ଜେନେଭା/ନୂଆଦିଲ୍ଲୀ, ୧୬।୨ : ଦେଶରେ କୋଭିଡ -୧୯ ମହାମାରୀ ସଂକ୍ରମଣ ହେବାର ଦୁଇ ବର୍ଷରୁ ଅଧିକ ସମୟ ବିତିଗଲାଣି। ଭାରତର ଦ୍ୱିତୀୟ ଲହରରେ ଡେଲ୍ଟା ମୁଖ୍ୟ ଷ୍ଟ୍ରେନ ଥିଲା। ତେଣୁ ବର୍ତ୍ତମାନ ଓମିକ୍ରନ ଏହାକୁ ପଛରେ ପକାଇ ସବୁଠାରୁ ସଂକ୍ରାମକ ଷ୍ଟ୍ରେନ ପାଲଟିଛି। ଦେଶର ବିଭିନ୍ନ ସ୍ଥାନରୁ ଜିନୋମ ସିକ୍ୱେନସିଂ ପାଇଁ ପଠାଯାଇଥିବା ନମୁନାଗୁଡିକର ୯୫ ପ୍ରତିଶତରୁ ଅଧିକରେ ଓମିକ୍ରନ୍ ଷ୍ଟ୍ରେନ୍ ମିଳିଛି।
ଲଗାତାର କିଛି ଦିନ ଧରି ଭାରତରେ କରୋନା ମାମଲା ହ୍ରାସ ପାଉଛି। ଯଦି ଚାରି ସପ୍ତାହ ପର୍ଯ୍ୟନ୍ତ ମାମଲା ସ୍ଥିର ରହେ, ତେବେ ଏହା ଅନୁମାନ କରାଯାଇପାରେ ଯେ କରୋନା ଏଠାରେ ଏଣ୍ଡେମିକ ପର୍ଯ୍ୟାୟରେ ପହଞ୍ଚୁଛି।
ତେବେ ପରବର୍ତ୍ତୀ କୋଭିଡ ଷ୍ଟ୍ରେନ୍ ଅଧିକ ବିପଜ୍ଜନକ ହୋଇପାରେ ବୋଲି ବୈଜ୍ଞାନିକମାନେ ଚେତାବନୀ ଦେଇଛନ୍ତି। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) କହିଛି ଯେ ବର୍ତ୍ତମାନ ଅଧିକ ନୂତନ ଷ୍ଟ୍ରେନ୍ ଆସିବାର ଆଶଙ୍କା ରହିଛି। ସେସବୁ ଓମିକ୍ରନ ଅପେକ୍ଷା ଶୀଘ୍ର ସଂକ୍ରମଣ ହୋଇପାରେ।
ଏହି ଚେତାବନୀ ମଧ୍ୟରେ, ବ୍ରିଟେନରୁ ଏକ ନୂତନ ଷ୍ଟ୍ରେନ୍ ମିଳିଛି। ଏହା ଡେଲ୍ଟା ଏବଂ ଓମିକ୍ରନର ମିଶ୍ରଣରେ ଗଠିତ ଡେଲ୍ଟାକ୍ରନ ବୋଲି କୁହାଯାଉଛି। ପୂର୍ବରୁ ଡେଲ୍ଟାକ୍ରନ ଏକ ଲ୍ୟାବ ତ୍ରୁଟି ବୋଲି ବିବେଚନା କରାଯାଉଥିଲା। କିନ୍ତୁ ବର୍ତ୍ତମାନ ଏହାର ମାମଲା ବଢ଼ିବା ଯୋଗୁଁ ପୁଣି ଆତଙ୍କ ଦେଖାଦେଇଛି।
