ବଇଣ୍ଡା,୧୯ା୭: ବିକାଶର ମାର୍ଗ ବା ରାଜପଥ ପ୍ରଶସ୍ତ ହେବ। ସେଥିପାଇଁ ୩ ବର୍ଷ ତଳୁ କ୍ଷେତ୍ର ପ୍ରସ୍ତୁତ କରାଗଲା। ଅନୁଗୋଳ ଜିଲା କିଶୋରନଗର ବ୍ଲକ ବଇଣ୍ଡା ବଜାରର ବହୁ ବ୍ୟବସାୟିକ ପ୍ରତିଷ୍ଠାନ ଉଚ୍ଛେଦ ହେଲା। ସରକାରୀ କାର୍ଯ୍ୟାଳୟ, ବିଦ୍ୟାଳୟ, ଚିକିତ୍ସାଳୟ, ବିଶ୍ରାମାଗାରକୁ ଭାଙ୍ଗି ମାଟିରେ ମିଶାଇ ଦିଆଗଲା। ହେଲେ ଏଯାଏ ବିକାଶର ଚିହ୍ନବର୍ଣ୍ଣ ନାହିଁ। ଏଠାରେ ରାଜପଥ ସମ୍ପ୍ରସାରଣ ଶେଷ ତ ଦୂରର କଥା, ଓଭରବ୍ରିଜ୍ ଏଯାଏ ହୋଇପାରି ନାହିଁ। ଭଙ୍ଗା ଯାଇଥିବା ସରକାରୀ କାର୍ଯ୍ୟାଳୟ ଅନ୍ୟତ୍ର ନିର୍ମାଣ କରାଯାଇ ନାହିଁ। ଠିକା ସଂସ୍ଥା ଓ ପ୍ରଶାସନ ମଧ୍ୟରେ ତାଳମେଳ ରହୁ ନ ଥିବାରୁ ବଇଣ୍ଡାର ବିକାଶ ବିଳମ୍ବିତ ହୋଇ ଚାଲିଥିବା ସାଧାରଣରେ ଅଭିଯୋଗ ହେଉଛି।
କଟକ-ସମ୍ବଲପୁର ୫୫ ନମ୍ବର ଜାତୀୟ ରାଜପଥର ସମ୍ପ୍ରସାରଣ ନିମନ୍ତେ କିଶୋରନଗର ବ୍ଲକ ଜାମ୍ବୁନାଳୀ ଠାରୁ ଭାଙ୍ଗମୁଣ୍ଡା ପର୍ଯ୍ୟନ୍ତ ଉଚ୍ଛେଦ କାର୍ଯ୍ୟ କରାଯାଇଛି। ୨୦୧୮ ମେ ୧୭ ତାରିଖରୁ ବଇଣ୍ଡାଠାରେ ସରକାରୀ ଓ ବ୍ୟବସାୟିକ ପ୍ରତିଷ୍ଠାନ ଭଙ୍ଗା ଆରମ୍ଭ ହୋଇଥିଲା। ବଇଣ୍ଡାରେ ଥିବା ରାଜସ୍ବ କାର୍ଯ୍ୟାଳୟ, ପ୍ରାଣୀ ଚିକିତ୍ସାଳୟ, ପୂର୍ତ୍ତ ବିଭାଗ ବଙ୍ଗଳା, କିଶୋରଗଞ୍ଜ ପ୍ରାଥମିକ ବିଦ୍ୟାଳୟ, ନୁନୁକାପଶି ପଞ୍ଚାୟତ ରାଜୀବ ଗାନ୍ଧୀ ସେବାକେନ୍ଦ୍ର, ବଇଣ୍ଡା ଫାଣ୍ଡି, ଜନତା ମହାବିଦ୍ୟାଳୟ, ବଇଣ୍ଡା ଛକ ଯାତ୍ରୀ ବିଶ୍ରାମାଗାର, ବଇଣ୍ଡା କଲେଜ ବିଶ୍ରାମାଗାର, ଲୁହାମୁଣ୍ଡା ବିଶ୍ରାମାଗାର, ଡେବେରାପାଲି ଗ୍ରାମ ଯାତ୍ରୀ ବିଶ୍ରାମାଗାର, ହଣ୍ଡପା ଥାନାର ଫୋର୍ସ ରହଣି ଗୃହ, ହଣ୍ଡପା ଯାତ୍ରୀ ବିଶ୍ରାମାଗାର, ବଇଶିଣା ଗ୍ରାମ ଯାତ୍ରୀ ବିଶ୍ରାମାଗାର, ପ୍ରକଳ୍ପ ପ୍ରାଥମିକ ବିଦ୍ୟାଳୟ ଶ୍ରେଣୀଗୃହ, ପାଗବନ୍ଧା ପ୍ରାଥମିକ ବିଦ୍ୟାଳୟ ପାଚେରି, ନାକିଚି ଯାତ୍ରୀ ବିଶ୍ରାମାଗାର, ଫୁଲାମ୍ବା