ଥୁଆମୂଳ ରାମପୁର,୨୯।୫(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ସଦର ମହକୁମା ଗ୍ରାମ ପଞ୍ଚାୟତରେ କନିଷ୍ଠ ଯନ୍ତ୍ରୀ (ଜେଇ) ସତ୍ୟନାରାୟଣ ବେହେରାଙ୍କ ଅକାରଣ ବଦଳିକୁ ନେଇ ଜନଅସନ୍ତୋଷ ତୀବ୍ର ହେବାରେ ଲାଗିଛି । ଜଣେ ଦକ୍ଷ ଓ ସ୍ୱଚ୍ଛ ଅଧିକାରୀ ଭାବେ ଜନପ୍ରିୟ ଥିବା ସତ୍ୟନାରାୟଣଙ୍କ ସମୟରେ ମନରେଗା ଓ ଆବାସ ଯୋଜନା ଭଳି କାର୍ଯ୍ୟ ସୁରୁଖୁରୁରେ ଚାଲୁଥିଲା। ମାତ୍ର ପ୍ରଶାସନର ମନମୁଖୀ ନିଷ୍ପତ୍ତି କ୍ରମେ ତାଙ୍କ ସ୍ଥାନରେ ପ୍ରତାପ ସାହୁଙ୍କୁ ଦାୟିତ୍ୱ ଦେବା ପରଠାରୁ ପଞ୍ଚାୟତର ସମସ୍ତ ଉନ୍ନୟନମୂଳକ କାର୍ଯ୍ୟ ଠପ୍ ହୋଇଯାଇଥିବା ଏବଂ ଶ୍ରମିକମାନେ ପ୍ରାପ୍ୟରୁ ବଞ୍ଚିତ ହେଉଥିବା ଅଭିଯୋଗ ହୋଇଛି।
ଏହି ସ୍ୱେଚ୍ଛାଚାରିତା ବିରୋଧରେ ଗତ ୧୮ ତାରିଖ ଦିନ ପଞ୍ଚାୟତର ୧୨ଟି ଗ୍ରାମର (ମୋତାଚୁଆଁ, କୋଷାବରା, ତେରଙ୍ଗାସିଲ, କାଠକୁରା, ପୋଖରା, ଥୁଆମୂଳ ରାମପୁର, ପୋଇଗୁଡ଼ା, ଦେରଗୁଡ଼ା, ଟିକ୍ରାଗୁଡ଼ା, ମେଳକୁନ୍ଦେଲ, ବଡ଼ବଣ୍ଡେଲ ଓ ପିଣ୍ଡାପଦର) ଶତାଧିକ ଗ୍ରାମବାସୀ ଏବଂ ଗାଁ ସାଥୀମାନେ ବ୍ଲକ କାର୍ଯ୍ୟାଳୟରେ ବିଡ଼ିଓଙ୍କୁ ଗୁହାରି ଜଣାଇଥିଲେ । ମାତ୍ର ୧୧ ଦିନ ବିତିଯାଇଥିଲେ ହେଁ ବିଡ଼ିଓ ଧ୍ରୁବ ଚରଣ ମୁଦୁଲି କୌଣସି ସନ୍ତୋଷଜନକ ପଦକ୍ଷେପ ନେଇନଥିବାରୁ ଅଞ୍ଚଳରେ ଚାପା ଉତ୍ତେଜନା ଦେଖାଦେଇଛି।
ସୁରେନ୍ଦ୍ର ନାଏକ, ହିରନ୍ ନାଏକ, କୌଶଲ୍ୟା ନାଏକ, ବଳରାମ ମାଝୀ, ପ୍ରଦୀପ କୁମାର ନାଏକ, ଗାଁ ସାଥି ଅଙ୍ଗଦ ନାଏକ, ସୁଶାନ୍ତ ନାଏକ, ଲଛମନ ନାଏକ, ମୋହନ ମାଝୀ, ଗାଁ ସାଥୀ ଡମ୍ବରୁଧର ନାଏକ, ରଘୁମଣି ନାଏକ, ଗାଁ ସାଥୀ ଅଜୟ ମାଝୀ, ଗାଁ ସାଥୀ ବଳଭଦ୍ର ନାଏକ, ଉଗ୍ରେଶନ୍ ନାଏକ, କୈଳାଶ ଚନ୍ଦ୍ର ନାଏକ, ଲିପୁନ୍ ନାଏକ ଓ ଧର୍ମେନ୍ଦ୍ର ନାଏକଙ୍କ ସମେତ ସ୍ଥାନୀୟ ଜନସାଧାରଣ ଚେତାବନୀ ଦେଇଛନ୍ତି ଯେ, ଯଦି ତୁରନ୍ତ ସତ୍ୟନାରାୟଣ ବେହେରାଙ୍କୁ ପୁନଃ ପଞ୍ଚାୟତ ଦାୟିତ୍ୱ ପ୍ରଦାନ କରାନଯାଏ, ତେବେ ଆଗାମୀ ଦିନରେ ସମସ୍ତ ଅଞ୍ଚଳବାସୀ ରାଜରାସ୍ତାକୁ ଓହ୍ଲାଇବା ସହ ବ୍ଲକ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନ କରିବେ ।
ଅପରପକ୍ଷରେ ଏନେଇ ପଚାରିବାରୁ ବିଡ଼ିଓ “ଆମେ ଦେଖିବୁ କ’ଣ ହୋଇପାରିବ କରିବୁ” ବୋଲି କହି ପ୍ରସଙ୍ଗକୁ ଏଡ଼ାଇ ଯାଇଛନ୍ତି । ତେବେ ଦେଖିବାକୁ ବାକି ରହିଲା ଖବର ପ୍ରସାର ପରେ ବର୍ତ୍ତମାନର ଯନ୍ତ୍ରୀ ପ୍ରତାପ ସାହୁଙ୍କୁ ଏହି ପଞ୍ଚାୟତରୁ ହଟାଇ ପୂର୍ବ ଯନ୍ତ୍ରୀ ସତ୍ୟ ନାରାୟଣ ବେହେରାଙ୍କୁ ପୁନଃ ନିଯୁକ୍ତି ଦେଉଛନ୍ତି ନା ନାହିଁ ସେଥିରୁ ଅନୁମାନ କରାଯିବ ଏହି ପଞ୍ଚାୟତର ବିକାଶ କଥା ବ୍ଲକ୍ ପ୍ରଶାସନ କେମିତି ବୁଝୁଛନ୍ତି ।
