ନୂଆଦିଲ୍ଲୀ,୨୦ା୪ (ଆଇଏଏନ୍ଏସ୍): ସୈନ୍ୟ ବାହିନୀରେ ସାଇବର ସୁରକ୍ଷା ଉଲ୍ଲଂଘନ ହୋଇଥିବାର ଗୋଇନ୍ଦା ରିପୋର୍ଟ ମିଳିବା ପରେ ଏହାର ଉଚ୍ଚସ୍ତରୀୟ ତଦନ୍ତ ଆରମ୍ଭ ହୋଇଛି। ସାଇବର ସୁରକ୍ଷା ତ୍ରୁଟି ସହ କେତେଜଣ ସେନା ଅଧିକାରୀ ସମ୍ପୃକ୍ତ ଥିବା ପ୍ରତିରକ୍ଷା ସୂତ୍ରରୁ ଜଣାପଡ଼ିଛି। ସେମାନଙ୍କର ଶତ୍ରୁ ଦେଶ ସହ ଯୋଗାଯୋଗ ରହିଥିବା ସନ୍ଦେହ କରାଯାଉଛି। ସେମାନେ ପଡୋଶୀ ଦେଶ ପାଇଁ ଗୁପ୍ତଚରଗିରିରେ ସମ୍ପୃକ୍ତ ଥିବା ସାମରିକ ଓ ଗୋଇନ୍ଦା ସଂସ୍ଥା ଅନୁଧ୍ୟାନରୁ ଜାଣିବାକୁ ପାଇଛି। ସୂତ୍ର ଅନୁଯାୟୀ ନିର୍ଦ୍ଦିଷ୍ଟ ହ୍ବାଟ୍ସଆପ୍ ଗ୍ରୁପ୍ ଜରିଆରେ ସମ୍ବେଦନଶୀଳ ତଥ୍ୟ ଲିକ୍ ହୋଇଛି। ତଦନ୍ତରେ ଦୋଷୀ ଅଫିସର ଧରାପଡ଼ିଲେ ସେମାନଙ୍କ ବିରୋଧରେ ସବୁଠୁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କେତେଜଣ ଅଧିକାରୀ କହିଛନ୍ତି। ପ୍ରଚଳିତ ନିର୍ଦ୍ଦେଶାବଳୀର ଉଲ୍ଲଂଘନ, ଗୋଇନ୍ଦା ବିରୋଧୀ ଘଟଣା ସହ ସମ୍ପୃକ୍ତି ଆଦି ଆଧିକାରିକ ଗୋପନୀୟତା ଆଇନ ଅନ୍ତର୍ଭୁକ୍ତ ହୋଇଥିବାରୁ ଏଭଳି ଘଟଣାରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥାଏ। ଏହା ପ୍ରତିରକ୍ଷା ବିଭାଗର ସମ୍ବେଦନଶୀଳ ଘଟଣା ହୋଇଥିବାରୁ ତଦନ୍ତ ପ୍ରଭାବିତ ହେବା ଆଶଙ୍କାରେ ଅଧିକ କିଛି କହିବାକୁ ଅଧିକାରୀମାନେ ମନା କରିଦେଇଛନ୍ତି।
ନିକଟରେ ପାକିସ୍ତାନ ଓ ଚାଇନା ଗୋଇନ୍ଦା ସଂସ୍ଥାର କେତେଜଣ ସନ୍ଦିଗ୍ଧ ଭାରତୀୟ ସୈନ୍ୟ ବାହିନୀର ସମ୍ବେଦନଶୀଳ ତଥ୍ୟ ହାସଲ କରିବା ପାଇଁ ସୋସିଆଲ ମିଡିଆ ପ୍ଲାଟଫର୍ମ ଜରିଆରେ ସେନା ଅଧିକାରୀଙ୍କ ସହ ଯୋଗାଯୋଗ ଉଦ୍ୟମ କରିଥିଲେ। ସେମାନଙ୍କର ଅଧିକାଂଶ ଉଦ୍ୟମ ବିଫଳ ହୋଇଥିଲେ ହେଁ, କେତେଜଣ ଅଧିକାରୀଙ୍କୁ ସେମାନେ ଫାଶରେ ପକାଇପାରିଛନ୍ତି। ଉକ୍ତ ଅଧିକାରୀଙ୍କଠାରୁ ସେମାନେ କେତେକ ତଥ୍ୟ ହାସଲ କରିବାରେ ସମର୍ଥ ହୋଇଥିବା କୁହାଯାଉଛି। ସାଇବର ସୁରକ୍ଷା ଯେପରି ଉଲ୍ଲଂଘନ ନ ହୁଏ, ସେଥିପାଇଁ ସୋସିଆଲ ମିଡିଆ ବ୍ୟବହାର କଲାବେଳେ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର ଏବଂ ଗାଇଡ୍ଲାଇନ ପାଳନ କରିବା ଲାଗି ଅଧିକାରୀମାନଙ୍କୁ ବାରମ୍ବାର କୁହାଯାଇଆସୁଛି।
ସୂଚନାଯୋଗ୍ୟ, ପାକିସ୍ତାନୀ ଗୋଇନ୍ଦା ସଂସ୍ଥା ଆଇଏସ୍ଆଇ ପାଇଁ ଭାରତୀୟ ସେନା ଅଧିକାରୀ ଗୁପ୍ତଚରଗିରି କରିବା ନୂଆ ନୁହେଁ। ଅତୀତରେ ଅନେକ ଥର ଏଭଳି ଘଟଣା ଧରାପଡ଼ିଛି ଓ ସମ୍ପୃକ୍ତ ଅଧିକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ହୋଇଛି। ଗତବର୍ଷ ଅକ୍ଟୋବରରେ ପଞ୍ଜାବର ସ୍ପେଶାଲ ଅପରେଶନ ସେଲ୍ ଜଣେ ଭାରତୀୟ ସେନା ଅଧିକାରୀଙ୍କୁ ଗିରଫ କରିଥିଲା। କ୍ରୁନାଲ କୁମାର ନାମକ ଗୁଜରାଟର ଏହି ଅଫିସର ଫିରୋଜପୁରରେ ଅବସ୍ଥାପିତ ଥିଲେ ଓ ଭାରତୀୟ ସେନାର ଆଇଟି ସେଲ୍ ପାଇଁ କାର୍ଯ୍ୟ କରୁଥିଲେ। ସେ ଆଇଏସ୍ଆଇ ପାଇଁ ଗୁପ୍ତଚରଗିରି କରୁଥିବା ଅଭିଯୋଗ ହୋଇଥିଲା। ସୋସିଆଲ ମିଡିଆ ଆକାଉଣ୍ଟ ଜରିଆରେ ସେ ଆଇଏସ୍ଆଇ ସଦସ୍ୟଙ୍କ ସହ ଯୋଗାଯୋଗରେ ଥିଲେ। ଦେଶର ସ୍ବାର୍ଥ ଓ ସୁରକ୍ଷା ସମ୍ପର୍କିତ କେତେକ ଗୁରୁତ୍ୱପୂର୍ଣ୍ଣ ତଥ୍ୟ ସେ ଲିକ୍ କରିଥିବା ଜଣାପଡ଼ିଥିଲା।
