ରାୟଗଡ଼ା,୨୦।୨(ଆଶିଷ ରଞ୍ଜନ ପଣ୍ଡା): ରାୟଗଡ଼ା ବ୍ଲକ୍ ଅନ୍ତର୍ଗତ ଜେମାଦେଈପେଣ୍ଠକୁ ସ୍ବତନ୍ତ୍ର ବ୍ଲକ୍ ମାନ୍ୟତା ଦାବିରେ ଅଞ୍ଚଳବାସୀ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଗୁରୁବାର ଜିଲାପାଳ ପାରୁଲ ପଟୱାରିଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଦାବିପତ୍ରରେ ୭ଟି ପଞ୍ଚାୟତର ସମସ୍ତ ଗ୍ରାମବାସୀ ଦସ୍ତଖତ କରିିଛନ୍ତି। ଏହି ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଯିବ ବୋଲି ଜିଲାପାଳ ପ୍ରତିଶ୍ରୁତି ଦେଇଛନ୍ତି।
ଅଞ୍ଚଳବାସୀଙ୍କ ଦାବିପତ୍ର ଅନୁସାରେ ରାୟଗଡ଼ା ସହରଠାରୁ ଆନ୍ଧ୍ରପ୍ରଦେଶକୁ ଯାଇଥିବା ଜାତୀୟ ରାଜପଥର ଦୁଇ ପାର୍ଶ୍ୱରେ ୭ଟି ପଞ୍ଚାୟତ ଯଥା କେରେଡ଼ା, ହାଟଶେଷଖାଲ, ଗାଜିଗାଁ, ଜେମାଦେଈପେଣ୍ଠ, ବଡ଼ଇରୁକୁବାଡ଼ି, ବୈରାଗିହାଲୁଆ ଓ ପିତାମହଲ ରହିଛି ା ଉକ୍ତ ୭ ପଞ୍ଚାୟତରେ ୧୦୦ରୁ ଊର୍ଦ୍ଧ୍ୱ ଗ୍ରାମରେ ପ୍ରାୟ ୫୦ହଜାରରୁ ଅଧିକ ଲୋକ ବସବାସ କରନ୍ତି। ତେବେ ରାୟଗଡ଼ା ବ୍ଲକ୍ ସଦର ମହକୁମାଠାରୁ ପ୍ରତ୍ୟେକ ପଞ୍ଚାୟତ ପ୍ରାୟ ୨୦ କି.ମି. ଦୂରତାରେ ଅବସ୍ଥିତ। ଉପରୋକ୍ତ ପଞ୍ଚାୟତକୁ ଗମନାଗମନର ବିଶେଷ ସୁବିଧା ନ ଥିବାରୁ ଅଞ୍ଚଳବାସୀ କୌଣସି ଜରୁରୀ କାମରେ ବ୍ଲକ୍ କାର୍ଯ୍ୟାଳୟକୁ ଆସିବାକୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଏଭଳିକି ଅଞ୍ଚଳବାସୀ ବହୁ ହଇରାଣ ହୋଇ କ୍ଲବ୍ କାର୍ଯ୍ୟାଳୟକୁ ଗଲେ ମଧ୍ୟ ସମ୍ପୃକ୍ତ ଅଧିକାରୀ ଓ କର୍ମଚାରୀମାନେ ବ୍ୟସ୍ତ ରହୁଥିବାରୁ ବିଭିନ୍ନ ସମୟରେ ଲୋକଙ୍କ କାମ ହୋଇପାରୁ ନାହିଁ। ଅନ୍ୟପକ୍ଷରେ ଜେମାଦେଈପେଣ୍ଠଠାରେ ବ୍ୟାଙ୍କ, ସରକାରୀ ଉଚ୍ଚ ବିଦ୍ୟାଳୟ, ପ୍ରାଥମିକ ବିଦ୍ୟାଳୟ, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଆଦି ରହିଛି ା ଏହାର ନିକଟସ୍ଥ ହାଟଶେଷଖାଲଠାରେ ଥାନା ମଧ୍ୟ ରହିଛି ା ଜେମାଦେଇପେଣ୍ଠ ଓ ଲାଡାଠାରେ ରେଳ ଷ୍ଟେଶନ ମଧ୍ୟ ରହିଛି ା ତେଣୁ ଜେମାଦେଇପେଣ୍ଠକୁ ବ୍ଲକ୍ ମାନ୍ୟତା ଦେଲେ ଏହି ୭ ପଞ୍ଚାୟତର ସମସ୍ତ ଗ୍ରାମବାସୀ ନିଜର ମୌଳିକ ସୁବିଧା ପାଇଁ ଦୂରରେ ଥିବା ରାୟଗଡ଼ା ଉପରେ ନିର୍ଭର କରିବାକୁ ପଡ଼ିବ ନାହିଁ ବୋଲି କହିଛନ୍ତି ା ଦାବିପତ୍ର ପ୍ରଦାନ ବେଳେ ୭ ପଞ୍ଚାୟତର ସମସ୍ତ ସରପଞ୍ଚଙ୍କ ସମେତ ଅଞ୍ଚଳବାସୀ ଉପସ୍ଥିତ ଥିଲେ।
