ସୋନପୁର,୪।୨(ନି.ପ୍ର.): ସୁବର୍ଣ୍ଣପୁର ଜିଲାରେ ଚଳିତ ଖରିଫ ଋତୁରେ ରେକର୍ଡ ପରିମାଣର ଧାନ ଅମଳ ହୋଇଛି। ତଦନୁଯାୟୀ ଧାନ ସଂଗ୍ରହରେ ଜିଲା ଚଳିତ ଥର ସର୍ବକାଳୀନ ରେକର୍ଡ ସୃଷ୍ଟି କରିଛି। ଗୁରୁବାର ସନ୍ଧ୍ୟା ସୁଦ୍ଧା ଜିଲାର ୧୦୭ ମଣ୍ଡିରୁ ୬୨୯୧୬ ଜଣ ଚାଷୀଙ୍କ ଠାରୁ ୩୫୩୭୧୪୦.୮୩ କୁଇଣ୍ଟାଲ ଧାନ ସଂଗ୍ରହ ହୋଇଛି । ତେବେ ଧାନ କିଣାରେ ବଡ ଧରଣର ଅବ୍ୟବସ୍ଥା ସାମନାକୁ ଆସିଛି। ଧାନ ବିକ୍ରିର ପ୍ରାପ୍ୟ ଚାଷୀଙ୍କୁ ୪୮ ଘଣ୍ଟା ମଧ୍ୟରେ ପ୍ରଦାନ କରାଯାଉଛି ବୋଲି ସରକାର ଡିଣ୍ଡିମ ପିଟୁ ଥିବା ବେଳେ ବାସ୍ତବ ସ୍ଥିତି ଭିନ୍ନ। ଚାଷୀଙ୍କୁ ଧାନ ବିକ୍ରି ପ୍ରାପ୍ୟ ପାଇବା ପାଇଁ ୧୫ ରୁ ୨୦ ଦିନ ଅପେକ୍ଷା କରିବାକୁ ପଡୁଛି । କେତେକ ଚାଷୀ ଧାନ ବିକ୍ରିର ୨୫ ଦିନ ପରେ ପ୍ରାପ୍ୟ ପାଇ ନ ଥିବାରୁ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏହି ଘଟଣାକୁ ଲକ୍ଷ୍ୟ କଲେ ସରକାରଙ୍କ ଧାନ କ୍ରୟ ନିୟମ କେବଳ ପ୍ରଚାର ସର୍ବସ୍ବ ବୋଲି ମତପ୍ରକାଶ ପାଉଛି। ଉଲୁଣ୍ଡା ବ୍ଲକ ଜମ୍ଭାଲିପାଲି ଗାଁର ମହିଳା ଚାଷୀ ତିଳୋତମା ମିଶ୍ର କୁହନ୍ତି ଜାନୁୟାରୀ ୧୭ ତାରିଖରେ ସେ ଧାନ ବିକ୍ରି କରିଥିଲେ। ସ୍ଥାନୀୟ ବଗଚେରାସ୍ଥିତ ମା’ ସମଲେଶ୍ୱରୀ ମହିଳା ସ୍ବୟଂ ସହାୟକ ଗୋଷ୍ଠୀରେ ନିୟମ ଅନୁଯାୟୀ ୧୦୧କୁଇଣ୍ଟାଲ ଧାନ ବିକ୍ରି କରିଛନ୍ତି। ମାତ୍ର ଏ ପର୍ଯ୍ୟନ୍ତ ତାଙ୍କ ପାସବହିରେ ଧାନ ବିକ୍ରି ବାବଦ ଅର୍ଥ ଜମା ହୋଇନି। ସେ ବାରମ୍ବାର ବ୍ୟାଙ୍କ, ସମବାୟ ବିଭାଗ ଓ ଯୋଗାଣ ବିଭାଗର କାର୍ଯ୍ୟାଳୟକୁ ଦୌଡୁଛନ୍ତି। ତିଳୋତ୍ତମାଙ୍କ ଭଳି ଶତାଧିକ ଚାଷୀ ଧାନ ବିକ୍ରି ପ୍ରାପ୍ୟ ନ ପାଇ ହୀନସ୍ତା ହେଉଛନ୍ତି।
