ନୂଆଦିଲ୍ଲୀ,୬ା୧୧: ଦିଲ୍ଲୀର ବାୟୁ ମାନ ରବିବାର ପୁଣିଥରେ ଅତି ଉତ୍କଟ ସ୍ତରରେ ପହଞ୍ଚତ୍ଛି। ଫଳରେ ଜାତୀୟ ରାଜଧାନୀ ଦେଶର ସବୁଠୁ ପ୍ରଦୂଷିତ ସହରରେ ପରିଣତ ହୋଇଛି। ରାଜଧାନୀର ବିଭିନ୍ନ ଭାଗରେ ବାୟୁ ମାନ ସୂଚକାଙ୍କ (ଏକ୍ୟୁଆଇ) ୫୫୦ରୁ ଅଧିକ ରହିଛି। ଓ୍ବାଜିରପୁର ପର୍ଯ୍ୟବେକ୍ଷଣ କେନ୍ଦ୍ରରେ ରବିବାର ମଧ୍ୟାହ୍ନରେ ଏକ୍ୟୁଆଇ ସର୍ବାଧିକ ୮୫୯ ରେକର୍ଡ କରାଯାଇଛି। ଦିଲ୍ଲୀ ଆକାଶକୁ ଧୂଳିକଣା ଓ ଧୂଆଁ ଆଚ୍ଛାଦିତ କରି ରଖିଥିବାରୁ ଖୁବ୍ କମ୍ ଦୂରତା ପର୍ଯ୍ୟନ୍ତ ଦୃଶ୍ୟ ହେଉଛି। ବିଶ୍ୱର ସବୁଠୁ ପ୍ରଦୂଷିତ ସହର ମଧ୍ୟରେ ଦିଲ୍ଲୀ ସମେତ କୋଲକାତା ଓ ମୁମ୍ବାଇ ରହିଛି। ଶୀତଦିନ ଆରମ୍ଭ ହୋଇଥିବାରୁ ତାପମାତ୍ରା କମ୍ ସାଙ୍ଗକୁ ବାୟୁ ପ୍ରବାହ ହ୍ରାସ ଏବଂ ପଡ଼ୋଶୀ ରାଜ୍ୟଗୁଡ଼ିକରେ ନଡ଼ା ପୋଡ଼ି ଯୋଗୁ ଦିଲ୍ଲୀ ବାୟୁ ଏଭଳି ସ୍ଥିତିରେ ପହଞ୍ଚତ୍ଥିବା ଅଧିକାରୀମାନେ କହିଛନ୍ତି। ଏଠାରେ ରହୁଥିବା ୨ କୋଟି ଲୋକଙ୍କ ମଧ୍ୟରୁ ଅଧିକାଂଶ ଆଖି ପୋଡ଼ିବା ଓ ଗଳା କୁଣ୍ଡେଇହେବା ଅଭିଯୋଗ କରିଛନ୍ତି। ଦିଲ୍ଲୀ ବାୟୁ ଘଞ୍ଚ ଧୂସର ହୋଇଯାଇଛି। ଶିଶୁମାନେ କ୍ରମାଗତ କାଶୁଥିବାବେଳେ ପିଲାଙ୍କ ଶ୍ୱାସକ୍ରିୟା ପ୍ରଖର ହେଉଛି ବୋଲି ଜଣେ ଡାକ୍ତର ସୋସିଆଲ ମିଡିଆରେ ଲେଖିଛନ୍ତି।
ଦିଲ୍ଲୀର ପିଏମ୍୨.୫ ସାନ୍ଧ୍ରତା ସ୍ତର ଏବେ ବିଶ୍ୱ ସ୍ବାସ୍ଥ୍ୟ ସଂଗଠନ(ଡବ୍ଲ୍ୟୁଏଚ୍ଓ) ଧାର୍ଯ୍ୟ କରିଥିବା ବାୟୁମାନ ଗାଇଡ୍ଲାଇନ୍ସ ସୀମାର ୯୬.୨ ଗୁଣ ରହିଛି। ବାୟୁରେ ରହିଥିବା କଣିକା ତତ୍ତ୍ୱ୨.୫(ପିଏମ୍୨.୫) ଅତି ସୂକ୍ଷ୍ମ ଓ ପ୍ରଶ୍ୱାସରେ ନେଇହେବ। ଏହାର ବ୍ୟାସ ହେଉଛି ୨.୫ ମାଇକ୍ରୋମିଟର ବା ତା’ଠୁ କମ୍। ପ୍ରଶ୍ୱାସରେ ଯାଇ ଏହା ରକ୍ତସ୍ରୋତରେ ମିଶିବା ସହ ସ୍ବାସ୍ଥ୍ୟ ଉପରେ ପ୍ରତିକୂଳ ପ୍ରଭାବ ପକାଇଥାଏ। ଦିଲ୍ଲୀ ବାୟୁରେ ଏହି ସ୍ତର ଘନମିଟର ପ୍ରତି ୪୮୧ ମାଇକ୍ରୋଗ୍ରାମ ରହୁଛି। ଏଥିସହିତ ଦିଲ୍ଲୀ ଓ ଏହାର ଆଖପାଖ ସହରରେ ଥିବା ବାୟୁରେ ପିଏମ୍୧୦ ମୁଖ୍ୟ ଦୂଷିତ ପଦାର୍ଥ ଭାବେ ରହିଛି।
ପ୍ରଦୂଷଣ ହ୍ରାସ କରିବା ପାଇଁ ଦିଲ୍ଲୀ କର୍ତ୍ତୃପକ୍ଷ କେତେକ ପଦକ୍ଷେପ ଗ୍ରହଣ କରିଛନ୍ତି। ରାଜଧାନୀରେ ଅତି ଜରୁରୀ ନ ଥିବା ନିର୍ମାଣ କାର୍ଯ୍ୟକୁ ବନ୍ଦ ରଖାଯିବା ସହ ଡିଜେଲ ଟ୍ରକ୍ ଓ ଭାରି ଯାନ ଚଳାଚଳ ସାମୟିକ ଭାବେ ବନ୍ଦ ରହିଛି। ଜନସାଧାରଣଙ୍କୁ ବ୍ୟକ୍ତିଗତ ଗାଡ଼ି ବ୍ୟବହାର ନ କରି ସର୍ବସାଧାରଣ ପରିବହନ ବ୍ୟବସ୍ଥାର ଉପଯୋଗ କରିବାକୁ ପରାମର୍ଶ ଦିଆଯାଇଛି। କ୍ରିକେଟ ମ୍ୟାଚ୍ ବେଳେ ବାଣ ଫୁଟାଇବାକୁ ଦିଲ୍ଲୀ, ମୁମ୍ବାଇରେ ଆୟୋଜକମାନେ ବନ୍ଦ ରଖିଛନ୍ତି।
