ବେଗୁନିଆପଡ଼ା,୧୩ା୪(ଡି.ଏନ୍.ଏ.): ପୋଲିସ ହାତରେ ଧରା ଦେଲେନି, କୋର୍ଟକୁ ବି ଅବମାନନା କଲେ। ଶେଷରେ ଜବତ ହେଲା ଅପରାଧୀଙ୍କ ସମ୍ପତ୍ତି। ଏଭଳି ଏକ ଖବର ସାମ୍ନାକୁ ଆସିଛି ଗଞ୍ଜାମ ଜିଲା କୋଦଳା ଥାନା ଅନ୍ତର୍ଗତ ମର୍ଦ୍ଦମେଖ ପଞ୍ଚାୟତର ମାଟିଗଡ଼ ଗାଁରୁ।
ଖବର ଅନୁଯାୟୀ, ମାଟିଗଡ଼ ଗ୍ରାମର ୨ ହତ୍ୟା ଅଭିଯୁକ୍ତଙ୍କୁ ଖୋଜୁଥିଲା ପୋଲିସ। ଆତ୍ମସମର୍ପଣ କରିବାକୁ ବାରମ୍ବାର ସୂଚନା ଦିଆଯାଇଥିଲା। ପୋଲିସ ପକ୍ଷରୁ ଅଭିଯୁକ୍ତଙ୍କ ନିଜ ଗ୍ରାମ ମାଟିଗଡ଼କୁ ଆସି ସେମାନଙ୍କ ଘର ଦାଣ୍ଡରେ ଲଟକା ଜାରି କରିବା ସହିତ ଅଭିଯୁକ୍ତମାନଙ୍କୁ ଆତ୍ମସମର୍ପଣ କରିବା ପାଇଁ ସୂଚନା ଦେଇଥିଲେ। ତେବେ ଅଭିଯୁକ୍ତମାନେ ଆତ୍ମସମର୍ପଣ କରି ନ ଥିଲେ। ପରେ ମାନ୍ୟବର କୋଦଳା ଜେଏମ୍ଏଫ୍ସି କୋର୍ଟ, ଉକ୍ତ ଅଭିଯୁକ୍ତମାନଙ୍କୁ ଧରିବା ନିମନ୍ତେ ଏକ ଜାମିନ ବିହୀନ ଗିରଫ ପରଓ୍ବାନା ଜାରି କରିଥିଲେ ଏଂ ୮୨ ସିଆରପିସି ଆଇନ ଅନୁଯାୟୀ ଉକ୍ତ ଅଭିଯୁକ୍ତମାନଙ୍କ ବିରୋଧରେ ପଳାତକ ଘୋଷଣା ନାମା ଜାରି କରିଥିଲେ। ଏକ ହତ୍ୟାକାଣ୍ଡ ମାମଲାରେ ୩ ଅଭିଯୁକ୍ତ ଥିଲେ ବିଟୁ ଦାସ, ବିଶିକେଶନ ଦାସ ଓ କାଲା ଦାସ। ଏଥି ମଧ୍ୟରୁ ବିଟୁ ଦାସ ଆତ୍ମସମର୍ପଣ କରିଥିବା ବେଳେ କୋର୍ଟ ଅବମାନନା ପାଇଁ ୨ ଅଭିଯୁକ୍ତଙ୍କ ବିଶିକେଶନ ଓ କାଲାଙ୍କ ଘରେ ଚଢ଼ାଉ କରି ସମସ୍ତ ଆସବାବପତ୍ର ଜବତ କରାଯାଇଛି। କୋଦଳା ତହସିଲଦାର ତଥା ମାଜିଷ୍ଟ୍ରେଟ୍ ସସ୍ମିତା ଶତପଥୀଙ୍କ ଉପସ୍ଥିତିରେ ପୁରୁଷୋତ୍ତମପୁର ଏସ୍ଡିପିଓ ରଜନୀକାନ୍ତ ସାମଲ ଏବଂ କୋଦଳା ଥାନା ଆଇଆଇସି ଉମାକାନ୍ତ ସାହୁ ପ୍ରମୁଖ ଉପସ୍ଥିତ ରହି ଉକ୍ତ ଅଭିଯୁକ୍ତଙ୍କ ବାସଭବନରୁ ଟିଭି, ଫ୍ରିଜ, ଓ୍ବାଶିଂମେଶିନ ପ୍ରଭୃତି ସାମଗ୍ରୀ ଜବତ କରିଥିବା ଜଣାପଡ଼ିଛି। ୨୦୧୭ର ଏହି ମାମଲାରେ ଅଭିଯୁକ୍ତମାନେ ଧରା ନ ଦେବାରୁ ଏଭଳି ପଦକ୍ଷେପ ନିଆଯାଇଥିବା ବେଳେ ଆଗାମୀ ଦିନରେ ମଧ୍ୟ ପୋଲିସକୁ ଧରା ଦେଉ ନ ଥିବା ତଥା ଜାମିନ ବିହୀନ ଗିରଫ ପରଓ୍ବାନା ଜାରି ହୋଇଥିବା ଅଭିଯୁକ୍ତମାନଙ୍କ ବିରୋଧରେ ଏଭଳି ପଦକ୍ଷେପ ନିଆଯିବ ବୋଲି କହିଛନ୍ତି ଥାନାଧିକାରୀ ଉମାକାନ୍ତ ସାହୁ।
