ଯାଜପୁର,୩ା୭(ହର୍ଷବର୍ଦ୍ଧନ ବେହେରା): ଯାଜପୁର ଜିଲା ପ୍ରଶାସନ ପକ୍ଷରୁ ୨୦୨୧ ଜାନୁୟାରୀରେ ଧର୍ମଶାଳା ତହସିଲ ଏବଂ ଫେବୃୟାରୀରେ ଦର୍ପଣ ତହସିଲ ଅଞ୍ଚଳରେ ବେଆଇନ ପଥର ଭଙ୍ଗା କ୍ରଶରଗୁଡିକ ଉଚ୍ଛେଦ ହୋଇଥିଲା। ପରିବେଶ ନିୟମ ଓ ସାଇଟିଂ କ୍ରାଇଟେରିଆ ବାହାରେ ଚାଲୁଥିବା କ୍ରଶରଗୁଡ଼ିକୁ ଉଚ୍ଛେଦ ଓ ସିଲ୍ କରିବାର କେଇଦିନ ଯାଇଛି କି ନାହିଁ ତାହା ପୁଣି ଜୋରସୋରରେ ଚାଲିଛି। ଏଥିରେ ୫୩ ନମ୍ବର ଜାତୀୟ ରାଜପଥର ଚଣ୍ଡିଖୋଲ ଡାକବଙ୍ଗଳା ଛକଠାରୁ ଚଢେଇଧରା ଛକ ମଧ୍ୟରେ ରାଣୀବନ୍ଧ, ଭଡ଼ଙ୍ଗା, ଆରୁହା, ପାଖର, ବରଡ଼ା, ବଉଳମାଳ ଆଦି ମୌଜାରେ ରାଜପଥ ପାର୍ଶ୍ୱକୁ ଲାଗି ଏକାଧିକ ବେଆଇନ କ୍ରଶର ରହିଛି। ଏହିସବୁ ବେଆଇନ କ୍ରଶର ପାଇଁ ଏକାଧିକ କଳାପଥର ଖାଦାନରୁ ଉତ୍ତୋଳନ ମଧ୍ୟ ଜୋର ଧରିଛି। ଏଭଳି ସ୍ଥିତିରେ ପ୍ରଶାସନର ପ୍ରସ୍ତାବିତ କ୍ରଶର ୟୁନିଟ ନିର୍ମାଣରେ ବିଳମ୍ବ ବେଆଇନ କଳାପଥର ଉତ୍ତୋଳନକୁ ସୁହାଉଛି ବୋଲି ମତପ୍ରକାଶ ପାଇଛି।
ଜିଲାର ଦର୍ପଣ, ଧର୍ମଶାଳା ଓ ଦାନଗଦି ତହସିଲ ଇଲାକାରେ ବେଆଇନ କ୍ରଶରଗୁଡିକ ଉପରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ୨୦୧୫ ଜୁନ ୨୨ରେ ବିଜ୍ଞପ୍ତି ପ୍ରକାଶ ପାଇଥିଲା। ହାଇକୋର୍ଟ ମକଦ୍ଦମା ନମ୍ବର ଡବ୍ଲ୍ୟୁପିସି ୯୧୦୧/୨୦୦୯ ଏବଂ ଜାତୀୟ ମାନବାଧିକାର ଆୟୁକ୍ତଙ୍କ କେସ୍ ନମ୍ବର ୧୩୪-୧୮/୫/୦୭୦୮/ଓସି ଆଦେଶନାମା ଅନୁଯାୟୀ ବେଆଇନ କ୍ରଶରଗୁଡ଼ିକୁ ବନ୍ଦ କରାଯିବାକୁ ନିଷ୍ପତ୍ତି ହୋଇଥିଲା। ଏହି ନିର୍ଦ୍ଦେଶ ବଳରେ ୨୦୧୬ରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ୧୪୭ଟି ଛୋଟ କ୍ରଶରକୁ ସିଲ୍ କରାଯାଇଥିଲା। ଏହାସହ ବିଦ୍ୟୁତ୍ ସଂଯୋଗ ମଧ୍ୟ କାଟି ଦିଆଯାଇଥିଲା। ସେତେବେଳେ ଅରୁଣୀ, ଆର୍କେଡି, ସିମ୍ପ୍ଲେକ୍ସ, ମାଧବ, ଗରୁଡ, ଏଆରଏସ୍ଏସ୍, ନାଗାର୍ଜୁନ, ରକ୍ସାଣ୍ଡ୍, ଯୋଡ଼ା, ତାପ୍ତି, ଗୋଡ଼ଗାଓଁ, କୋଣାର୍କ, ଜୈନ, ଅମିତ୍, ସାଉଥ୍ ଇଷ୍ଟ ଆଦି ମେଗା କ୍ରଶର ଉପରେ କାର୍ଯ୍ୟାନୁଷ୍ଠାନ ହୋଇ ନ ଥିବାରୁ ଅନ୍ୟ କ୍ରଶରମାଲିକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ପରବର୍ତ୍ତୀ ସମୟରେ ଶ୍ରମିକଙ୍କ ଜୀବନଜୀବିକାକୁ ଦୃଷ୍ଟିରେ ରଖି କେତେକ ସ୍ଥାନରେ କ୍ରଶର ୟୁନିଟ ସ୍ଥାପନ କରାଯିବ ବୋଲି ପ୍ରଶାସନ ପକ୍ଷରୁ ପ୍ରତିଶ୍ରୁତି ଦିଆଯାଇଥିଲା। ଏଥିସକାଶେ ଜମି ଯୋଗାଇ ଦେବାକୁ ପ୍ରକ୍ରିୟା ମଧ୍ୟ ଆରମ୍ଭ ହୋଇଥିଲା। ଏହାପରେ ଆରୁହା ଇଣ୍ଡଷ୍ଟ୍ରିଆଲ ଏରିଆ, ବରଡା, ଅଞ୍ଜିରା, ଅଲାଝାଟିଆଠାରେ ଜମି ଚିହ୍ନଟ କରାଯାଇଛି। ଏହାପରେ ୨୦୨୧ ଜାନୁୟାରୀ ଓ ଫେବୃୟାରୀରେ ପୁଣି କ୍ରଶର ଭଙ୍ଗା ଅଭିଯାନ ଆରମ୍ଭ ହୋଇଥିଲା। ଏହାର କିଛିଦିନ ପରେ ପୁଣି ରାଜପଥ କଡ଼ରେ କ୍ରଶରଗୁଡିକ ଚାଲିବା ଆରମ୍ଭ ହୋଇଥିଲା। ଏଭଳି ଭାବେ କ୍ରଶର ଭଙ୍ଗା ଏବଂ ପରେ ପୁଣି ଚାଲିବା ଦେଖିବାକୁ ମିଳୁଛି। ମେଗା କ୍ରଶରଗୁଡିକରେ ଅତ୍ୟଧିକ କଳାପଥର ମହଜୁଦ ରହୁଛି। ସରକାରୀ ଅନୁମତିଠାରୁ ବହୁଗୁଣ ଅଧିକ ପଥର ମହଜୁଦ ରହିବା ନେଇ ପ୍ରଶ୍ନ ଉଠୁଛି। ବଳରାମପୁର ସଂରକ୍ଷିତ ଜଙ୍ଗଲ ସମେତ ବିଛାଖଣ୍ଡି, କୁସୁନପୁର, ମୁକୁନ୍ଦପୁର, ନିଶ୍ଚନ୍ତା ଅଭୟାରଣ୍ୟ, ଡଙ୍କାରୀ, ଆରୁହା, ଲୁଣିବର, ମାଲଗୋଡ଼ା ଓ ରାହାଡପୁର ଠାରୁ ଢେଙ୍କାନାଳ ସୀମାନ୍ତ ପର୍ଯ୍ୟନ୍ତ ଶତାଧିକ ବେଆଇନ କଳାପଥର ଖାଦାନ ଚାଲିଥିବା ଅଭିଯୋଗ ହେଉଛି। ବେଆଇନ ପଥର ଖାଦାନଗୁଡିକରୁ ନକଲି ଆର୍-ଫର୍ମରେ ବାହାରକୁ ଚାଲାଣ ହୋଇଥିବା ଏଥିରୁ ସନ୍ଦେହ କରାଯାଇଛି। ନକଲି ଆର୍-ଫର୍ମରେ ବିଭିନ୍ନ ଶିଳ୍ପ କାରଖାନାଗୁଡିକୁ ମଧ୍ୟ ଚିପ୍ସ, ମେଟାଲ ଆଦି ଯୋଗାଣ କରାଯାଉଛି ବୋଲି ଚର୍ଚ୍ଚା ହେଉଛି। ଏହିକ୍ରମରେ ସରକାରୀ ଭାବେ କ୍ରଶର ୟୁନିଟ ସ୍ଥାପନ କରାଗଲେ ବେଆଇନ କଳାପଥର ଉତ୍ତୋଳନ କିଛିଟା ନିୟନ୍ତ୍ରଣ ହୋଇପାରନ୍ତା ବୋଲି ଆଶା କରାଯାଉଛି। କିନ୍ତୁ କ୍ରଶର ୟୁନିଟ ନିର୍ମାଣ ଦାୟିତ୍ୱରେ ରହିଥିବା ଅଧିକାରୀ ଜାଣିଶୁଣି ବିଳମ୍ବ କରୁଥିବା ଅଭିଯୋଗ ଉଠିଛି। ଏ ସଂକ୍ରାନ୍ତରେ ଧର୍ମଶାଳା ତହସିଲଦାର ସ୍ବାଗତ ଦାସଙ୍କ ମତାମତ ନେବାକୁ ତାଙ୍କ ମୋବାଇଲକୁ ଯୋଗାଯୋଗ କରାଯାଇଥିଲେ ହେଁ ସେ ଫୋନ କଲ୍ ଗ୍ରହଣ କରି ନ ଥିଲେ।
