ନୂଆଦିଲ୍ଲୀ,୨୭ା୫: ଔପନିବେଶୀୟ ଯୁଗରୁ ରହିଆସିଥିବା ଦିଲ୍ଲୀ ଜିମ୍ଖାନା ପରିସରକୁ କେନ୍ଦ୍ର ସରକାର ଜୁନ୍ ୫ ସୁଦ୍ଧା ବଳପୂର୍ବକ ଦଖଲକୁ ନେବେ ନାହିଁ ବୋଲି ମଙ୍ଗଳବାର ଦିଲ୍ଲୀ ହାଇକୋର୍ଟଙ୍କୁ ଜଣାଇଛନ୍ତି। ହାଇକୋର୍ଟ ଏହାକୁ ଗ୍ରହଣ କରି ବର୍ତ୍ତମାନ ମଧ୍ୟବର୍ତ୍ତିକାଳୀନ ନିର୍ଦ୍ଦେଶନାମା ଦେବାର ଆବଶ୍ୟକ ନାହିଁ ବୋଲି କହିଛନ୍ତି। ଫଳରେ ଜିମ୍ଖାନା ସଦସ୍ୟମାନେ ଆଶ୍ୱସ୍ତ ହୋଇଛନ୍ତି। ଲୁଟ୍ୟେନ୍ସ ଦିଲ୍ଲୀର କେନ୍ଦ୍ରସ୍ଥଳରେ ଥିବା କ୍ଲବ୍ର ୨୭.୩ ଏକର ଜମିର ସ୍ଥାୟୀ ଲିଜ୍କୁ ରଦ୍ଦ କରିବା ପାଇଁ କେନ୍ଦ୍ରର ନିଷ୍ପତ୍ତି ଉପରେ ବର୍ତ୍ତମାନ ସ୍ଥିତିରେ ହସ୍ତକ୍ଷେପ କରିବାକୁ ଜଷ୍ଟିସ୍ ଅବନୀଶ ଝିଙ୍ଗାନ୍ ମନା କରିଦେଇଛନ୍ତି। ଉପଯୁକ୍ତ ନୋଟିସ ଦିଆଯିବା ପରେ ଆଇନ ଅନୁଯାୟୀ ଉଚ୍ଛେଦ ପ୍ରକ୍ରିୟା କରାଯିବ ବୋଲି କେନ୍ଦ୍ର ସରକାରଙ୍କ ପକ୍ଷରୁ ଉପସ୍ଥିତ ଥିବା ସଲିସିଟର ଜେନେରାଲ ତୁଷାର ମେହେଟ୍ଟା ଅଦାଲତଙ୍କୁ ଜଣାଇଥିଲେ। ଜୁନ୍ ୫ ସୁଦ୍ଧା କ୍ଲବ୍ ସ୍ବେଚ୍ଛାକୃତ ଭାବେ ଉକ୍ତ ଜମି ଖାଲି କରିବାକୁ ଆମେ ଏକ ବିକଳ୍ପ ଦେଇଥିଲୁ। ପୋଲିସ ଜବରଦସ୍ତ ପଶିଯାଇ କବ୍ଜା କରିନେବା ଭଳି କିଛି ହେବ ନାହିଁ। ଆଇନର ବ୍ୟବସ୍ଥିତ ପ୍ରକ୍ରିୟା ଅନୁଯାୟୀ ପଦକ୍ଷେପ ନିଆଯିବ ବୋଲି ସଲିସିଟର ଜେନେରାଲ କହିଛନ୍ତି। ଏହି ମାମଲାରେ କ୍ଷତିପୂରଣ ସ୍ବରୂପ ଟଙ୍କା ଦିଆଯାଇପାରେ କିମ୍ବା ସରକାର ବିକଳ୍ପ ଜମି ଦେଇପାରନ୍ତି।
ଜିମ୍ଖାନା କ୍ଲବ୍ ପରିସରକୁ ଜୁନ୍ ୫ ସୁଦ୍ଧା ହସ୍ତାନ୍ତର କରିବାକୁ ଗତ ୨୨ ତାରିଖରେ କେନ୍ଦ୍ର ଗୃହନିର୍ମାଣ ଓ ସହରାଞ୍ଚଳ ବ୍ୟାପାର ମନ୍ତ୍ରଣାଳୟ ଅଧୀନରେ ଥିବା ଲ୍ୟାଣ୍ଡ ଆଣ୍ଡ ଡେଭେଲପ୍ମେଣ୍ଟ ଅଫିସ୍ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଥିଲା। ପ୍ରତିରକ୍ଷା ଭିତ୍ତିଭୂମିକୁ ସୁଦୃଢ଼ ଓ ସୁରକ୍ଷିତ କରିବା ପାଇଁ ଉକ୍ତ ୨୭.୩ ଏକର ଜମି ଆବଶ୍ୟକ ବୋଲି ନିର୍ଦ୍ଦେଶନାମାରେ କୁହାଯାଇଥିଲା।