ନୂଆଦିଲ୍ଲୀ,୪ ।୧୦: ଗତ ସପ୍ତାହରେ ଲଗାତାର ୪ ଦିନର ବର୍ଷା ପରେ ରାଜଧାନୀ ଦିଲ୍ଲୀରେ ବଢିଯାଇଛି ଡେଙ୍ଗୁ ରୋଗୀଙ୍କ ସଂଖ୍ୟା । ଗତ ସପ୍ତାହ ତୁଳନାରେ ଚଳିତ ସପ୍ତାହରେ ଏଠାରେ ଡେଙ୍ଗୁ ରୋଗୀଙ୍କ ସଂଖ୍ୟା ୪ ଗୁଣା ବୃଦ୍ଧି ପାଇଛି । ଏମସିଡିର ରିପୋର୍ଟ ଅନୁଯାୟୀ, ୨୧-୨୮ ସେପ୍ଟେମ୍ବର ମଧ୍ୟରେ ୪୧୨ ନୂଆ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । ଗତ ସପ୍ତାହରେ ଆସଥିବା ୧୨୯ ରୋଗୀଙ୍କ ତୁଳନାରେ ଏହା ୪ ଗୁଣା ଅଧିକ । ଚଳିତ ବର୍ଷ ମୋଟ ଡେଙ୍ଗୁ ରୋଗୀଙ୍କ ସଂଖ୍ୟା ୯୩୭ ହୋଇଛି ଯାହା ଗତ ୫ବର୍ଷ ମଧ୍ୟରେ ୨୮ ସେପ୍ଟେମ୍ବର ପର୍ଯ୍ୟନ୍ତ ୫ ଗୁଣା ଅଧିକ ବୋଲି କୁହାଯାଉଛି ।
ସୂଚନାଯୋଗ୍ୟ, ଲଗାତାର ବର୍ଷା ହେବା ଫଳରେ ଡେଙ୍ଗୁ କରାଉଥିବା ଏଡିଜ ମଶାଙ୍କୁ ପ୍ରଜନନ ପାଇଁ ସଫା ପାଣି ମିଳିଯିବା ଫଳରେ ଏମାନଙ୍କ ପ୍ରସାର ଦ୍ରୁତ ଗତିରେ ହେଲା । ପାଣିପାଗ ବିଭାଗ କହିଛି ଦୁଇ ଦିନ ପରେ ପୁଣି ବର୍ଷା ହେବର ସମ୍ଭାବନା ରହିଛି । ତେଣୁ ଏହାପରେ ଡେଙ୍ଗୁ ରୋଗୀଙ୍କ ସଂଖ୍ୟା ଆହୁରି ବଢିପାରେ ବୋଲି ଅନୁମାନ କରାଯାଉଛି । ଏପଟେ ସ୍ୱାସ୍ଥ୍ୟ ବିଶେଷଜ୍ଞ କହିଛନ୍ତି ଏବେ ଡେଙ୍ଗୁରେ ପୀଡ଼ିତ ଯେତିକି ଲୋକ ହସ୍ପିଟାଲରେ ଭର୍ତ୍ତି ହୋଇଛନ୍ତି ତା’ଠାରୁ ଢେର ଅଧିକ ଡେଙ୍ଗୁରେ ପୀଡ଼ିତ ହୋଇଛନ୍ତି । ଏମସିଡି ଦିଲ୍ଲୀର ପ୍ରାୟ୨୫୦ ସ୍ଥାନକୁ ମଶାଙ୍କ ପ୍ରଜନନ ସ୍ଥାନ ଭାବେ ହଟସ୍ପଟ ଘୋଷଣା କରିଛି ।
