ଲକ୍ଷ୍ନୌ,୨୦।୧: ଉତ୍ତରପ୍ରଦେଶର ପ୍ରୟାଗରାଜରେ ପହଞ୍ଚିଥିବା ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ପାକିସ୍ତାନକୁ ନେଇ ଏକ ବଡ଼ ବୟାନ ଦେଇଛନ୍ତି। ପଡ଼ୋଶୀ ଦେଶ ପାକିସ୍ତାନର ଅର୍ଥନୈତିକ ଦାରିଦ୍ର ଉପରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ନିଜର ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ପିଓକେ ହେଉ କିମ୍ବା ପାକିସ୍ତାନ, ଆମେ ସବୁବେଳେ କାମନା କରିବୁ ଯେ, ସେଠାରେ ଥିବା ଲୋକମାନେ ଖୁସିରେ ରୁହନ୍ତୁ। କାରଣ ଭାରତ ହେଉଛି ବିଶ୍ୱର ଏକମାତ୍ର ଦେଶ, ଯିଏ କେବଳ ଭାରତର ସୀମାରେ ରହୁଥିବା ଲୋକଙ୍କୁ ନିଜ ପରିବାରର ସଦସ୍ୟ ଭାବରେ ବିବେଚନା କରେ ନାହିଁ, ବରଂ ସମଗ୍ର ବିଶ୍ୱରେ ରହୁଥିବା ଲୋକଙ୍କୁ ନିଜ ପରିବାର ସଦସ୍ୟ ଭାବେ ବିବେଚନା କରିଥାଏ। ଭାରତ ସବୁବେଳେ ବସୁଦେବ କୁଟୁମ୍ବକମ୍ର ବାର୍ତ୍ତା ଦେଇଥାଏ। ଏଥିସହ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କାମନା କରିଛନ୍ତି ଯେ, ପିଓକେ ହେଉ କି ପାକିସ୍ତାନ, କେହି ସଙ୍କଟରେ ସମ୍ମୁଖୀନ ହୁଅନ୍ତୁ ନାହିଁ ଏବଂ ସମସ୍ତେ ଖୁସି ରୁଅନ୍ତୁ। ଯେଭଳି ଭୋକ ଓ ଉପାସରେ କେହି ମରିବା ଭଳି ପରିସ୍ଥିତି ନ ଉପୁଜେ ତାହା ଆମେ କାମନା କରୁଛୁ। ଏତଦ୍ ବ୍ୟତୀତ ସେ ଚାଇନାର ବାରମ୍ବାର ଭାରତକୁ ଆଖି ଦେଖାଇବା ପ୍ରଶ୍ନରେ କହିଛନ୍ତି, ଚାଇନା ଭାରତର ଶକ୍ତିକୁ ଭଲଭାବେ ଜାଣିଛି। ମୋର ଏହା ଉପରେ ମନ୍ତବ୍ୟ ଦେବାର କୌଣସି ଆବଶ୍ୟକତା ନାହିଁ ବୋଲି ରାଜନାଥ କହିଛନ୍ତି।
