ନୂଆଦିଲ୍ଲୀ,୨୧।୧: ଜୋମାଟୋର ପ୍ୟାରେଣ୍ଟ କମ୍ପାନୀ ‘ଇଟର୍ନାଲ୍’ର ନେତୃତ୍ୱରେ ଏକ ବଡ଼ ପରିବର୍ତ୍ତନ ହୋଇଛି। କମ୍ପାନୀର ପ୍ରତିଷ୍ଠାତା ଦୀପିନ୍ଦର ଗୋୟଲ ସିଇଓ ପଦରୁ ଇସ୍ତଫା ଦେଇଛନ୍ତି। ତାଙ୍କ ସ୍ଥାନରେ ବ୍ଲିଙ୍କିଟ୍ ର ସିଇଓ ଅଲବିନ୍ଦର ସିଂ ଧିଣ୍ଡସାଙ୍କୁ ନୂଆ ଦାୟିତ୍ୱ ମିଳିଛି।
ଦୀପିନ୍ଦର CEO ଏବଂ MD ପଦରୁ ଇସ୍ତଫା ଦେଇଥିଲେ ମଧ୍ୟ ବର୍ତ୍ତମାନ କମ୍ପାନୀର ଭାଇସ୍ ଚେୟାରମ୍ୟାନ୍ ଭାବେ କାର୍ଯ୍ୟ କରିବେ ଏବଂ ବୋର୍ଡ ଅଫ୍ ଡାଇରେକ୍ଟରରେ ସଦସ୍ୟ ରହିବେ। ବ୍ଲିଙ୍କିଟ୍ର ସିଇଓ ଅଲବିନ୍ଦର ସିଂ ଧିଣ୍ଡସା ଫେବୃଆରୀ ୧, ୨୦୨୬ ରୁ ଇଟର୍ଣ୍ଣାଲର ନୂଆ ସିଇଓ ଭାବେ କାର୍ଯ୍ୟଭାର ଗ୍ରହଣ କରିବେ।
ନିକଟରେ ଜୋମାଟୋ ଏବଂ ବ୍ଲିଙ୍କିଟ୍ର ମାଲିକାନା ସଂସ୍ଥା ‘ଇଟର୍ଣ୍ଣାଲ’ ଡିସେମ୍ବର ୩୧ରେ ଶେଷ ହୋଇଥିବା ତୃତୀୟ ତ୍ରୈମାସିକ ପାଇଁ ନିଜର ଆର୍ଥିକ ରିପୋର୍ଟ ପ୍ରକାଶ କରିଛି। କମ୍ପାନୀର ମୋଟ ଲାଭ ପ୍ରାୟ ୧୦୨ କୋଟି ଟଙ୍କାରେ ପହଞ୍ଚିଛି। ଯାହା ଗତ ତ୍ରୈମାସିକର ୬୫୦ ମିଲିୟନ ଟଙ୍କା ତୁଳନାରେ ପ୍ରାୟ ଦୁଇଗୁଣ ହୋଇଛି। କମ୍ପାନୀର ପରିଚାଳନା ରାଜସ୍ୱ ୧୬୩.୧୫ ବିଲିୟନ ଟଙ୍କାରେ ପହଞ୍ଚିଛି।
କୁଇକ୍ କମର୍ସ ବା ବ୍ଲିଙ୍କିଟ୍ ମାଧ୍ୟମରେ ଦ୍ରୁତ ବିତରଣ ସେବାର ଚାହିଦା ବଢ଼ିବା ଯୋଗୁଁ କମ୍ପାନୀର ଆୟ ଏବଂ ଲାଭରେ ଏହି ବଡ଼ ଉନ୍ନତି ପରିଲକ୍ଷିତ ହୋଇଛି। ଗୁରୁଗ୍ରାମ ଭିତ୍ତିକ ଏହି କମ୍ପାନୀ ଅନୁଯାୟୀ, ବ୍ଲିଙ୍କିଟ୍ର ଅଭିବୃଦ୍ଧି ସହିତ ମୂଳ ଫୁଡ୍ ଡେଲିଭରି ବ୍ୟବସାୟ ମଧ୍ୟ ଶକ୍ତିଶାଳୀ ରହିଛି।