋଲି କଟକ ଜିଲା ମୁଖ୍ୟ ଉନ୍ନୟନ ଅଧିକାରୀ ଅମ୍ବର କରଙ୍କ ନିକଟରେ ଶନିବାର ଶ୍ରମିକ ପ୍ରତିନିଧିମାନେ ଲିଖିତ ଅଭିଯୋଗ କରିଥିଲେ। ଫଳରେ ଅମାନତ ରାଶି ବାବଦକୁ କାଟି ରଖାଯାଇଥିବା ୫୦ ଲକ୍ଷରୁ ଊଦ୍ଧର୍ବ ଟଙ୍କା କାହାର ବୋଲି ଅଭିଯୋଗ ପତ୍ରରେ ଉଲ୍ଲେଖ କରାଯାଇଛି। ତ୍ରିସ୍ତରୀୟ ପଞ୍ଚାୟତିରାଜ ଅନୁଷ୍ଠାନରେ ବିଭିନ୍ନ ଉନ୍ନୟନମୂଳକ କାର୍ଯ୍ୟ ପଲ୍ଲୀସଭା ଦ୍ୱାରା ମନୋନୀତ ଶ୍ରମିକ ପ୍ରତିନିଧିମାନେ କରିଥିଲେ। ସେମାନେ ଚୁଡାନ୍ତ ବିଲ୍ ପଇଠ କରିବାବେଳେ ମୋଟ ବ୍ୟୟ ଅଟକଳର ୫ ପ୍ରତିଶତ ଅମାନତ ବାବଦକୁ ବ୍ଲକ କର୍ତ୍ତୃପକ୍ଷ କାଟି ରଖିଥିଲେ। ଅଡିଟ୍ ସରିବା ପରେ ମଧ୍ୟ ଉକ୍ତ ଟଙ୍କା ଶ୍ରମିକ ପ୍ରତିନିଧିମାନଙ୍କୁ ବିଡିଓ ଫେରସ୍ତ କରୁନାହାନ୍ତି। ଅନ୍ୟପକ୍ଷରେ ୨୦୧୩ରୁ ଅମାନତ ରାଶି କାଟିବା ବ୍ୟବସ୍ଥାକୁ ପଞ୍ଚାୟତିରାଜ ବିଭାଗ ଉଠାଇ ଦେଇଛି। ତଥାପି ଉକ୍ତ ବ୍ଲକ ଅଞ୍ଚଳରେ ଶ୍ରମିକ ପ୍ରତିନିଧିମାନଙ୍କଠାରୁ ଉନ୍ନୟନ କାର୍ଯ୍ୟ ବାବଦକୁ ଅମାନତ ରାଶି କାଟି ରଖାଯାଉଛି। ୨୦୧୮ରୁ ପଞ୍ଚାୟତ ଓ ବ୍ଲକ ପକ୍ଷରୁ ଉନ୍ନୟନ କାର୍ଯ୍ୟ ବିଭାଗୀୟ ତତ୍ତ୍ୱାବଧାନରେ କରାଯାଉଛି। ଯନ୍ତ୍ରୀ, ପଞ୍ଚାୟତ କାର୍ଯ୍ୟନିର୍ବାହୀଙ୍କ ନାମରେ କାର୍ଯ୍ୟାଦେଶ ରହୁଥିବାରୁ ସେମାନଙ୍କ ଅମାନତ ରାଶିକୁ ଠିକ୍ ସମୟରେ ଫେରସ୍ତ କରି ଦିଆଯାଉଛି। ହେଲେ ଅତୀତରେ ଥିବା ଟଙ୍କା ବିଡିଓ କାହା ସ୍ବାର୍ଥରେ ଅଟକାଇ ରଖିଛନ୍ତି, ତାର ଉଚ୍ଚସ୍ତରୀୟ ତଦନ୍ତ ପାଇଁ ଦାବି ହୋଇଛି। ମୁଖ୍ୟ ଉନ୍ନୟନ ଅଧିକାରୀ କର ଅଭିଯୋଗପତ୍ରକୁ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ ନିମନ୍ତେ ବିଡିଓଙ୍କ ନିକଟକୁ ପଠାଇ ଦେଇଥିବା ଜଣାପଡିଛି। ଅପରପକ୍ଷରେ ଅମାନତ ରାଶି ଫେରସ୍ତ ହୋଇ ନ ଥିବା କଥା ବିଡିଓ ରାଜୀବ ଲୋଚନ ପରିଡ଼ା ସ୍ବୀକାର କରିଛନ୍ତି।
