ଛତ୍ରପୁର,୧୬। ୮(ଡି.ଏନ୍.ଏ.): ଗଞ୍ଜାମ ଜିଲାରେ ୭୮ ପ୍ରତିଶତ ଜମିରେ ତଳି ନଷ୍ଟ ହୋଇଯାଇଥିବାରୁ ପ୍ରଶାସନ ତୁରନ୍ତ ମରୁଡ଼ି ଘୋଷଣା କରିବା ସହ ଫସଲ ବୀମା ଋଣ ଛାଡ ନେଇ ଋଷିକୁଲ୍ୟା ରୟତ ମହାସଭା ପକ୍ଷରୁ ଦାବି ହୋଇଛି । ଏ ନେଇ ଛତ୍ରପୁର ସ୍ଥିତି ପିଏନ୍ୟୁ କଲେଜ ପରିସରରେ ଆୟୋଜିତ ଖବରଦାତା ସମ୍ମିଳନୀରେ ଋଷିକୁଲ୍ୟା ରୟତ ମହାସଭା ପକ୍ଷରୁ ଦାବି ଉପସ୍ଥାପନା କରାଯିବା ସହ ବହୁ ଅଞ୍ଚଳରୁ ପୋଡିଯାଇଥିବା ତଳିର ନମୂନା ସଂଗ୍ରହ ହୋଇଛି । କୃଷି ପ୍ରଧାନ ଜିଲା ହୋଇଥିବା ବେଳେ ମାତ୍ର ୩୫ ପ୍ରତିଶତ ଜମିକୁ ଜଳସେଚନ ସୁବିଧା ରହିଛି। ବର୍ଷା ହେଉ ନ ଥିବା ବେଳେ ତଳିଗୁଡ଼ିକ ପୋଡି ନଷ୍ଟ ହୋଇ ଗଲାଣି । ଶ୍ରାବଣମାସ ଶେଷ ହେବାକୁ ଯାଉଥିବା ବେଳେ ଜମିରେ ଉପଯୁକ୍ତ ପାଣି ନ ଥିବାରୁ ଚାଷ କାର୍ଯ୍ୟ ଆଗେଇ ପାରୁନାହିଁ । ବର୍ତ୍ତମାନ ଜିଲାର ବହୁ ବ୍ଲକରେ ଜମି ଫାଟି ଆଁ ହେବା ସହ ତଳିଗୁଡିକ ପୋଡି ନଷ୍ଟ ହୋଇଗଲାଣି । ଏହି ଖବରଦାତା ସମ୍ମିଳନୀରେ ଋଷିକୁଲ୍ୟା ରୟତ ମହାସଭା ସମ୍ପାାଦକ ସିମାଞ୍ଚଳ ନାହାକ, ଉପଦେଷ୍ଠା ରାଜେନ୍ଦ୍ର ଦାଶ, ଟି.କିଷ୍ଣା ରାଓ, ଶରତ ଚନ୍ଦ୍ର ପଟନାୟକ, କିଶୋର ଚନ୍ଦ୍ର ପଣ୍ଡା ପ୍ରମୁଖ ଉପସ୍ଥିତ ଥିଲେ।
