ପୁରୀ ଅଫିସ,୨୦ା୧: ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଡାକୋଟା ବିମାନକୁ ପୁରୀ ଆଣିବା ଓ ତାଙ୍କର ଏକ ନୂଆ ସ୍ମୃତି ପୀଠ ସ୍ଥାପନ କରିବାକୁ ଦାବି କରି ଶ୍ରୀଜଗନ୍ନାଥ ସେନା ପକ୍ଷରୁ ଗୁରୁବାର ବିଜୁବାବୁଙ୍କ ଅସ୍ଥି ଥିବା ଅର୍ବାନ ହାଟରେ ଦାବି କରାଯାଇଛି। ଶ୍ରୀଜଗନ୍ନାଥ ସେନାର ଆବାହକ ପ୍ରିୟଦର୍ଶନ ପଟ୍ଟନାୟକ କହିଛନ୍ତି, ବିଜୁ ବାବୁ କୌଣସି ଦଳର ନୁହନ୍ତି। ସେ ସମଗ୍ର ଦେଶର ସମ୍ପତ୍ତି। ତାଙ୍କର ପ୍ରିୟ ଡାକୋଟା ବିମାନ ଓଡ଼ିଶା ଫେରିଛି ଯାହା ଖୁସିର କଥା। ମାତ୍ର ବିଜୁ ବାବୁଙ୍କ ଡାକୋଟା ବିମାନକୁ ପୁରୀ ଅଣାଯାଇ ପୁରୀରେ ସଂଗ୍ରହାଳୟ କରାଯାଇ ତାକୁ ରଖାଯାଉ। କାରଣ ପୁରୀ ଏକ ଧାର୍ମିକ ତଥା ପର୍ଯ୍ୟଟନ ସ୍ଥଳ ପୁରୀକୁ ହଜାର ହଜାର ଭକ୍ତ ଓ ପର୍ଯ୍ୟଟକ ବୁଲିବାକୁ ଆସିଥାନ୍ତି। ତେଣୁ ଡାକୋଟାକୁ ପୁରୀରେ ରଖାଗଲେ ବିମାନଟିକୁ ଧନୀ ଗରିବ, ଦେଶୀ ଓ ବିଦେଶୀ ଲୋକ ଦେଖିପାରିବେ। ମାତ୍ର ସରକାର ଯେଉଁ ନିଷ୍ପତ୍ତି ନେଇଛନ୍ତି ବିମାନଟିକୁ ଭୁବନେଶ୍ୱର ବିମାନବନ୍ଦର ପରିସରରେ ରଖିବେ ସେଠାରେ କେବଳ ବିମାନ ଯାତ୍ରୀମାନେ ଦେଖିପାରିବେ। ମାତ୍ର ସମସ୍ତେ ଦେଖିପାରିବେ ନାହିଁ। ସେହିପରି ବିମାନ ଯାତ୍ରା କରୁଥିବା ଯାତ୍ରୀମାନେ ଯିବାଆସିବା ବେଳେ ତରବର ହୋଇ ରହୁଥିବାରୁ ବ୍ୟବସ୍ଥା ଭିତରେ ଦେଖିପାରିବେ ନାହିଁ। ସେହିପରି ଗରିବ ଲୋକ କେବେ ମଧ୍ୟ ବିମାନରେ ଯାତ୍ରା କରେ ନାହିଁ ତେଣୁ ସେମାନେ ଡାକୋଟା ଦେଖିବାକୁ ବଞ୍ଚତ୍ତ ହେବେ। ତେବେ ବିଜୁ ବାବୁଙ୍କ ଡାକୋଟା ବିମାନ ଫେରାଇ ଆଣିବା ପାଇଁ ଶ୍ରୀଜଗନ୍ନାଥ ସେନା ପକ୍ଷରୁ ପଲ୍ଲୀଠାରୁ ଦିଲ୍ଲୀ ପର୍ଯ୍ୟନ୍ତ ଲଢେଇ କରିଥିଲା। କେନ୍ଦ୍ରୀୟ ବିମାନ ଚଳାଚଳ ମନ୍ତ୍ରୀ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କୁ ଭେଟି ଏସମ୍ପର୍କରେ ଦାବିପତ୍ର ପ୍ରଦାନ କରାଯାଇଥିଲା। ୨୦୧୯ରେ କେନ୍ଦ୍ରୀୟ ବିମାନ ଚଳାଚଳ ମନ୍ତ୍ରାଳୟ ଚିଠି ମାଧ୍ୟମରେ ସୂଚନା ଦେଇଥିଲେ ଯେ, ରାଜ୍ୟ ସରକାରଙ୍କ ସହ ମିଶି ବିମାନଟିକୁ ଦର୍ଶନୀୟ ସ୍ଥାନରେ ରଖାଯାଉ। ଫଳରେ ଲୋକମାନେ ଐତିହାସିକ ବିମାନକୁ ଦେଖିବା ସହ ବିଜୁ ବାବୁଙ୍କ ବୀରତ୍ୱ ସମ୍ପର୍କରେ ସୂଚନା ପାଇବେ।