ଯାତ୍ରୀ ବିଶ୍ରାମାଗାର, ସରିଗିପାଲି ଯାତ୍ରୀ ବିଶ୍ରାମାଗାର, ଆମ୍ବପାଳ ଠାରେ ଥିବା ଯାତ୍ରୀ ବିଶ୍ରାମାଗାର, ବାମୁରଠାରେ ଥିବା ଯାତ୍ରୀ ବିଶ୍ରାମାଗାର, ବାମୁର କ୍ଷୁଦ୍ରଜଳସେଚନ ବିଭାଗ କନିଷ୍ଟ ଯନ୍ତ୍ରୀଙ୍କ କାର୍ଯ୍ୟାଳୟ, ଜାମ୍ବୁନାଳି ସ୍ଥିତ ଯାତ୍ରୀ ବିଶ୍ରାମାଗାର ଭାଙ୍ଗିଦିଆଯାଇଛି। ଏଥିରୁ କେତୋଟି କାର୍ଯ୍ୟାଳୟ ଭଡା ଘରେ ଚାଲିଥିବାବେଳେ ଆଉ କେତୋଟି ଅନ୍ୟ କାର୍ଯ୍ୟାଳୟରେ ମିଶାଇ ଦିଆଯାଇଛି। ଜମି ଅଭାବରୁ ଏସବୁ ସରକାରୀ କାର୍ଯ୍ୟାଳୟ ନୂତନ ଭାବେ ନିର୍ମାଣ କରାଯାଉ ନାହିଁ। ବଇଣ୍ଡା ପ୍ରାଣୀ ଚିକିତ୍ସାଳୟ ନିର୍ମାଣ କରାଯାଇ ନ ଥିବାରୁ ୪ଟି ପଞ୍ଚାୟତର ଚାଷୀ ପ୍ରାଣୀଧନଙ୍କୁ ନେଇ ୭ କିଲୋମିଟର ଦୂର ହଣ୍ଡପା ଯାଉଛନ୍ତି। ପୂର୍ତ୍ତ ବିଭାଗ ବଙ୍ଗଳା ପାଇଁ ୨ କୋଟି ଟଙ୍କା ମଞ୍ଜୁର ହୋଇଥିଲେ ମଧ୍ୟ ନିର୍ମାଣରେ ବିଳମ୍ବ ହେଉଛି। ଫାଣ୍ଡି ସ୍ଥାପନ କରିବାକୁ ଜମି ଥିବା ନେଇ ବଇଣ୍ଡା ଗ୍ରାମବାସୀ ଆଠମଲ୍ଲିକ ବିଧାୟକଙ୍କୁ ଗତ ଜାନୁୟାରୀ ୧୫ ତାରିଖରୁ ଲିଖିତ ଭାବେ ଅବଗତ କରିଛନ୍ତି। ତଥାପି ପଦକ୍ଷେପ ନିଆଯାଉ ନାହିଁ। ଅନେକ ବିଶ୍ରାମାଗାର ସହ ନୂତନ ବିଦ୍ୟାଳୟ ଗୃହ ନିର୍ମାଣ ଦାୟିତ୍ୱ ଠିକାସଂସ୍ଥା ନେଇଥିବା ବେଳେ ମାତ୍ର ୨ଟି ବିଦ୍ୟାଳୟ ନିର୍ମାଣ କରୁଛି। ବଇଣ୍ଡା, ବାମୁର ଠାରେ ଫ୍ଲାଏ ଓଭର ବ୍ରିଜ୍ ବିଳମ୍ବ ହେଉଛି। ଉଚ୍ଛେଦର ୩ ବର୍ଷ ପରେ ବି ସମ୍ପ୍ରସାରଣ କାର୍ଯ୍ୟ ଶେଷ ହେଉ ନ ଥିବାରୁ ବ୍ୟବସାୟୀମାନେ ଥଇଥାନ ହୋଇପାରୁନାହାନ୍ତି। ଏହାକୁ ନେଇ ବଇଣ୍ଡାବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି।
ଠିକା ସଂସ୍ଥାର ଅବହେଳା
ବାମୁରଠାରେ ସରକାରୀ କାର୍ଯ୍ୟାଳୟ ନିର୍ମାଣ ହେଉନାହିଁ। ଫ୍ଲାଏ ଓଭର ବ୍ରିଜ୍ କାମ ଅଧାରେ ରହିଛି। ଏଥିଯୋଗୁ ଅଞ୍ଚଳବାସୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଠିକାସଂସ୍ଥା ଠିକ୍ ସମୟରେ କାର୍ଯ୍ୟକରୁ ନ ଥିବାରୁ ଅଞ୍ଚଳର ବିକାଶ ବାଧାପ୍ରାପ୍ତ ହେଉଛି।
