ନୂଆଦିଲ୍ଲୀ,୨୪।୭: ସୁପ୍ରିମକୋର୍ଟ ସୋମବାର ଦିଲ୍ଲୀ ସରକାରଙ୍କୁ ଦୁଇ ମାସ ମଧ୍ୟରେ ‘ରିଜୋନାଲ ରାପିଡ ଟ୍ରାନ୍ସପୋର୍ଟ ସିଷ୍ଟମ’ (ଆରଆରଟିଏସ୍) ପାଇଁ ୪୧୫ କୋଟି ଟଙ୍କା ଦେବାକୁ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ ଏସ.କେ କୌଲ ଏବଂ ସୁଧାଂଶୁ ଧୁଲିଆଙ୍କ ଏକ ବେଞ୍ଚ କହିଛନ୍ତି ଯେ, ଯଦି ଆମ ଆଦମୀ ପାର୍ଟି (ଏଏପି) ସରକାର ଗତ ତିନି ବର୍ଷ ମଧ୍ୟରେ ବିଜ୍ଞାପନରେ ୧୦୦୦କୋଟି ଟଙ୍କା ଖର୍ଚ୍ଚ କରିପାରିବେ, ତେବେ ନିଶ୍ଚିତ ଭାବରେ ଅବଶ୍ୟ ଭିତ୍ତିଭୂମି ପ୍ରକଳ୍ପଗୁଡିକ ମଧ୍ୟ ପାଣ୍ଠି ଯୋଗାଇ ଦିଆଯାଇପାରେ।
ଦିଲ୍ଲୀ ସରକାର ଆରଆରଟିଏସ୍ ପ୍ରକଳ୍ପକୁ ପାଣ୍ଠି ଯୋଗାଇବାରେ ଅସମର୍ଥତା ପ୍ରକାଶ କରିଥିଲେ ,ଯାହା ପରେ ଗତ ତିନି ବର୍ଷ ମଧ୍ୟରେ ବିଜ୍ଞାପନରେ ଖର୍ଚ୍ଚ ହୋଇଥିବା ଟଙ୍କାକୁ ରେକର୍ଡ କରିବାକୁ ସର୍ବୋଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଥିଲେ।
ଗତ ଶୁଣାଣିରେ ଦିଲ୍ଲୀ ସରକାରଙ୍କ ଠାରୁ ଖର୍ଚ୍ଚର ସବିଶେଷ ତଥ୍ୟ ମଗାଯାଇଥିଲା। ଦିଲ୍ଲୀରେ ଆରଆରଟିଏସ୍ ନିର୍ମାଣ ଦ୍ୱାରା ଦିଲ୍ଲୀ ପାଇଁ ରାଜସ୍ଥାନ ଏବଂ ହରିୟାଣାର ସଡ଼କ ମାର୍ଗରେ ସମ୍ପର୍କ ସହଜ ହୋଇଥାନ୍ତା। ତେବେ ଦିଲ୍ଲୀ ସରକାର ଏଥିପାଇଁ ପାଣ୍ଠି ଯୋଗାଇ ନାହାଁନ୍ତି। ଗତ ଶୁଣାଣିରେ ଦିଲ୍ଲୀ ସରକାରଙ୍କ ପରାମର୍ଶଦାତା ଦୁଇ ବିଚାରପତି ବେଞ୍ଚକୁ କହିଛନ୍ତି ଯେ, ସେଠାରେ ଅର୍ଥର ଅଭାବ ରହିଛି ଏବଂ ଆର୍ଥିକ ସହାୟତା ବଢାଇବାରେ ଅସମର୍ଥତା ପ୍ରକାଶ କରିଛନ୍ତି।
