ନୂଆଦିଲ୍ଲୀ,୧୨ ।୧୧: ବେଳକୁ ବେଳ ଖରାପ ହୋଇଚାଲିଛି ରାଜଧାନୀ ଦିଲ୍ଲୀର ବାୟୁ ମଣ୍ଡଳ । ଆଗାମୀ ଦୁଇଦିନ ମଧ୍ୟରେ ଏହା ଗ୍ୟାସ ଚାମ୍ବର ପାଲଟିଯିବ ବୋଲି ବିଶେଷଜ୍ଞମାନେ ଅନୁମାନ ଲଗାଇଛନ୍ତି । ଏଠାରେ ପ୍ରଦୂଷଣର ସ୍ତର ବେଳକୁ ବେଳ ବଢିବାରେ ଲାଗିଛି । ତେଣୁ ଆବଶ୍ୟକ ନ ଥିଲେ ଘରେ କବାଟ ଝରକା ବନ୍ଦ କରି ରହିବାକୁ ବିଶେଷଜ୍ଞମାନେ ପରାମର୍ଶ ଦେଇଛନ୍ତି । ଗୁରୁବାର ଦିଲ୍ଲୀରେ ଧୂଆଁର ଏକ ମୋଟା ଆସ୍ତରଣ ଦେଖିବାକୁ ମିଳିଥିଲା । ବିଶେଷ ଭାବେ ଦିଲ୍ଲୀ ଏନ୍ସିଆର୍ରେ ବାୟୁ ଅଧିକ ପ୍ରଦୂଷିତ ଥିବା ବେଳେ ଏଠାରେ ଲୋକଙ୍କୁ ନିଶ୍ୱାସ ନେବାରେ କଷ୍ଟ ହେବା ସହ ଗଳା ଦରଜ ହେବା, ଆଖି କୁଣ୍ଡାଇ ହେବା ଭଳି ସମସ୍ୟା ଉପୁଜିଛି । ସେହିପରି ପ୍ରଦୂଷଣର ମାତ୍ରା ଏତେ ଅଧିକ ରହିଛି ଯେ ବହୁତ ଦୂର ପର୍ଯ୍ୟନ୍ତ କିଛି ଦେଖାଯାଉନାହିଁ । ଗୁରୁବାର ସଫଦରଜଙ୍ଗରେ ୮୦୦ ମିଟର ପର୍ଯ୍ୟନ୍ତ ଦେଖାଯାଉଥିବା ଜଣାପଡିଛି ।
