ନୂଆଦିଲ୍ଲୀ,୨୧ା୧୧:ଦିଲ୍ଲୀର ସେଣ୍ଟ କଲମ୍ବସ୍ ସ୍କୁଲ୍ର ଦଶମ ଶ୍ରେଣୀ ଛାତ୍ର ଶୌର୍ଯ୍ୟ ପାଟିଲ ଆତ୍ମହତ୍ୟା ଘଟଣାରେ ସ୍କୁଲ୍ ପ୍ରଧାନ ଶିକ୍ଷୟିତ୍ରୀ ଏବଂ ୩ ଶିକ୍ଷକଙ୍କୁ ନିଲମ୍ବନ କରାଯାଇଛି। ମଙ୍ଗଳବାର ଅପରାହ୍ନରେ ସେ ସ୍କୁଲ୍ରୁ ମେଟ୍ରୋ ଷ୍ଟେଶନ ଯାଇ ଉଚ୍ଚ ପ୍ଲାଟ୍ଫର୍ମରୁ ଡେଇଁ ଆତ୍ମହତ୍ୟା କରିଥିଲେ। ତାଙ୍କ ସ୍କୁଲ୍ବ୍ୟାଗ୍ରୁ ଏକ ହାତଲେଖା ସୁଇସାଇଡ୍ ନୋଟ୍ ମିଳିଥିଲା, ଯାହା ସେଠାର ଲୋକମାନଙ୍କୁ ବିଚଳିତ କରିଦେଇଛି। ତାଙ୍କୁ ଶିକ୍ଷକମାନେ ବର୍ଷେ ହେଲା ନିର୍ଯାତନା ଦେଇଆସୁଥିଲେ ବୋଲି ସୁଇସାଇଡ୍ ନୋଟ୍ରେ ଶୌର୍ଯ୍ୟ ଲେଖିଛନ୍ତି। ତାଙ୍କୁ ସ୍କୁଲ୍ରୁ ତଡ଼ିଦେବାକୁ ଧମକ ଦିଆଯାଉଥିଲା। ମଙ୍ଗଳବାର ଦିନ ସେ ନାଚ ଅଭ୍ୟାସ ବେଳେ ପଡ଼ିଯିବାରୁ ତାଙ୍କୁ ସମସ୍ତଙ୍କ ଆଗରେ ଅପମାନିତ କରାଯାଇଥିଲା। ସେ ମଞ୍ଚରେ କାନ୍ଦିବାରୁ ଶିକ୍ଷକ କହିଥିଲେ, ତୁମେ ଯେତେ ପାରୁଛ କାନ୍ଦ ମୋର ପରବାୟ ନାହିଁ। ଅଭିଯୁକ୍ତ ପ୍ରଧାନ ଶିକ୍ଷୟିତ୍ରୀ ଓ ୩ ଶିକ୍ଷକଙ୍କ ବିରୋଧରେ ଆତ୍ମହତ୍ୟା ପାଇଁ ଉସୁକାଇବା ଅଭିଯୋଗରେ ମାମଲା ରୁଜୁ ହୋଇଛି। ଅଭିଯୁକ୍ତମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ପିଲାଟିର ପରିବାର ପକ୍ଷରୁ ଦାବି ହୋଇଛି।