ସୁବର୍ଣ୍ଣପୁର ଜିଲାରେ ଡିସେମ୍ବର ୫ ତାରିଖରୁ ଖରିଫ ଧାନ ସଂଗ୍ରହ ଆରମ୍ଭ ହୋଇଛି। ଜିଲାରେ ୬୫୫୨୩ ଚାଷୀ ସେମାନଙ୍କ ବଳକା ଧାନ ବିକ୍ରି ପାଇଁ ନାମ ପଞ୍ଜୀକରଣ କରିଥିଲେ। ସରକାରଙ୍କ ସର୍ବନିମ୍ନ ସହାୟକ ମୂଲ୍ୟ କୁଇଣ୍ଟାଲ ପ୍ରତି ୨୦୪୦ଟଙ୍କା ଅନୁଯାୟୀ ଚାଷୀଙ୍କ ନିକଟରୁ ଧାନ କ୍ରୟ କରାଯାଉଛି। ନିର୍ଦ୍ଧାରିତ ସର୍ବନିମ୍ନ ସହାୟକ ମୂଲ୍ୟ ଅନୁଯାୟୀ ଧାନ ବିକ୍ରି କରିଥିବା ଜିଲାର ୬୨୯୧୬ ଜଣ ଚାଷୀ ସରକାରଙ୍କ ନିକଟରୁ ୮୪୮କୋଟି ୯୧ଲକ୍ଷ ୩ହଜାର ୭୯୯ ଟଙ୍କା ପାଇବେ। ତେବେ ଧାନ ବିକ୍ରି କରିଥିବା ଜିଲାର ୫୩୦୯୩ ଜଣ ଚାଷୀଙ୍କ ଆକାଉଣ୍ଟରେ ଗୁରୁବାର ସନ୍ଧ୍ୟା ସୁଦ୍ଧା ୬୧୪କୋଟି ୭୦ଲକ୍ଷ ୪୪ହଜାର ଟଙ୍କା ଜମା ହୋଇଥିବା ଜଣାପଡିଛି। ବାକି ୯୮୨୩ ଜଣ ଚାଷୀ ଧାନ ବିକ୍ରି ପ୍ରାପ୍ୟ ୨୩୪ କୋଟି ଟଙ୍କା ପାଇନାହାନ୍ତି। ରବି ଚାଷ ଓ ଋଣ ଶୁଝିବା ପାଇଁ ଟଙ୍କା ଆବଶ୍ୟକ ଥିବାରୁ ଚାଷୀ ବ୍ୟାଙ୍କ୍କୁ ଯାଇ ନିରାଶ ହେଉଛି। ତେଣୁ ସରକାର ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି।
ସୂଚନାଯୋଗ୍ୟ, ଚଳିତ ଥର ୩୮ଟି ମହିଳା ସ୍ବୟଂ ସହାୟକ ଗୋଷ୍ଠୀ ଓ ୬୩ଟି ପ୍ରାଥମିକ କୃଷି ସମବାୟ ସମିତି(ପ୍ୟାକ୍ସ) ଜରିଆରେ ଯୋଗାଣ ନିଗମ ଚାଷୀଙ୍କ ନିକଟରୁ ଧାନ କ୍ରୟ କରୁଛି। ସୁବର୍ଣ୍ଣପୁର ଜିଲାର ୪୮ ଜଣ ମିଲର୍ସ ସରକାରଙ୍କ ଧାନ ସଂଗ୍ରହ ପ୍ରକ୍ରିୟାରେ ସାମିଲ ହୋଇଛନ୍ତି। ଜଳସେଚିତ ବିନିକା ଓ ଡୁଙ୍ଗୁରିପାଲି ବ୍ଲକ ଏବଂ ସୋନପୁର ବ୍ଲକରେ ଧାନ ସଂଗ୍ରହ ପ୍ରକ୍ରିୟା ସରିଛି। ଟୋକନ୍ ମିଳି ନ ଥିବାରୁ କେତେଜଣ ଚାଷୀ ଧାନ ବିକ୍ରି କରି ପାରି ନାହାନ୍ତି। ଅନ୍ୟପକ୍ଷେ ବୀରମହାରାଜପୁର, ଉଲୁଣ୍ଡା ଓ ତରଭା ବ୍ଲକର ଅଳ୍ପ କିଛି ମଣ୍ଡିରେ ଧାନ ସଂଗ୍ରହ ଜାରି ରହିଛି। ହିଲୁଙ୍ଗ, ଯାଲୋଏ, ଚାରଭଟା, ବଡଭଇଁରୋ, ଲଛିପୁର ଓ ଝାରତରଭା ମଣ୍ଡିରେ ଶତାଧିକ ବସ୍ତା ଧାନ ପଡି ରହିଥିବା ଚାଷୀମାନେ ଅଭିଯୋଗ କରିଛନ୍ତି।