ଭୁବନେଶ୍ୱର, ୨୦।୨(ବ୍ୟୁରୋ): ଦେଶରେ ବଢି ଚାଲିଥିବା ଆପରାଧିକ ମାମଲା ଉପରେ ନଜର ରଖି କେନ୍ଦ୍ର ସରକାରଙ୍କ ପକ୍ଷରୁ ଫାଷ୍ଟ-ଟ୍ରାକ୍ କୋର୍ଟ (ଏଫ୍ଟିସି) ସ୍ଥାପନ କରାଯାଇଛି। ୨୦୦୦ ମସିହାରେ ଦେଶରେ ପ୍ରାୟ ୩କୋଟି ମାମଲା ବିଚାରାଧୀନ ରହିଥିବାବେଳେ କେନ୍ଦ୍ର ସରକାରଙ୍କ ଦ୍ୱାରା ୧୧ତମ ଅର୍ଥ କମିଶନଙ୍କ ଜରିଆରେ ଏହି କୋର୍ଟଗୁଡ଼ିକ ସ୍ଥାପନ କରାଯାଇଥିଲା।
ବିଭିନ୍ନ ଜଘନ୍ୟ ଅପରାଧ ଏବଂ ମହିଳା, ଶିଶୁ ଓ ବୟସ୍କଙ୍କ ବିରୋଧରେ ହେଉଥିବା ଅପରାଧଗୁଡ଼ିିକର ତୁରନ୍ତ ବିଚାର ପାଇଁ ଦେଶର ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ବର୍ତ୍ତମାନ ମୋଟ୍ ୮୯୮ଟି ଫାଷ୍ଟ ଟ୍ରାକ୍ କୋର୍ଟ କାର୍ଯ୍ୟ କରୁଛି। ଓଡ଼ିଶାରେ ୪୫ଟି ଫାଷ୍ଟଟ୍ରାକ୍ କୋର୍ଟ ରହିଥିବାବେଳେ ବର୍ତ୍ତମାନ ୧୯ଟି ଫାଷ୍ଟଟ୍ରାକ୍ ସ୍ପେଶାଲ କୋର୍ଟ କାର୍ଯ୍ୟ କରୁଛି। ୨୦୨୧ ଜୁନ୍ରେ କଟକ, ବଲାଙ୍ଗୀର, ଭଦ୍ରକ, ବାଲେଶ୍ୱର, ଢେଙ୍କାନାଳ, ଗଞ୍ଜାମ, ଜଗତ୍ସିଂହପୁର, ଯାଜପୁର, କଳାହାଣ୍ଡି, କେନ୍ଦ୍ରାପଡ଼ା, ଖୋର୍ଦ୍ଧା, କୋରାପୁଟ, କନ୍ଧମାଳ, ରାୟଗଡା ଏବଂ ସମ୍ବଲପୁର ଜିଲାରେ ଏକକାଳୀନ ୧୫ଟି ଫାଷ୍ଟ ଟ୍ରାକ୍ ସ୍ପେଶାଲ କୋର୍ଟ ଆରମ୍ଭ କରାଯାଇଥିଲା। ରାଜ୍ୟରେ ପୋକ୍ସୋ ଆକ୍ଟ ସମ୍ପର୍କିତ ମାମଲା ଏବଂ ବଳାତ୍କାର ମାମଲାଗୁଡ଼ିକର ଶୀଘ୍ର ଫଇସଲା ପାଇଁ ଏହି କୋର୍ଟଗୁଡ଼ିକ ପ୍ରତିଷ୍ଠା ହୋଇଥିଲା।
ସମ୍ପ୍ରତି ସମସ୍ତ ରାଜ୍ୟର ହାଇକୋର୍ଟଗୁଡିକ ପକ୍ଷରୁ କେନ୍ଦ୍ର ଆଇନ୍ ମନ୍ତ୍ରଣାଳୟକୁ ଦିଆଯାଇଥିବା ତଥ୍ୟ ଅନୁଯାୟୀ, ଦେଶର ଫାଷ୍ଟ ଟ୍ରାକ୍ କୋର୍ଟଗୁଡ଼ିକରେ ୧୦ଲକ୍ଷରୁ ଊର୍ଦ୍ଧ୍ୱ ମାମଲା ବିଚାରାଧୀନ ଅବସ୍ଥାରେ ପଡ଼ିରହିଛି। ସେଥିମଧ୍ୟରୁ ଓଡ଼ିିଶାରେ ଥିବା ଏହି କୋର୍ଟଗୁଡିକରେ ୩ହଜାର ୨୪୪ଟି ମାମଲା ବିଚାରାଧୀନ ରହିଛି।
ସମ୍ପର୍କରେ ଭୁବନେଶ୍ୱରର ଆଇନଜୀବୀ ପ୍ରଭାତ କୁମାର ସାମନ୍ତରାୟ କହିଛନ୍ତି, ଫାଷ୍ଟଟ୍ରାକ୍ କୋର୍ଟଗୁଡ଼ିକର ପରିଚାଳନା ପାଇଁ ଅଧିକ ପାଣ୍ଠି ଯୋଗାଇବା ସହିତ ଆବଶ୍ୟକ ସଂଖ୍ୟକ କର୍ମଚାରୀ ନିଯୁକ୍ତି କରାଯିବାର ଆବଶ୍ୟକତା ରହିଛି। ଏଥିସହ ସବୁ ଜିଲାରେ ଫାଷ୍ଟ ଟ୍ରାକ୍ କୋର୍ଟ ପ୍ରତିଷ୍ଠା କରାଯିବା ଆବଶ୍ୟକ ବୋଲି ସେ ମତ ଦେଇଛନ୍ତି। ସେହିପରି ବରିଷ୍ଠ ଆଇନ୍ଜୀବୀ ବିଶ୍ୱପ୍ରିୟ କାନୁନ୍ଗୋ କହିଛନ୍ତି, ଭିତ୍ତିଭୂମି ଅଭାବ ସମେତ ବିଭିନ୍ନ କାରଣରୁ ଏହି କୋର୍ଟଗୁଡ଼ିକ ଠିକ୍ ଭାବେ ପରିଚାଳିତ ହୋଇପାରୁନାହିଁ।
