ଧାମନଗର, ୨୫।୧୨(ସ୍ବ.ପ୍ର.): ଚଳିତ ବର୍ଷ ଧାନ ଅମଳ ସରିବାକୁ ବସିଥିଲେ ମଧ୍ୟ ପ୍ରଶାସନ ମଣ୍ଡି ଖୋଲିବାକୁ ନେଇ ଅହେତୁକ ବିଳମ୍ବ କରି ଚାଲିଛି। ଫଳରେ ଚାଷୀମାନେ ଦଲାଲମାନଙ୍କୁ କମ୍ ଦରରେ ଧାନ ବିକ୍ରି କରି ଆର୍ଥିକ କ୍ଷତି ସହୁଛନ୍ତି।
ଯେ, ଚଳିତବର୍ଷ ଧାମନଗର ବ୍ଲକରେ ୧୫ ହଜାର ୩୭୨ ହେକ୍ଟର ଚାଷଜମିରେ ଧାନ ଚାଷ କରାଯାଇଥିଲା। ଧାନ ଅମଳ ପରେ ସରକାରୀ ମଣ୍ଡିରେ ସ୍ଥିରୀକୃତ ଧାର୍ଯ୍ୟ ସରକାରୀ ଦରରେ ବିକି ଚାଷ ପାଇଁ ଧାର କରଜ କରିଥିବା ଟଙ୍କା ଶୁଝିଦେବେ ବୋଲି ଚାଷମାନେ ଭାବିଥିଲେ। କିନ୍ତୁ ମଣ୍ଡି ଖୋଲିବାରେ ଅହେତୁକ ବିଳମ୍ବ ଯୋଗୁ ଚାଷୀମାନେ ବାଧ୍ୟ ହୋଇ ଧାନ କୁଇଣ୍ଟାଲ ପ୍ରତି ୧୨୫୦ରୁ ୧୩୫୦ ଦରରେ ଦଲାଲମାନଙ୍କୁ ବିକ୍ରି କରୁଛନ୍ତି। ମାତ୍ର ସରକାରଙ୍କ ଧାର୍ଯ୍ୟ ମୂଲ୍ୟ କୁଇଣ୍ଟାଲ ପ୍ରତି ୨୦୪୦ ଟଙ୍କା ଥିବାବେଳେ ଚାଷୀମାନଙ୍କୁ ହେକ୍ଟର ପିଛା ଅନୁନ୍ୟ ୩୫ ହଜାରରୁ ୪୫ ହଜାର ଆର୍ଥିକ କ୍ଷତି ସହିବାକୁ ପଡୁଛି। ଏପରିକି ଦଲାଲମାନେ ଆସି କ୍ଷେତରୁ ଧାନ ନେଇ ବାହାର ରାଜ୍ୟ ବେପାରୀଙ୍କୁ ଚଢ଼ାଦରରେ ବିକ୍ରି କରି ମାଲାମାଲ ହେଉଛନ୍ତି। ମାତ୍ର ଚଳିତବର୍ଷ ପ୍ରଶାସନର ଅବହେଳା ଯୋଗୁ ଚାଷୀମାନେ ଏପର୍ଯ୍ୟନ୍ତ ଧାନ ବିକ୍ରି ସମ୍ବନ୍ଧରେ କୋଣସି ସୂଚନା ପାଇପାରି ନାହାନ୍ତି। ଫଳରେ ସେମାନେ ଅମଳ ହୋଇଥିବା ସମସ୍ତ ଧାନ ସରକାରୀ ମଣ୍ଡିରେ ବିକ୍ରି କରିବାକୁ ନେଇ ଆଶା ଓ ଆଶଙ୍କା ମଧ୍ୟରେ ଅଛନ୍ତି। ଯଦି ଚାଷୀଙ୍କ ଧାନ ଦଲାଲମାନଙ୍କ ଦ୍ୱାରା ବାହାର ରାଜ୍ୟରେ ବିକ୍ରି ହେଉଛି, ତାହେଲେ ମଣ୍ଡି ଟାର୍ଗେଟ କିପରି ପୂରଣ କରୁଛି ବୋଲି ପ୍ରଶ୍ନ ଉଠିଛି। ଏଭଳି ଅବ୍ୟବସ୍ଥା ପ୍ରତି ଜିଲାପାଳ ସ୍ବତନ୍ତ୍ର ଭାବେ ଦୃଷ୍ଟି ଦେବାକୁ ଚାଷୀମାନେ ଦାବି କରିଛନ୍ତି। ଏ ସମ୍ପର୍କରେ ଜିଲା ଯୋଗାଣ ଅଧିକାରୀ ଲିଙ୍ଗରାଜ ବେହେରା କହିଛନ୍ତି, ମିଲରମାନେ ଟଙ୍କା ଡିପୋଜିଟ୍ କରିବାରେ ବିଳମ୍ବ ହେତୁ ମଣ୍ଡି ଖୋଲାଯାଇ ପାରୁନାହିଁ। ତେବେ ଆସନ୍ତା ୨୮ ତାରିଖ ସୁଦ୍ଧା ଖୋଲିବାର ସମ୍ଭାବନା ରହିଛି।
