ନୂଆଦିଲ୍ଲୀ,୧୧ା୯(ପି.ଟି.) : ଜି୨୦ ସମ୍ମିଳନୀର ଶେଷ ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାତିସଂଘ ସୁରକ୍ଷା ପରିଷଦ (ୟୁଏନ୍ଏସ୍ସି)ର ସମ୍ପ୍ରସାରଣ ଦାବିକୁ ଦୋହରାଇବା ସହ ବିଶ୍ୱର ନୂଆ ବାସ୍ତବତାର ପ୍ରତିଫଳନ ଲାଗି ବୈଶ୍ୱିକ ଅନୁଷ୍ଠାନଗୁଡ଼ିକରେ ସଂସ୍କାର ପାଇଁ ପ୍ରସ୍ତାବ ଦେଇଥିଲେ। ଅନେକ ସ୍ପଷ୍ଟ ଓ ବାସ୍ତବ ପ୍ରଭାବ ସୁନିଶ୍ଚିତ କରିଥିବା ଭାରତର ଜି୨୦ ଅଧ୍ୟକ୍ଷତାକୁ ବିଶ୍ୱ ନେତାମାନେ ଉଚ୍ଚ ପ୍ରଶଂସା କରିଛନ୍ତି। ବିକାଶଶୀଳ ଅର୍ଥନୀତିଗୁଡ଼ିକର ସ୍ବାର୍ଥକୁ ନେଇ ଭାରତ ସ୍ବର ଉଠାଇଥିବାରୁ ବ୍ରାଜିଲ ରାଷ୍ଟ୍ରପତି ଲୁଇଜ୍ ଇନାସିଓ ଲୁଲା ଡା ସିଲ୍ଭା ଏହାର ପ୍ରଶଂସା କରିଥିଲେ। ଜାତିସଂଘ ସୁରକ୍ଷା ପରିଷଦରେ ନୂଆ ବିକାଶଶୀଳ ଦେଶଗୁଡ଼ିକୁ ସ୍ଥାୟୀ ଓ ଅସ୍ଥାୟୀ ସଦସ୍ୟତା ମିଳିବା ରାଜନୈତିକ ସାମର୍ଥ୍ୟ ବଢ଼ାଇବା ସହ ବିଶ୍ୱ ବ୍ୟାଙ୍କ ଏବଂ ଅନ୍ତର୍ଜାତୀୟ ମୁଦ୍ରାପାଣ୍ଠିରେ ସେମାନଙ୍କ ପ୍ରତିନିଧିତ୍ୱ ବଢ଼ାଇବ ବୋଲି ଲୁଲା କହିଥିଲେ।
ଦିଲ୍ଲୀରେ ଅନୁଷ୍ଠିତ ଦୁଇଦିନିଆ ଜି୨୦ ସମିଟ୍ ରବିବାର ଶେଷ ହୋଇଛି। ସମ୍ମିଳନୀର ଉଦ୍ଯାପନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଂସ୍କୃତ ଶ୍ଳୋକ ଆବୃତ୍ତି କରି ସାରା ବିଶ୍ୱ ପାଇଁ ଶାନ୍ତି କାମନା କରିଥିଲେ। ଅଧିବେଶନ ଶେଷରେ ମୋଦି ବ୍ରାଜିଲ ରାଷ୍ଟ୍ରପତି ଲୁଲା ଡା ସିଲ୍ଭାଙ୍କୁ ଗାଭେଲ ହସ୍ତାନ୍ତର କରିଛନ୍ତି। ଭୂରାଜନୈତିକ ପ୍ରସଙ୍ଗ ଜି୨୦ ଆଲୋଚନାକୁ ପଥଚ୍ୟୁତ ନ କରୁ ବୋଲି ଆସନ୍ତା ବର୍ଷ ପାଇଁ ବ୍ରାଜିଲ ଜି୨୦ର ଅଧ୍ୟକ୍ଷତା ଗ୍ରହଣ କରିବା ଅବସରରେ ଲୁଲା କହିଥିଲେ। ଦ୍ୱନ୍ଦ୍ୱ ବଦଳରେ ଆମେ ଶାନ୍ତି ଓ ସହଯୋଗ ଚାହୁଁ ବୋଲି ବ୍ରାଜିଲ ରାଷ୍ଟ୍ରପତି ମତ ଦେଇଥିଲେ। ରବିବାର ଉଦ୍ଯାପନୀ ଅଧିବେଶନରେ ପ୍ରଧାନମନ୍ତ୍ରୀ ମୋଦି ସମିଟ୍ରେ ନିଆଯାଇଥିବା ନିଷ୍ପତ୍ତି କାର୍ଯ୍ୟକାରିତାର ଅଗ୍ରଗତି ସମୀକ୍ଷା କରିବା ଲାଗି ନଭେମ୍ବର ଶେଷ ଭାଗରେ ଜି୨୦ର ଭର୍ଚୁଆଲ୍ ସମିଟ୍ ଆୟୋଜନ ଲାଗି ପ୍ରସ୍ତାବ ଦେଇଥିଲେ। ନୂଆ ବୈଶ୍ୱିକ ଢାଞ୍ଚାରେ ବିଶ୍ୱର ନୂଆ ବାସ୍ତବତାର ପ୍ରତିଫଳନ ପାଇଁ ପ୍ରଧାନମନ୍ତ୍ରୀ ଆହ୍ବାନ ଦେବା ସହ ଜାତିସଂଘ ଭଳି ବୈଶ୍ୱିକ ଅନୁଷ୍ଠାନଗୁଡ଼ିକରେ ସଂସ୍କାର ଲାଗି ପ୍ରସ୍ତାବ ରଖିଥିଲେ। ତେବେ ଭାରତର ଜି୨୦ ଅଧ୍ୟକ୍ଷତା ଆନୁଷ୍ଠାନିକ ଭାବେ ନଭେମ୍ବର ୩୦ ପର୍ଯ୍ୟନ୍ତ ରହିବ।
