ନୂଆପଡ଼ା,୮ା୬ (ମକାରୁ ବେମାଲ):ନୂଆପଡ଼ା ଜିଲା ସିନାପାଲି ସହର ଗୋଡାଳ ନିକଟ ଦେଇ ଯାଇଥିବା ବିଜୁ ଏକ୍ସପ୍ରେସ ଓ୍ବେର ବ୍ୟସ୍ତବହୁଳ ଗୋଡାଳ ଛକରେ ସଦାସର୍ବଦା ବିପଦ ଲାଗିରହୁଛି। ଏହାକୁ ଦୃଷ୍ଟିରେ ରଖି ବିଭାଗୀୟ କର୍ତ୍ତୃପକ୍ଷ ଏଠାରେ ଗୋଲେଇ କିମ୍ବା ଫ୍ଲାଏଓଭର ନିର୍ମାଣ କରିବାକୁ ବିଭିନ୍ନ ମହଲରେ ଦାବି ହେଉଛି। ସୂଚନାକ୍ରମେ ଗୋଡାଳ ଛକ ଏକ ଜନଗହଳି ସ୍ଥାନ ହୋଇଥିବା ବେଳେ ଏଠାରେ ପ୍ରତ୍ୟହ ଶତାଧିକ ଯାନବାହନ ଚଳାଚଳ କରୁଛି। ଦୈନିକ ପନିପରିବା ହାଟ ସାଙ୍ଗକୁ ଅନେକ ଉଠାଦୋକାନୀ ସେମାନଙ୍କ ପସରା ମେଲାଉଛନ୍ତି। ଦକ୍ଷିଣ ଦିଗରେ ଛତିଶଗଡ଼ ରାଜ୍ୟର ଦେଭୋଗ ବ୍ଲକ ଓ ପୂର୍ବ ଦିଗରେ କଳାହାଣ୍ଡି ଜିଲାକୁ ସଂଯୋଗ କରୁଛି। ନିକଟରେ ସିନାପାଲି କଲେଜ, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ପ୍ରଥମଶ୍ରେଣୀ ବିଚାର ବିଭାଗୀୟ ଅଦାଲତ, ଉଦ୍ୟାନ ବିଭାଗ କାର୍ଯ୍ୟାଳୟ ରହିଛି। ଏଭଳି ଏକ ବ୍ୟସ୍ତବହୁଳ ଛକରେ କୌଣସି ସୁରକ୍ଷା ବ୍ୟବସ୍ଥା ନ ଥିବାରୁ ଲୋକେ ନିଜକୁ ସୁରକ୍ଷିତ ମଣୁନାହାନ୍ତି। ଏହି ସ୍ଥାନରୁ ପଡ଼ୋଶୀ ତେଲେଙ୍ଗାନା ଓ ଆନ୍ଧ୍ରପ୍ରଦେଶକୁ ପ୍ରତ୍ୟହ ବସ୍ ଚଳାଚଳ ସାଙ୍ଗକୁ ଭୁବନେଶ୍ୱର, ପୁରୀ, ସମ୍ବଲପୁର, ବୁର୍ଲା ଆଦି ସ୍ଥାନକୁ ଯାନବାହନ ଯାତାୟାତ କରୁଛି। ଏତଦ୍ବ୍ୟତୀତ ଏହି ଛକରେ ଦେଶୀ ମଦ ଭାଟି ଓ ୫୦ ମିଟର ଦୂରରେ ବିଦେଶୀ ମଦ ଦୋକାନ ରହିଛି। ଅନେକ ସମୟରେ ମଦ୍ୟପମାନେ ଭିଡ ଜମାଉଥିବା ବେଳେ ବେପାରୁଆ ଗାଡ଼ି ଚାଳନା ଯୋଗୁ ଲୋକଙ୍କ ମୃତ୍ୟୁ ଘଟୁଛି। ଏସବୁ କାରଣରୁ ଏଠାରେ ଏକ ଗୋଲେଇ କିମ୍ବା ଫ୍ଲାଏଓଭର ନିର୍ମାଣ କରାଯାଇ ଲୋକଙ୍କ ସୁରକ୍ଷା ପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ନିର୍ବାହୀ ଯନ୍ତ୍ରୀ ନୂଆପଡ଼ା ଶଶାଙ୍କ ଶେଖର ଶୁକ୍ଳାଙ୍କୁ ପଚାରିବାରୁ ରାସ୍ତା ଦେଖିବା ପରେ ବ୍ୟବସ୍ଥା କରାଯିବ ବୋଲି କହିଥିଲେ।