-ସଞ୍ଜୀବ ପ୍ରଧାନ, ବାମୁର
ଦାବିକୁ ଗୁରୁତ୍ୱ ଦିଆଯାଉନି
ବଇଣ୍ଡାଠାରେ ଥିବା ପ୍ରାଣୀ ଚିକିତ୍ସାଳୟ ନିର୍ମାଣ ହେଇପାରୁନାହିଁ। ଜମି ଯୋଗାଇବାରେ ବିଭାଗୀୟ କର୍ତ୍ତୃପକ୍ଷ ବିଳମ୍ବ କରୁଛନ୍ତି। ଭଙ୍ଗା ଯାଇଥିବା ସରକାରୀ କାର୍ଯ୍ୟାଳୟଗୁଡିକ ନୂତନ ଭାବେ ନିର୍ମାଣ ନିମନ୍ତେ ବହୁବାର ଦାବିପତ୍ର ଦିଆଯାଇଥିଲେ ମଧ୍ୟ ସୁଫଳ ମିଳୁନାହିଁ।
-ଅଜିତ ପଟ୍ଟନାୟକ, କଦଳୀମୁଣ୍ଡା
ଗାତ ଖୋଳି ଛାଡ଼ିଦିଆଯାଇଛି
ବଇଣ୍ଡାରେ ଥିବା ବଙ୍ଗଳା, ପ୍ରାଥମିକ ବିଦ୍ୟାଳୟ ନିର୍ମାଣ ହେଉନାହିଁ। ଫ୍ଲାଏ ଓଭର ବ୍ରିଜ୍ କାର୍ଯ୍ୟ ଗାତ ଖୋଳାରେ ସୀମିତ ରହିଛି। ଡ୍ରେନ୍ ନିର୍ମାଣ ଦିଗରେ ଦୃଷ୍ଟି ଦିଆଯାଉ ନାହିଁ। ବର୍ଷା ସମୟରେ ସ୍ଥାନୀୟ ଲୋକଙ୍କ ଘରେ ପାଣି ପଶୁଥିବାରୁ ସେମାନେ ହଇରାଣ ହେଉଛନ୍ତି।
-ଉଗ୍ରସେନ ସେଠୀ, ବଇଣ୍ଡା
ପ୍ରଶାସନ ଉଦ୍ୟମ କରୁଛି
ବଇଣ୍ଡା ଠାରେ ବଙ୍ଗଳା, ବିଦ୍ୟାଳୟ ନିର୍ମାଣ ପାଇଁ ଜମି ଚିହ୍ନଟ କରାଯାଇଛି। ବିଭାଗୀୟ ଅଧିକାରୀଙ୍କୁ ଏ ନେଇ ଅବଗତ କରାଯାଇଛି। ସମସ୍ତ ସରକାରୀ କାର୍ଯ୍ୟାଳୟ କିଭଳି ଶୀଘ୍ର ନିର୍ମାଣ ହେବ ସେ ନେଇ ବିଭାଗ ପକ୍ଷରୁ ଉଦ୍ୟମ ଆରମ୍ଭ ହୋଇଛି। ଏଥିସହ ସବୁ କାର୍ଯ୍ୟାଳୟ ନିର୍ମାଣ ନିମନ୍ତେ ଜମି ଶୀଘ୍ର ଯୋଗାଇ ଦିଆଯିବ।
-ଶାନ୍ତି ସ୍ବରୂପ ମିଶ୍ର, ତହସିଲଦାର
କରୋନା, ଶ୍ରମିକ ଅଭାବ ବାଧକ
ବିଭିନ୍ନ କାର୍ଯ୍ୟାଳୟ ନିର୍ମାଣରେ କରୋନା ସହ ଶ୍ରମିକ ଅଭାବ ବାଧକ ସାଜିଛି। ସେଥିପାଇଁ ଏଥିରେ ବିଳମ୍ବ ହୋଇଚାଲିଛି। ପ୍ରଶାସନ କିଛି ଜମି ଚିହ୍ନଟ କରିଛନ୍ତି। ଶୀଘ୍ର ସରକାରୀ କାର୍ଯ୍ୟାଳୟ ସହ ରାସ୍ତା କାର୍ଯ୍ୟ ଆରମ୍ଭ ହେବ। ବଇଣ୍ଡାରେ ସମସ୍ତ କାର୍ଯ୍ୟ ଶୀଘ୍ର କରିବା ପାଇଁ ଉଦ୍ୟମ ଚାଲିଛି।
-ଗେଲିଡେବେରା ପଦ୍ମନାଭମ, ଠିକାସଂସ୍ଥା ପରିଚାଳକ