ଭାରତ ମଣ୍ଡପମ୍ରେ ଚାରା ରୋପଣ
ଜି୨୦ ସମ୍ମିଳନୀ ଆୟୋଜନ ସ୍ଥଳ ଭାରତ ମଣ୍ଡପମ୍ର ସମ୍ମିଳନୀ କେନ୍ଦ୍ରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଜି୨୦ ନେତାମାନେ ପ୍ରତୀକାତ୍ମକ ବୃକ୍ଷରୋପଣ ଉତ୍ସବରେ ସାମିଲ ହୋଇଥିଲେ। ‘ଏକ ଭବିଷ୍ୟତ’ ଶୀର୍ଷକ ଉପରେ ସମିଟ୍ର ତୃତୀୟ ଅଧିବେଶନ ଆରମ୍ଭ ସମୟରେ ଇଣ୍ଡୋନେସିଆ ରାଷ୍ଟ୍ରପତି ଜୋକୋ ଓ୍ବିଡୋଡୋ ଏବଂ ତାଙ୍କ ବ୍ରାଜିଲ ପ୍ରତିପକ୍ଷ ଲୁଲା ଡା ସିଲ୍ଭା ମୋଦିଙ୍କୁ ସେମାନଙ୍କ ଦେଶର ଗଛ ଚାରା ପ୍ରଦାନ କରିଥିଲେ। ଜି୨୦ ପ୍ରତିନିଧି ମୁଖ୍ୟମାନେ ପ୍ରତୀକାତ୍ମକ ଚାରାରୋପଣ ଉତ୍ସବରେ ସାମିଲ ହେବା ପରିବେଶୀୟ ସଚେତନତାକୁ ଉଜ୍ଜୀବିତ କରିବାର ଏକ ସାମୂହିକ ଉଦ୍ୟମ ବୋଲି ଭାରତର ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଅରିନ୍ଦମ୍ ବାଗ୍ଚୀ କହିଛନ୍ତି।
୨ ବିଲିୟନ ଡଲାର ଯୋଗାଇବ ବ୍ରିଟେନ୍
ସ୍ବଚ୍ଛ ଜଳବାୟୁ ପାଣ୍ଠିକୁ ବ୍ରିଟେନ୍ ସର୍ବାଧିକ ୨ ବିଲିୟନ ଡଲାର ଯୋଗାଇଦେବ ବୋଲି ରବିବାର ପ୍ରତିଶ୍ରୁତି ଦେଇଛି। ଜଳବାୟୁ ପରିବର୍ତ୍ତନର ମୁକାବିଲାରେ ଏହା ସହାୟକ ହେବ। ଜଳବାୟୁ ପରିବର୍ତ୍ତନର ପ୍ରଭାବ ହ୍ରାସ ଏବଂ ବିଶ୍ୱର ସବୁଠୁ ଅସୁରକ୍ଷିତ ଲୋକମାନଙ୍କ ସହାୟତା ଲାଗି ପ୍ରଧାନମନ୍ତ୍ରୀ ଋଷି ସୁନକ୍ ଏହି ସହାୟତା ଘୋଷଣା କରିଥିବା ବ୍ରିଟିଶ ହାଇ କମିଶନ କହିଛନ୍ତି।
ବିଆର୍ଆଇରୁ ଓହରିଲା ଇଟାଲୀ
ଚାଇନାର ବେଲ୍ଟ ଆଣ୍ଡ ରୋଡ୍ ଇନିସିଏଟିଭ୍ (ବିଆର୍ଆଇ)ରୁ ଇଟାଲୀ ଓହରିଯିବାକୁ ନିଷ୍ପତ୍ତି ନେଇଥିବା ଏହାର ପ୍ରଧାନମନ୍ତ୍ରୀ ଜିଓର୍ଜିଆ ମେଲୋନି ଚାଇନା ପ୍ରଧାନମନ୍ତ୍ରୀ ଲି କିଆଙ୍ଗ୍ଙ୍କୁ ଜଣାଇଦେଇଛନ୍ତି। ଜି୨୦ ସମିଟ୍ ଅବସରରେ ଇଟାଲୀର ଏହି ନିଷ୍ପତ୍ତି ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କୁ ଶକ୍ତ ଧକ୍କା ହୋଇଛି। ବେଜିଂ ତୃତୀୟ ବେଲ୍ଟ ଆଣ୍ଡ୍ ରୋଡ୍ ଫୋରମ୍ ପାଇଁ ବିଶ୍ୱ ନେତାମାନଙ୍କ ସମ୍ମିଳନୀର ଆୟୋଜନ କରିବାକୁ ଯାଉଥିବାବେଳେ ବିଆର୍ଆଇରୁ ଓହରିଯିବାକୁ ଇଟାଲୀ ନିଷ୍ପତ୍ତି ନେଇଛି।