ବୈଜ୍ଞାନିକମାନେ ଚେତାବନୀ ଦେଇଛନ୍ତି ଯେ ଓମିକ୍ରନ ଅପେକ୍ଷା ପରବର୍ତ୍ତୀ କୋଭିଡ ଷ୍ଟ୍ରେନ୍ ଅଧିକ ବିପଜ୍ଜନକ ହୋଇପାରେ। ମାମଲା ହ୍ରାସ ପାଇବା ଯୋଗୁ ବହୁ ଦେଶରେ ପ୍ରତିବନ୍ଧକ ହଟାଯାଇଛି। ଏସମ୍ପର୍କରେ ଏଡିନବର୍ଗ ବିଶ୍ୱବିଦ୍ୟାଳୟର ପ୍ରଫେସର ମାର୍କ ୱୁଲହାଉସ କହିଛନ୍ତି ଯେ କରୋନା ଭାଇରସର ପରବର୍ତ୍ତୀ ଷ୍ଟ୍ରେନ୍ କେଉଁଠୁ ଆସିବ ତାହା ଜଣା ପଡିନାହିଁ।
ସେ କହିଛନ୍ତି, ଓମିକ୍ରନ ଭାରିଆଣ୍ଟ ଡେଲ୍ଟାରୁ ଆସିନାହିଁ। ଏହା ଭାଇରସ୍ ପରିବାରର ସମ୍ପୂର୍ଣ୍ଣ ଭିନ୍ନ ଅଂଶରୁ ସୃଷ୍ଟି ହୋଇଥିଲା। ତେଣୁ ପରବର୍ତ୍ତୀ ଷ୍ଟ୍ରେନ୍ଟି ଭାଇରସର ପାରିବାରିକ ଟ୍ରିର କେଉଁଠୁ ଆସିବ, ତାହା ଆମେ ଜାଣିପାରୁନାହୁଁ । ଏହା କିପରି ସଂକ୍ରମିତ ହେବ ତାହା ମଧ୍ୟ ଅଜଣା।
ୱାରାଓ୍ବିକ ୟୁନିଭରସିଟିର ପ୍ରଫେସର ଲରେନ୍ସ ୟଙ୍ଗ ମଧ୍ୟ ୱୁଲହାଉସଙ୍କ ମତାମତ ସହିତ ସହମତି ପ୍ରକାଶ କରିଛନ୍ତି। ୟଙ୍ଗ କହିଛନ୍ତି, ଲୋକମାନେ ଭାବନ୍ତି ଯେ ଏହି ଭୂତାଣୁ ଆଲଫା ଠାରୁ ବିଟା, ତାପରେ ଡେଲ୍ଟା ଏବଂ ପରେ ଓମିକ୍ରନକୁ ବିକଶିତ ହୋଇଛି। ମାତ୍ର ଏହା ସେପରି ପରି ନୁହେଁ। ଭୂତାଣୁ ଦୁର୍ବଳ ହୋଇଯିବା କହିବା ଭୁଲ। ନୂତନ ଷ୍ଟ୍ରେନ୍ ଅଧିକ ବିପଜ୍ଜନକ ହୋଇପାରେ।
ବ୍ରିଟେନରେ ଓମିକ୍ରନ ଏବଂ ଡେଲ୍ଟା ଭାରିଆଣ୍ଟ୍ର ହାଇବ୍ରିଡ ଷ୍ଟ୍ରେନ ଡେଲ୍ଟାକ୍ରନଣ୍ର ମାମଲା ଦେଖିବାକୁ ମିଳିଛି। ପ୍ରାରମ୍ଭରେ, ଏହା ଲ୍ୟାବ ପରୀକ୍ଷାରେ ଏକ ଭୁଲ ଭାବେ ଅନୁମାନ କରାଯାଉଥିଲା। କିନ୍ତୁ ଏହି ନୂତନ ଷ୍ଟ୍ରେନ ବର୍ତ୍ତମାନ ନିଶ୍ଚିତ ହୋଇଛି। ତେବେ ଡେଲ୍ଟାକ୍ରନ୍ର ସଂକ୍ରମଣ ଶକ୍ତି ଏବଂ ଟିକା ଉପରେ ଏହାର ପ୍ରଭାବ ବିଷୟରେ ବ୍ରିଟେନର ଅଧିକାରୀମାନେ ଏପର୍ଯ୍ୟନ୍ତ କିଛି ମତପୋଷଣ କରି ନାହାଁନ୍ତି।
