ନାଉଗାଁ,୧୧ା୪(ସ୍ବ.ପ୍ର.): ନାଉଗାଁ ବ୍ଲକ ଅନ୍ତର୍ଗତ କୋକିଢ଼ିହ-ତେଲସରା ରାସ୍ତାଟି ପୂର୍ତ୍ତ ବିଭାଗ ଅଧୀନରେ ରହିଛି। ଏହି ରାସ୍ତାଟି ୧୨ କି.ମି. ଦୈର୍ଘ୍ୟ ହୋଇଥିବା ବେଳେ ବର୍ତ୍ତମାନ ଏହାର ସମ୍ପ୍ରସାରଣ ଓ ନିର୍ମାଣ କାର୍ଯ୍ୟ ଜାରି ରହିଛି। ଏହି ରାସ୍ତା ଦେଇ ଚାଷ ଜମିରୁ ବର୍ଷାଦିନେ ଗୋବରୀ ନଦୀକୁ ଜଳ ନିଷ୍କାସନ ପାଇଁ ବିଭିନ୍ନ ସ୍ଥାନରେ ୧୭ଟି କଲଭର୍ଟ ରହିଛି। ଉକ୍ତ କଲଭର୍ଟଗୁଡ଼ିକ ମଧ୍ୟରୁ ଅଧିକାଂଶ ବିପର୍ଯ୍ୟସ୍ତ ଅବସ୍ଥାରେ ରହିଛି। ଅଧିକାଂଶ କଲଭର୍ଟ ପୋତିହୋଇଯିବା ଯୋଗୁ ବର୍ଷାଦିନେ ଚାଷଜମିରୁ ଜଳ ନିଷ୍କାସନ ହୋଇପାରୁନାହିଁ। ଫଳରେ ଚାଷୀ କ୍ଷତିଗ୍ରସ୍ତ ହେଉଥିବାର ଜଣାଯାଇଛି। ଗଙ୍ଗଦାହାଟ ନିକଟରେ ଉକ୍ତ ରାସ୍ତାରେ ଥିବା କଲଭର୍ଟଟିକୁ ଉକ୍ତ ବଜାରର କେତେଜଣ ଦୋକାନୀ ଜବରଦଖଲ କରି ରଖିଥିବାରୁ ତାହା ପୋତି ହୋଇଗଲାଣି। ଏଥିଯୋଗୁ କଲଭର୍ଟଟି ବିପର୍ଯ୍ୟସ୍ତ ଅବସ୍ଥାରେ ରହିଥିବା ବେଳେ ଜଳ ନିଷ୍କାସନ ହୋଇପାରୁନାହିଁ। ସେହିପରି ତେଣ୍ଟୋଇ ନିକଟରେ ଥିବା କଲଭର୍ଟଟି ଦବି ରାସ୍ତା ଉପରେ ଖାଲ ହୋଇଥିବା ଦେଖିବାକୁ ମିଳିଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଏହି ରାସ୍ତାଟି ପୂର୍ବରୁ ୩.୭୫ ମିଟର ପ୍ରସ୍ଥ ରହିଥିଲା। ପୂର୍ତ୍ତ ବିଭାଗ ପକ୍ଷରୁ ସମ୍ପ୍ରସାରଣ ଓ ପୁନଃ ନିର୍ମାଣ ଫଳରେ ଉକ୍ତ ରାସ୍ତାର ପ୍ରସ୍ଥ ୫.୭୫ କରାଯାଉଛି। ତାହା ସହିତ ରାସ୍ତାର ଦୁଇପାର୍ଶ୍ୱରେ ୧ ମିଟର ଲେଖାଏ ପାଦଚଲା ରାସ୍ତା ନିର୍ମାଣ କରାଯିବ। ଏହି ରାସ୍ତା ନିର୍ମାଣ ପରେ ରାସ୍ତା ଚଉଡ଼ା ହୋଇ ୭.୭୫ ମିଟର ହେବ। ରାସ୍ତା ଚଉଡା ହେବା ଫଳରେ ପୂର୍ବରୁ ନିର୍ମିତ କଲଭର୍ଟଗୁଡ଼ିକ ରାସ୍ତା ଭିତରେ ବା ଅଣଓସାରିଆ ହୋଇ ରହିଯିବ। ଉକ୍ତ ରାସ୍ତାର ଦୁଇପାର୍ଶ୍ୱରେ କୋରୁଅ, ତିରୁଣା, ବାଂଶ, ନାଉଗଁା, ଡେରିକି ଆଦି ପଞ୍ଚାୟତର ଗ୍ରାମଗୁଡିକ ରହିଥିବାବେଳେ ଚାଷଜମି ରହିଛି। ବର୍ତ୍ତମାନ ରାସ୍ତା ନିର୍ମାଣ ସମୟରେ ଉକ୍ତ କଲଭର୍ଟ କାମ କରା ନ ଗଲେ ଜଳ ନିଷ୍କାସନରେ ବାଧା ଉପୁଜିବ। ତେଣୁ ବିପର୍ଯ୍ୟସ୍ତ ଥିବା କଲଭର୍ଟଗୁଡ଼ିକର କାର୍ଯ୍ୟ କରିବା ପାଇଁ ବିଷ୍ଣୁଚରଣ ବେହେରା, ରଞ୍ଜିତ ପଣ୍ଡା, ପକୁରାମ ଜେନା, ନିରଞ୍ଜନ ସାହୁ ପ୍ରମୁଖ ପ୍ରଶାସନ ନିକଟରେ ଦାବି କରିଛନ୍ତି। କଲଭର୍ଟ ନିର୍ମାଣ ବିଷୟରେ ପୂର୍ତ୍ତ ବିଭାଗର କନିଷ୍ଠ ଯନ୍ତ୍ରୀ ବଳରାମ ସ୍ବାଇଁଙ୍କୁ ପଚାରିବାରେ ଯେଉଁ କଲଭର୍ଟଗୁଡିକ ବିପଯର୍ୟସ୍ତ ଅବସ୍ଥାରେ ଅଛି ଓ ସେଥିରେ ଜଳ ନିଷ୍କାସନ ହୋଇପାରୁନାହିଁ ସେଗୁଡିକୁ ଚିହ୍ନଟ କରାଯାଇ କାମ କରାଯିବ ବୋଲି ସେ କହିଛନ୍ତି।
