ପୁରୁଷୋତ୍ତମପୁର,୨୪ା୭(ସୀମାଞ୍ଚଳ ମିଶ୍ର): ହିନ୍ଦୁସମାଜର ଆରାଧ୍ୟଠାକୁର ଜଗନ୍ନାଥ ମହାପ୍ରଭୁଙ୍କ ସମ୍ପତ୍ତି ଜବରଦଖଲକାରୀଙ୍କ କବଳରୁ ଉଦ୍ଧାର କରି ମନ୍ଦିରକୁ ହସ୍ତାନ୍ତର କରିବାକୁ ନେଇ ଗଞ୍ଜାମ ଜିଲା ପୁରୁଷୋତ୍ତମପୁରରେ ଦାବି ଜୋର ଧରିଛି। ଏଥିନେଇ ଜଗନ୍ନାଥପ୍ରେମୀ ଭକ୍ତମାନେ ତହସିଲ କାର୍ଯ୍ୟାଳୟ ଆସି ଜବରଦଖଲକାରୀଙ୍କଠାରୁ ଜଗନ୍ନାଥଙ୍କ ଘରବାଡ଼ି, ଜାଗା, ଜମି ଉଦ୍ଧାର କରି ତୁରନ୍ତ ଜଗନ୍ନାଥ ମନ୍ଦିରକୁ ପ୍ରଦାନ କରିବାକୁ ଦାବି କରିଛନ୍ତି। ନଚେତ୍ ଆଗାମୀ ଦିନରେ ଆନ୍ଦୋଳନ ଲାଗି ରାଜରାସ୍ତାକୁ ଓହ୍ଲାଇବେ ବୋଲି ରୋକଠୋକ୍ ଭାବରେ ଚେତାବନୀ ଦେଇଛନ୍ତି। ଏହାସହ ଏକ ସ୍ମାରକପତ୍ର ଅତିରିକ୍ତ ତହସିଲଦାର ସଙ୍ଗୀତାସେଠୀଙ୍କୁ ପ୍ରଦାନ କରିଥିବା ବେଳେ ଗଞ୍ଜାମ ଜିଲାପାଳ, ଆଇନମନ୍ତ୍ରୀ,ରାଜସ୍ବମନ୍ତ୍ରୀ,ହିନ୍ଦୁ ଦୋବୋତ୍ତର କମିଶନର, ସହକାରୀ ଦେବୋତ୍ତର କମିଶନର, ପୁରୁଷୋତ୍ତମପୁର ଏନ୍ଏସି ନିିର୍ବାହୀ ଅଧିକାରୀଙ୍କ ନିକଟକୁ ମଧ୍ୟ ସ୍ମାରକପତ୍ର ପଠାଇ ପଦକ୍ଷେପ ନେବାକୁ ଦାବିକରିଛନ୍ତି।
ଗୁରୁବାର ପୁରୁଷୋତ୍ତମପୁରର ଜନସାଧାରଣ ଓ ଜଗନ୍ନାଥଙ୍କ ଭକ୍ତମାନେ ଏକତ୍ରହୋଇ ରଥସାହି ଜଗନ୍ନାଥମନ୍ଦିରଠାରୁ ଶୋଭାଯାତ୍ରାରେ ତହସିଲ କାର୍ଯ୍ୟାଳୟକୁ ଆସିଥିଲେ। ପୁରୁଷୋତ୍ତମପୁର ମୌଜାର ରଥସାହିରେ ବିଜେ ପ୍ରଭୁ ଜଗନ୍ନାଥଙ୍କ ସର୍ବସାଧାରଣ ଖାତା ୧୭୮୯ରେ ଦେବସ୍ଥଳୀ ବର୍ଣ୍ଣିତ ରହିଥିବା ୧୦ଟି ଘରବାଡ଼ି ପ୍ଲଟଜାଗାକୁ କିଛି ବ୍ୟକ୍ତି ଓ ବିଦ୍ୟୁତ୍ ବିଭାଗ ବେଇଆନ ଭାବରେ ଜବରଦଖଲ କରିଛନ୍ତି। ଏହାସହ ପୁରୁଷୋତ୍ତମପୁର ପୁରୁଣା ଜଗନ୍ନାଥ ସାହି ନଇତଡ଼ ସାହିରେ ଜଣେ ବଦାନ୍ୟ ବ୍ୟକ୍ତି ଦୀର୍ଘବର୍ଷ ପୂର୍ବେ ଜଗନ୍ନାଥଙ୍କୁ ଦାନ କରିଥିବା ଘରବାଡ଼ି ଜାଗାକୁ ମଧ୍ୟ ଜନୈକ ଜବରଦଖଲ କରି ରଖିଛନ୍ତି। ଏହି ସମ୍ଭ୍ରାନ୍ତଶ୍ରେଣୀର ବ୍ୟକ୍ତିମାନେ ଏପରି ମନ୍ଦିର ସମ୍ପତ୍ତିକୁ କବ୍ଜା କରି ନେବାରେ ଲାଗିଥିବାରୁ ମନ୍ଦିରର ସମ୍ପତ୍ତି ଲୋପ ପାଇବାରେ ଲାଗିଛି। ମନ୍ଦିର ଉନ୍ନୟନମୂଳକ କାର୍ଯ୍ୟରେ ଘୋର ବାଧକ ସାଜିଛି ବୋଲି କ୍ଷୋଭର ସହ ଜନସାଧାରଣ ଅଭିଯୋଗ କରିଛନ୍ତି।
